ازاماتتاردى قولجەتىمدى باسپانامەن قامتاماسىز ەتۋ مەملەكەتتىڭ نەگىزگى الەۋمەتتىك باسىمدىعىنىڭ ءبىرى بولىپ قالا بەرەدى. الايدا, العا قويعان ماقساتتارعا قول جەتكىزۋ ءۇشىن بۇگىندە ينجەنەرلىك ينفراقۇرىلىمدى قارجىلاندىرۋعا جانە ازاماتتاردىڭ الەۋمەتتىك وسال ساناتتارىن تۇرعىن ۇيمەن قامتاماسىز ەتۋگە بايلانىستى جۇيەلى شەكتەۋلەردى ۋاقتىلى جويۋ ماڭىزدى, دەپ جازادى Egemen.kz.
سەنات دەپۋتاتى بەكبول ورىنباساروۆ جاڭا جۇيەگە كوشۋ وڭىرلەردىڭ ناقتى قاجەتتىلىگى مەن بولىنەتىن قاراجات اراسىنداعى ايتارلىقتاي الشاقتىقتى كورسەتەتىنىن ايتادى.
«ناقتى قاجەتتىلىك 184 ملرد تەڭگەنى قۇراسا, بيىل نەبارى 26,6 ملرد تەڭگەنى قۇراپ وتىر. بۇل تەرەڭ الشاقتىق قۇرىلىس جۇرگىزىلەتىن جاڭا الاڭداردى دايىنداۋدى ايتارلىقتاي تەجەيدى جانە تۇرعىن ءۇي مەن ينفراقۇرىلىمدىق نىسانداردى ىسكە قوسۋدىڭ جوسپارلى كورسەتكىشتەرىنىڭ بۇزىلۋ قاۋپى قالىپتاسادى», دەپ اتاپ ءوتتى بەكبول ورىنباساروۆ.
دەپۋتاتتىڭ پىكىرىنشە, قازىرگى جاعدايدا ينجەنەرلىك-كوممۋنيكاتسيالىق ينفراقۇرىلىمدى قارجىلاندىرۋ تاسىلدەرىن قايتا قاراۋ تالاپ ەتىلەدى, ويتكەنى قۇرىلىس الاڭدارىن ۋاقتىلى دايىنداۋ تۇرعىن ءۇي قۇرىلىسىنىڭ قارقىنىنا جانە جوبالاردى ىسكە اسىرۋ قۇنىنا تىكەلەي اسەر ەتەدى.
بيىل 650 كوپپاتەرلى تۇرعىن ۇيگە جوندەۋ جۇمىستارى جۇرگىزىلەدى
«قۇرىلىس سەكتورىن قارجىلاندىرۋ تاسىلدەرىن وزگەرتپەي جانە ينفراقۇرىلىمدىق تاپشىلىقتى جويماي, ۇزاق مەرزىمدى پەرسپەكتيۆادا ازاماتتاردى باسپانامەن قامتاماسىز ەتۋ بويىنشا مەملەكەتتىڭ ستراتەگيالىق مىندەتتەرىن ورىنداۋ مۇمكىن بولمايدى», دەپ اتاپ ءوتتى دەپۋتات.
سەناتوردىڭ پىكىرىنشە, ازاماتتاردىڭ الەۋمەتتىك وسال ساناتتارىن تۇرعىن ۇيمەن قامتاماسىز ەتۋ, سونداي-اق جالعا بەرىلەتىن تۇرعىن ءۇي قۇرىلىسىنىڭ كولەمىن ۇلعايتۋ ءۇشىن قوسىمشا قارجى تەتىكتەرىن ىزدەۋ ماسەلەسى ەرەكشە نازار اۋدارۋدى تالاپ ەتەدى.
استانادا زاڭسىز سالىنىپ جاتقان كوپقاباتتى تۇرعىن ءۇي قۇرىلىسى توقتاتىلدى