ارشاتىنى كورمەي, التايدى كوردىم دەۋ, بەكەر شىعار. تابيعاتتىڭ تۇمساسى سول جاقتا. بەرەكەلى اۋىلدىڭ كوشەلەرى دە جيناقى, تۇرعىندارى تياناقتى. قانداي دا ماسەلە بولسا, اۋىلدىڭ قورىنان قارجى شىعارىپ, ىڭعايىن تابادى. مۇنداعى جالعىز ماسەلە, مەكتەپتەگى بالانىڭ ازايىپ بارا جاتقاندىعى. قالاي دەسەك تە, كوش توقتاعان جوق. تۇرعىندار مەكتەپ جابىلىپ قالماسا ەكەن دەپ الاڭدايدى.
«اۋىلىمىزدا كەزىندە حالىق كوپ ەدى. بۇرىن تاڭەرتەڭ مەكتەپكە شىققان بالالار كوشەگە سىيمايتىن. اناۋ ۇيدەن ون بالا شىقسا, مىناۋ ۇيدەن ءتورت بالا مەكتەپكە شىعاتىن», دەيدى ءاسيپا اجە جان-جاعىنداعى بوس تۇرعان ۇيلەردى نۇسقاپ.
بۇگىندە ارشاتى ورتا مەكتەبىندە 32 وقۋشى ءبىلىم الىپ, 20 پەداگوگ ەڭبەك ەتەدى. ۇستازداردىڭ باسىم بولىگى – جوعارى ءبىلىمدى ماماندار. ءبىلىم ساپاسى 74 پايىزدى قۇراپ, اۋدان مەكتەپتەرىمەن سالىستىرعاندا جاقسى كورسەتكىشكە يە. بيىل مەكتەپتى 4 تۇلەك اياقتاسا, كەلەر جىلى بار بولعانى 28 وقۋشى عانا قالادى. ءبىرىنشى سىنىپقا قابىلداناتىن بالا جوق. بۇل دەگەنىمىز, اۋىلداعى جاس وتباسىلار سانىنىڭ ازدىعىمەن بايلانىستى. دەگەنمەن, مەكتەپكە جاس ماماندار كەلىپ جاتىر. بيىل قاتارعا دينارا شايماردانوۆا مەن نازىكەش تۇركىستانوۆا سىندى جاستار قوسىلدى. ولاردىڭ ءبىرى ينفورماتيكا, ماتەماتيكا پاندەرىنەن ساباق بەرسە, ەكىنشىسى, پەداگوگ-ۇيىمداستىرۋشى قىز-مەتىن اتقارادى.
ايتا كەتەرلىگى, مەكتەپتىڭ ماتەريالدىق-تەحنيكالىق بازاسىن جاقسارتۋ باعىتىندا جۇمىس جۇرگىزىلىپ جاتقان كورىنەدى. مەكتەپ ۇجىمىنىڭ ايتۋىنشا, 1972 جىلى سالىنعان عيماراتقا كۇردەلى جوندەۋ قاجەت. قازىرگى تاڭدا جىلۋ باتارەيالارى مەن تەرەزەلەر اۋىستىرىلعان. ال ەلەكتر جەلىلەرىن جاڭارتۋ ۇلكەن ماسەلە بولىپ تۇر.
ايتقانداي, اۋىل تۇلەكتەرى مەكتەپكە دەمەۋشىلىك جاساپ, قورشاۋى جاڭارتىلدى, مەكتەپكە سۋ تارتىلعان. الداعى ۋاقىتتا سپورتزالعا دا سۋ كىرگىزۋ جوسپارلانىپ وتىر.
مەكتەپ مۇعالىمدەرىنىڭ ايتۋىنشا, ءبىلىم ورداسىنداعى شاعىن ورتالىقتا 7 بالا تاربيەلەنىپ جاتىر. وقۋشىلار بولسا, وبلىستىق, اۋداندىق وليمپيادالار مەن عىلىمي جوبالارعا قاتىسىپ, جۇلدەلى ورىندار يەلەنىپ ءجۇر. بۇل – ۇستازدار ەڭبەگىنىڭ جەمىسى.
ءبىلىم ورداسىنىڭ باسشىسى – جانەركە قۇرمەتجانوۆا. 20 جىلدىق ەڭبەك ءوتىلى بار تاجىريبەلى پەداگوگ رەتىندە ۇجىمدى العا جەتەلەپ وتىر. وسىنداعى جاس مامانداردىڭ ءبىرى – تاريح ءپانىنىڭ مۇعالىمى اقجول مەيىربەك ۇلى. ول ارشاتىدا تۋىپ-ءوسىپ, جوعارى ءبىلىم العان سوڭ, تۋعان اۋىلىنا ورالعان. ونىڭ ايتۋىنشا, مۇعالىم بولۋ – بالا كۇنگى ارمانى. قازىرگى تاڭدا 6–10 سىنىپتارعا ساباق بەرىپ, وقۋشىلارىن ءتۇرلى ءبىلىم بايگەسىنە دايارلاپ ءجۇر.
«ارمانىم – وسى مەكتەپتىڭ دامۋىنا ۇلەس قوسۋ, تۋعان اۋىلىمدا ەڭبەك ەتۋ. جاستارعا دا ايتارىم, اۋىلدا قالىپ, تۋعان جەردى كوركەيتۋگە اتسالىسايىق», دەيدى جاس ۇستاز اقجول مەيىربەك ۇلى.
بۇگىندە ارشاتى مەكتەبىنىڭ الدىندا ۇلكەن مىندەت تۇر. ياعني وقۋشى سانىن ارتتىرۋ, اۋىلعا جاڭا وتباسىلاردى تارتۋ. وسى باعىتتا اۋىلدىق وكرۋگ اكىمى كوشى-قون جارمەڭكەلەرىنە قاتىسىپ, جۇيەلى جۇمىس جۇرگىزىپ جاتقان كورىنەدى. ناتيجەسى ۋاقىت ەنشىسىندە. ارشاتىداي ارشالى مەكەن يەن قالماۋعا ءتيىس.
شىعىس قازاقستان وبلىسى,
كاتونقاراعاي اۋدانى