ەلوردادا حالىقارالىق بالالاردى قورعاۋ كۇنىنە ارنالعان اۋقىمدى مەرەكەلىك باعدارلاما ازىرلەندى. 1 ماۋسىم قارساڭىندا جانە مەرەكە كۇندەرى استانادا 100-گە جۋىق مادەني, سپورتتىق, تانىمدىق ءارى وتباسىلىق ءىس-شارا ۇيىمداستىرىلادى. باعدارلاما ءتۇرلى جاس ساناتىنداعى بالالار مەن جاسوسپىرىمدەردىڭ قىزىعۋشىلىعىنا قاراي 6 باعىتقا بولىنگەن, دەپ حابارلايدى Egemen.kz.
استانا قالاسى اكىمدىگىنىڭ مالىمەتىنشە, العاشقى «بەسىك الەمى» بلوگى ءۇش جاسقا دەيىنگى بۇلدىرشىندەرگە ارنالعان. 1 ماۋسىم كۇنى جاستار ساياباعىندا ءداستۇرلى «اربا FEST» اربالار شەرۋى وتەدى. پرەزيدەنت ساياباعىندا ەڭبەكتەيتىن سابيلەر اراسىندا «شاپشاڭ بوبەك» جارىسى ۇيىمداستىرىلادى. سونىمەن قاتار قالا ساياباقتارىندا وتباسىلىق فوتوايماقتار مەن دامىتۋشى ويىن الاڭدارى اشىلادى.
3-6 جاس ارالىعىنداعى بالالارعا ارنالعان «بالاپان الەمى» بلوگى اياسىندا بۇلدىرشىندەرگە سۋداعى, كوشەدەگى جانە ينتەرنەتتەگى قاۋىپسىزدىك ەرەجەلەرى ويىن فورماتىندا تۇسىندىرىلەدى.
1 ماۋسىم كۇنى ەلوردادا III حالىقارالىق كلوۋندار فەستيۆالى وتەدى. ساعات 12:00-دە فەستيۆال قاتىسۋشىلارى «بايتەرەك» مونۋمەنتىنەن عاشىقتار ساياباعىنا دەيىن شەرۋ جاسايدى. ال كەشكى ساعات 17:00-دە امفيتەاتردا مەرەكەلىك كونتسەرت ۇيىمداستىرىلادى.
سول كۇنى ساعات 10:00-18:00 ارالىعىندا قالالىق ەمحانالاردا بالالارعا ارنالعان ستوماتولوگيالىق اشىق ەسىك كۇنى وتەدى.
7-10 جاس ارالىعىنداعى بالالارعا ارنالعان ء«بىلىم مەن ارمان الەمى» بلوگى شەڭبەرىندە ءتۇرلى شىعارماشىلىق جانە سپورتتىق شارالار جوسپارلانعان. 30 مامىر كۇنى جەرۇيىق-2 ساياباعىندا ەرەكشە بالالارعا ارنالعان «باقىتتى بالا» مەرەكەسى وتەدى.
1 ماۋسىم كۇنى كىرپىشتى جانە ءوندىرىس الاپتارىندا «كوڭىلدى ستارتتار» سايىستارى ۇيىمداستىرىلادى. «حان شاتىر» ورتالىعىندا بالالار ءسان كورسەتىلىمى وتسە, №64 مەكتەپ-ليتسەيىندە «الەم بالالار كوزىمەن» شىعارماشىلىق بايقاۋى ۇيىمداستىرىلادى.
تەحنيكالىق جانە كوركەم شىعارماشىلىق ورتالىعىندا بالالار جۇمىستارىنىڭ كورمەسى مەن شەبەرلىك ساباقتارى وتەدى. قالالىق الاڭدا كونتسەرتتىك باعدارلاما ۇسىنىلادى.
ءساندى كەشتىڭ ورنىنا يگى ءىس: الماتىلىق تۇلەكتەر بالالار ءۇيى مەن كوپبالالى وتباسىعا تەلەديدار سىيلادى
11-14 جاس ارالىعىنداعى جەتكىنشەكتەرگە ارنالعان «جاس وركەن» بلوگىندا قاۋىپسىزدىك, سپورت جانە ەكولوگيالىق باعىتتاعى ءىس-شارالار قامتىلعان. 29 مامىر كۇنى ەسىل جاعالاۋىنداعى امفيتەاتردا «جاسىل ەل» ەڭبەك ماۋسىمىنىڭ اشىلۋى وتەدى.
سونداي-اق «Bala energy» open-air فەستيۆالى, «Ethno Games ارقاLan» ۇلتتىق سپورت ويىندارى فەستيۆالى جانە كينولوگيالىق ورتالىققا ەكسكۋرسيالار ۇيىمداستىرىلادى.
جاسوسپىرىمدەرگە ارنالعان «بولاشاققا قادام» بلوگى اياسىندا 1 ماۋسىم كۇنى حالىقارالىق «Astana FIDA Drone Soccer Championship» درون-فۋتبول چەمپيوناتى وتەدى. امفيتەاتر ساحناسىندا «QosymshaFest» فەستيۆالى ۇيىمداستىرىلسا, قالالىق الاڭدا وپەرا جانە بالەت تەاترىمەن بىرلەسكەن ء«تۇرلى-ءتۇستى موزايكا» بايقاۋى وتەدى.
جازعى دەمالىس كەزىندە بالالار قاۋىپسىزدىگى قالاي قورعالادى؟
ەڭ اۋقىمدى «باقىتتى وتباسى» بلوگى وتباسىلىق قۇندىلىقتاردى دارىپتەۋگە ارنالعان. 28 مامىر كۇنى پاراليمپيادالىق جاتتىعۋ ورتالىعىندا سپورتتىق-ويىن-ساۋىق جارىستارى ۇيىمداستىرىلادى.
29 مامىردا MEGA Silk Way ساۋدا-ويىن-ساۋىق ورتالىعىندا «شەكاراسىز دەنساۋلىق» اكتسياسى وتەدى. ونىڭ اياسىندا تۇرعىندارعا سالاۋاتتى ءومىر سالتى مەن اۋرۋلاردىڭ الدىن الۋ جونىندە اقپارات تاراتىلادى.
30 مامىر كۇنى پرەزيدەنت ساياباعىندا «ەكومامافەست 2026» وتباسىلىق فەستيۆالى ۇيىمداستىرىلادى. ال 30-31 مامىر كۇندەرى «جەتىسۋ» ساياباعىندا «بوپەFair» بالالار فەستيۆالى وتەدى.
1 ماۋسىم كۇنى ورتالىق ساياباقتا وتباسىلىق Kids RUN جارىسى باستالادى. پرەزيدەنت ساياباعىندا جاس وتباسىلارعا ارنالعان سۋرەت سالۋ كۋرسى ۇيىمداستىرىلىپ, Ailand ورتالىعىندا مەرەكەلىك كونتسەرت وتەدى.
سونىمەن قاتار مەرەكە قارساڭىندا ەلورداداعى بىرنەشە اۋلادا جاڭارتىلعان بالالار ويىن جانە سپورت الاڭدارى اشىلادى.
1 ماۋسىمنان باستاپ استانادا مەكتەپ جانىنداعى جازعى لاگەرلەر دە جۇمىسىن باستايدى.
بۇعان دەيىن بالالاردىڭ جازعى دەمالىسى جاڭا تالاپپەن ۇيىمداستىرىلاتىنى تۋرالى جازعانبىز.