مەسسيدىڭ حەت-تريگى, مباپپە مەن حولاننىڭ ءدۋبلى

ول كەزدەن بەرى كوپ نارسە وزگەردى. شيرەك عاسىرعا جۋىق ۋاقىت يىنىندە فرانتسيا قۇراماسى ورلەۋ كەزەڭىن باستان كەشىردى. ايتالىق, 2018 جىلى ەكىنشى رەت الەم چەمپيونى اتانسا, 2006, 2022 جىلدارى كۇمىس مەدالدى مويىندارىندا جارقىراتتى. 2016, 2024 جىلدارى ەۋروپا چەمپيوناتتارىندا ەكىنشى, ءۇشىنشى ورىندى ەنشىلەدى. 2021 جىلى ۋەفا-نىڭ ۇلتتار ليگاسىندا توپ جارىپ, 2024 جىلى پاريج وليمپياداسىندا كۇمىسپەن كۇپتەلدى. ال العاشقى الەم چەمپيوناتىندا شيرەك فينالعا دەيىن جەتىپ, ايدى اسپانعا ءبىر-اق شىعارعان سەنەگال ودان كەيىن تاعى ءۇش مۋنديالدا باق سىنادى. سونىمەن قاتار «ارىستاندار» افريكا ۇلتتار كۋبوگىن ءبىر مارتە ۇتىپ, ءۇش رەت فينالدا وينادى.

يست-راتەرفوردتاعى (اقش) «مەت­لايف-ستەديۋمدا» وتكەن ماتچتا فران­تسيا قۇراماسى ءبىرىنشى تايمدا كوبىرەك شابۋىلداعانىمەن, قاقپاعا بىردە-ءبىر ءدال سوققى جاساي المادى. وزگەلەردى ايتپاعاندا, ماقتاۋلى كيليان مباپپە مەن ۋسمان دەمبەلەنىڭ وزدەرى دە تۇك بىتىرگەن جوق. جۇلدىزداردىڭ ءار قادا­مىن ءجىتى باقىلاعان قارسى جاقتىڭ قورعاۋشىلارى ولارعا ادىم اشتىرمادى. سول سەكىلدى سەنەگالدىڭ دا تالپىنىسى وڭ ناتيجە بەرمەدى. شابۋىل شەبىندەگى ساديو مانە مەن نيكولاس دجەكسون بۇل كەشتە ەركىن ويقاستاي المادى.

ۇزىلىستەن كەيىن ويىن كارتيناسى تۇبەگەيلى وزگەردى. فرانتسۋزدار باتىل­دىراق شابۋىلداي باستادى. 52-مينۋتتا مايكل وليسە سول قاپتالدان ءبىر ويىنشىنى الداپ ءوتىپ, قاقپاعا قاراي دوپتى قاقىراتا تەپتى. ەدۋار مەندي ونى كەرى قايتاردى. كوپ ۇزاماي كيليان مباپپە قاقپاعا ەكى مارتە قاۋىپ ءتوندىردى. العاشقىدا سەنەگالدىڭ كيپەرى سوققىعا توسقاۋىل قويسا, ەكىنشى ەپيزودتا قورعاۋشى ساۋاتتى وينادى. الايدا قايسار مىنەزدى كيليان ءبارىبىر ءوز دەگەنىنە جەتتى. 66-مينۋتتا وليسەنىڭ تاماشا پاسىن گولعا اينالدىردى – 1:0. 82-مينۋتتا الاڭعا ەندى شىققان برەدلي باركولي وڭ قاپتالدان سۋىرىلىپ شىعىپ, نىسانانى ءدال كوزدەدى – 2:0. نەگىزگى ۋاقىتقا تورەشى سەگىز مينۋت قوستى. سول ارالىقتا دوپ تاعى ەكى رەت توردا تۋلادى. 90+5 مينۋتتا يبراگيم مبايە ەسەپ ايىرماشىلىعىن قىسقارتسا, 90+6 مينۋتتا كيليان مباپپە دۋبل اۆتورى اتاندى – 3:1.

ء «ى» توبىنداعى كەلەسى كەزدەسۋ يراك پەن نورۆەگيا قۇرامالارى اراسىندا ءوتتى. سكانديناۆيالىقتاردىڭ ساپىن­دا ەرلينگ حولانن مەن مارتين ەدەگور سىندى ساڭلاقتار بار. بۇل كۇندەرى ءبىرى «مانچەستەر سيتيدە», ەكىنشىسى «ار­­سە­­نال­دا» جاسىنداي جارقىلداپ ءجۇر. ەكەۋى دە الەمدىك دەڭگەيدە مويىندال­عان تۇلعالار. بىراق ءبىرىنشى كەزەكتە فۋتبولدىڭ كوماندالىق ويىن ەكەنىن دە ەستەن شىعارماعان ءجون. ايقاس الاڭىنداعى بارلىق ويىنشىعا ۇلكەن جاۋاپكەرشىلىك جۇكتەلەدى. ەگەر دە ءبىر پوزيتسيادان اقاۋ شىقسا نەمەسە ءبىر فۋتبولشى وسالدىق تانىتسا, ونىڭ اقىرى ورنى تولماس وكىنىشكە اكەپ سوقتىرۋى مۇمكىن. سول تۇرعىدا «نورۆەگيا ساپىنداعى ويىنشىلاردىڭ بارلىعى دا مىقتى» دەپ ايتۋدان اۋلاقپىز.

