بيىل تاۋەلسىز مەملەكەتتەر دوستاستىعى اۋماعىندا ارداگەرلەر جىلى بولىپ جاريالاندى. وسىعان وراي ەلىمىزدە رەسپۋبليكالىق ارداگەرلەر كەڭەسى مەن «سامۇرىق-قازىنا» ۇلتتىق ءال-اۋقات قورى اراسىندا قۇرىلعان ءوزارا ىنتىماقتاستىق مەموراندۋمىنا سايكەس, «ءومىر جەلىسى» اكتسياسىن جۇزەگە اسىرۋ قولعا الىندى. اكتسيانىڭ باستى ماقساتى – ۇلى وتان سوعىسىنا قاتىسۋشىلاردى «دابىل نۇكتەسى» بار ۇيالى تەلەفونمەن قامتاماسىز ەتۋ.
وسىعان وراي وبلىستىق «ارداگەرلەر ۇيىندە» ۇلى وتان سوعىسىنا قاتىسقان مايدانگەرلەرمەن كەزدەسۋ ءوتتى. الدىمەن ءسوز العان «ەۋرازيالىق مەديا-فورۋم» حالىقارالىق قورىنىڭ وكىلى ولگا ساۆەلەۆا جەڭىستى جاقىنداتقان قارت جاۋىنگەرلەردى الداعى كەلە جاتقان مەرەيلى مەرەكەلەرىمەن قۇتتىقتاپ, «سىزدەر بارلىق قۇرمەتكە لايىقسىزدار, امان بولىڭىزدار» دەپ تىلەك تىلەدى.
«ءومىر جولى» قوعامدىق قورىنىڭ ديرەكتورى ەرنار نۇربەكوۆ ۇيالى تەلەفونعا ۇقسايتىن «دابىل نۇكتەسى» بار اپپاراتتىڭ ءمان-جايىن ءتۇسىندىردى. بۇگىندە مايدانگەرلەر قاتارى سيرەگەن, كوپشىلىگى سىرقات. تەلەفوننىڭ ءبىر جاقسىسى – ونى قۇلاعى اۋىر ەستيتىن, كوزى كورمەي قالعان قارتتار ەركىن پايدالانا بەرەدى. «دابىل نۇكتەسىن» باسسا, وپەراتور شۇعىل كومەك بريگاداسىن اتتاندىرادى. بازادا بۇگىندە جەر باسىپ جۇرگەن 5083 قارت جاۋىنگەردىڭ جاعدايى تۇزىلگەن كارتا بار, بارلىق جايتتار ەسكەرىلگەن.
وبلىستىق ارداگەرلەر كەڭەسىنىڭ توراعاسى جەڭىسبەك ءماۋلەنقۇلوۆ: «ءبىز رەسپۋبليكالىق ارداگەرلەر كەڭەسىنە مالىمەت بەرگەندە وبلىستا 473 مايدانگەر بار ەدى, قازىر 449-ى عانا امان-ساۋ ءجۇر», دەدى.
ارينە, وكىنىشتى. ەكىنشى دۇنيەجۇزىلىك سوعىستى بۇگىندە وزىنشە كەسىپ-ءپىشىپ ارقيلى پىكىر ايتىپ جۇرگەندەر بار. «وتان ءۇشىن وتقا ءتۇس, كۇيمەيسىڭ» دەپ ەر باۋكەڭ ايتقانداي, قاندى قاساپقا تۇسكەن بۇل ارداگەرلەردىڭ ەرلىگى ۇرپاققا ۇلگى. ەرنار نۇربەكوۆ ايتقانداي, «دابىل نۇكتەسى» بۇعان دەيىن الماتى, استانا, قاراعاندى قالالارىندا قولدانىلىپتى. 400 ارداگەرگە كومەك كورسەتىلىپ, 3 مايدانگەردى اجال اۋزىنان امان الىپ قالعان. رەسپۋبليكالىق كومەك ورتالىعى «قازتەلەكوم» بازاسىندا جۇمىس جاسايدى. بۇعان قوسىمشا, «بيلاين» بايلانىس وپەراتورى ارنايى تاريف جۇكتەلگەن نومىرلەرمەن قامتاماسىز ەتىپتى.
اكتسيادا ۇوس ارداگەرى ايتجان بەكنازاروۆ ءسوز الىپ: «مىناۋ جاقسى ەكەن. قىزمەتى كەرەك بولسا, دابىل تۇيمەسىن باساسىڭ. ءبىزدىڭ دەنساۋلىعىمىزدى قاداعالاپ وتىرعان ەلباسىمىزعا, ۇكىمەتكە راحمەت», دەدى.
باقتيار تايجان,
«ەگەمەن قازاقستان».
شىمكەنت.