كوپشىلىك بالالاردى ساقتاندىرۋ تەك اسا بەلسەندى نەمەسە كاسىبي سپورتپەن اينالىساتىندارعا عانا كەرەك دەپ ويلايدى. الايدا تاجىريبە كورسەتكەندەي, بالالار ءتۇرلى قاۋىپتى جاعدايعا كۇندەلىكتى ومىردە كوبىرەك ۇشىرايدى, دەپ جازادى Egemen.kz.
بالا روليكتەن قۇلاپ, جاتتىعۋ كەزىندە جاراقات الىپ, باتۋتتا سەكىرىپ ءجۇرىپ قولىن سىندىرىپ الۋى نەمەسە دەمالىس كەزىندە اۋىرىپ قالۋى مۇمكىن. كەي جاعدايدا قاراپايىم قىزۋدىڭ ءوزى اسقىنىپ, بالاعا شۇعىل مەديتسينالىق كومەك قاجەت بولادى. مۇندايدا اتا-انالار تەك بالانىڭ جاعدايىن ەمەس, ەمدەلۋگە كەتەتىن شىعىندى دا ويلاۋعا ءماجبۇر.
مەملەكەتتىك مەديتسينا بەلگىلى ءبىر كومەكتى وتەگەنىمەن, اقىلى تەكسەرۋلەر, وڭالتۋ, قوسىمشا ەم-دوم جانە جەدەل قابىلداۋلار كوبىنە وتباسى بيۋدجەتىنە سالماق تۇسىرەدى. سوندىقتان كوپتەگەن اتا-انا ساقتاندىرۋدىڭ ماڭىزىن قيىن جاعدايعا تاپ بولعاننان كەيىن عانا تۇسىنەدى.
استانادا بالالاردى قورعاۋ كۇنىنە وراي 100-گە جۋىق ءىس-شارا وتەدى
مامانداردىڭ ايتۋىنشا, مۇندايدا ەڭ ءتيىمدى شەشىمدەردىڭ ءبىرى – جازاتايىم وقيعالاردان ساقتاندىرۋ. بۇل پوليس جاراقات الۋ, اۋرۋحاناعا جاتقىزىلۋ, كۇيىك شالۋ جانە باسقا دا ءتۇرلى جاعدايلاردا وتەماقى تولەۋدى قاراستىرادى. كەيبىر ساقتاندىرۋ تۇرلەرى ءتىپتى اتا-انانىڭ بالا كۇتىمىنە بايلانىستى ۋاقىتشا ەڭبەككە جارامسىز بولۋىن دا قامتيدى.
الايدا ساقتاندىرۋ راسىمدەۋ كەزىندە ماڭىزدى جايتتاردى ەسكەرگەن ءجون. مىسالى, بارلىق پوليس سپورتتىق جاراقاتتاردى اۆتوماتتى تۇردە قامتىمايدى. ەگەر بالا فۋتبول, حوككەي, ءجۇزۋ, گيمناستيكا نەمەسە جەكپە-جەك سەكىلدى سپورت تۇرلەرىمەن اينالىسسا, ساقتاندىرۋ كەلىسىمشارتىندا بۇل تارماق ناقتى كورسەتىلۋى ءتيىس. كەي ارزان پوليستەر سپورت كەزىندەگى جاراقاتتاردى مۇلدە وتەمەيدى نەمەسە تولەم كولەمىن شەكتەيدى.
جاز مەزگىلىندە تاۋەكەل ودان سايىن ارتادى. ويتكەنى بالالار لاگەرلەرگە, سپورتتىق جيىندارعا, ەكسكۋرسيالار مەن جورىقتارعا ءجيى قاتىسادى. وسىنداي كەزدە كۇتپەگەن جاعدايلار دا جيىلەي تۇسەدى.
كوپ اتا-انا لاگەر ۇيىمداستىرۋشىلارى بارلىق جاۋاپكەرشىلىكتى ءوز موينىنا الادى دەپ ەسەپتەيدى. بىراق تاجىريبەدە ۇجىمدىق ساقتاندىرۋدىڭ قامتۋ اياسى شەكتەۋلى بولۋى مۇمكىن. كەيدە ساقتاندىرۋ تەك لاگەر اۋماعىندا عانا جارامدى بولىپ, جولداعى نەمەسە كوشپەلى ءىس-شارالارداعى جاعدايلاردى قامتىمايدى.
جازعى دەمالىس كەزىندە بالالار قاۋىپسىزدىگى قالاي قورعالادى؟
ساراپشىلار اتا-انالارعا ساقتاندىرۋ شارتتارىن مۇقيات وقىپ شىعۋعا كەڭەس بەرەدى. اسىرەسە سپورتتىق جارىستار, بەلسەندى دەمالىس جانە ساپارلارعا قاتىستى تارماقتارعا نازار اۋدارۋ ماڭىزدى.