دەسەك تە بۇل ماتچتا نورۆەگيالىقتار اۋتسايدەرلەردى وڭدىرماي ۇتتى. 29, 43-مينۋتتاردا ەرلينگ حولانن, 76-مينۋتتا لەو ەستيگور مەرگەندىك تانىتتى. تورەشى بەلگىلەگەن قوسىمشا ۋاقىتتا ايمەن حۋسسەين ءوز قاقپاسىنا گول سالدى. ونىڭ الدىندا عانا وسى شابۋىلشى قارسىلاستار قاقپاسىن ءدال كوزدەگەن ەدى. ەسەپ – 4:1.   

تاڭ اتا سوڭعى الەم چەمپيوناتىندا قارسىلاس شاق كەلتىرمەي, باس جۇلدەنى ولجالاعان ارگەنتينا فۋتبولشىلارى جاسىل الاڭعا شىقتى. وسىدان ءتورت جىل بۇرىن قاتاردا وتكەن دودانىڭ العاشقى اينالىمىندا ارگەنتينالىقتاردىڭ ساۋد ارابياسىنان جەڭىلگەنىن جانكۇيەرلەر ۇمىتا قويعان جوق. ەسەسىنە ودان كەيىنگى ويىنداردا ولار بارلىق باسەكەلەسىنەن باسىم ءتۇسىپ, فيفا-نىڭ التىن كۋبوگىن وڭتۇستىك امەريكاعا اكەتتى. بيىلعى دودادا «J» توبىنا تۇسكەن ليونەل سكالونيدىڭ شاكىرتتەرى العاشقى ويىنىن الجيرگە قارسى وتكىزدى.

كانزاس-سيتيدەگى (اقش) 76 416 كورەرمەن سىياتىن «ەرروۋحەد ستەديۋمدە» وتكەن ايقاس ليونەل مەسسيدىڭ بەنەفيسى بولدى. ۇلتتىق قۇراما ساپىندا 200 رەت جاسىل الاڭعا شىققان «اتومدى بۇرگەنىڭ» (مەسسيدىڭ ءبىر لاقاپ اتى) ەسىمى دۇنيەجۇزىلىك دوپ دوداسىنا التى رەت قاتىسقان تۇڭعىش فۋتبولشى رەتىندە تاريحتا قالدى. ءدال وسىنداي مەرەيلى كۇنى ول جاسىنداي جارقىلدادى. 24 شىل­دە­دە 39 جاسقا تولعالى وتىرعان ار­گەن­تينانىڭ ءدۇلد ۇلى داڭقتى زينەدين زيداننىڭ ۇلى – ليۋكا قورعاعان قاقپانى ءۇش مارتە ءدال كوزدەپ, حەت-تريك جاسادى – 3:0. ءسويتىپ, مەسسي الەم چەمپيوناتتارى تاريحىنداعى ەڭ مەرگەن ويىنشىلاردىڭ سايىسىندا نەمىس ميروسلاۆ كلوزەنى قۋىپ جەتتى. ەكى جۇلدىزدىڭ ارقايسىسىنىڭ ەنشىسىندە 16 گولدان بار. باسەكە بارىسىندا الجير دە ءبىر دوپ سوققان ەدى. بىراق گول وفسايد انىقتالىپ, ەسەپكە الىنبادى.

وسى «J» توبىنداعى كەلەسى ماتچ­تا دا ءىرى ەسەپ تىركەلدى. بۇل باسەكەدە اۋستريا يوردانيانى 3:1 ەسەبىمەن ۇتتى. 21-مينۋتتا رومانو شميد ەسەپ اشسا, 50-مينۋتتا ءالي ولۆان تارازى باسىن تەڭەستىردى. الايدا بۇل ناتيجەگە قانا­عات­تانباعان ەۋروپالىقتار تولاسسىز شابۋىل ۇيىمداستىرىپ, ونىڭ اقىرى يازان ءالارابتىڭ اۆتوگولى, ماركو ءارناۋتوۆيچتىڭ 11 مەترلىك نۇكتەدەن گول سوعۋىمەن اياقتالدى.