ءماجىلىس دەپۋتاتى مۇرات ابەنوۆ بلوگەر ساۋلە بازارحاننىڭ ولىمىنە بايلانىستى دەنساۋلىق ساقتاۋ مينيسترلىگى كوسمەتولوگيالىق مەكەمەلەردى قاتاڭ تەكسەرۋ كەرەك ەكەنىن مالىمدەدى, دەپ حابارلايدى Egemen.kz.
دەپۋتاتتىڭ ايتۋىنشا, بۇعان دەيىن تەكسەرۋ جۇرگىزۋگە كاسىپكەرلىك كودەكستىڭ نورمالارى كەدەرگى بولعان.
«كەيبىر وليگارحتار مەديتسينالىق قىزمەتپەن اينالىسىپ, ءتۇرلى زەرتحانالار اشتى. ارينە, ولارعا تەكسەرىستىڭ بولعانى ءتيىمسىز. بىراق 2025 جىلى ءبىز بۇل ۇيىمداردى تەكسەرۋ قۇقىعىن قايتاردىق. بىزدە جاڭا تۋعان نارەستە قايتىس بولعان جاعداي بولدى, الايدا تەكسەرۋ جۇرگىزە المادىق», دەدى دەپۋتات.
ول كوسمەتولوگيالىق كلينيكالاردا تەحنيكالىق جانە سانيتارلىق سەرتيفيكاتتاردىڭ, سونداي-اق قولدانىلاتىن بارلىق پرەپاراتتارعا سەرتيفيكاتتاردىڭ بولۋى ماڭىزدى ەكەنىن اتاپ ءوتتى.
مۇرات ابەنوۆ كوسمەتولوگيالىق پروتسەدۋرالاردا قولدانىلاتىن پرەپاراتتاردىڭ قۇرامىنا بايلانىستى قاۋىپتەرگە دە نازار اۋداردى. ونىڭ ايتۋىنشا, مۇنداي زاتتار انافيلاكسيالىق شوك تۋدىرۋى مۇمكىن.
ايتا كەتەيىك, بۇعان دەيىن دەنساۋلىق ساقتاۋ مينيسترلىگى بلوگەر ساۋلە بازارحاننىڭ ولىمىنە قاتىستى تەكسەرۋ جۇرگىزەتىنى تۋرالى حابارلاعان بولاتىنبىز.
ەسكە سالا كەتەيىك, بەلگىلى كاسىپكەر ءارى بلوگەر ساۋلە بازارحان پلاستيكالىق حيرۋرگيا كلينيكاسىندا كوز جۇمدى. مارقۇمنىڭ قىزىنىڭ سوزىنشە, دارىگەرلەر وتا ەڭ كوبى ءبىر جارىم ساعاتقا سوزىلادى دەپ سەندىرگەن. الايدا بىرنەشە ساعات بويى تۋىستارىنا ەشقانداي اقپارات بەرىلمەگەن.