الماتىلىقتار ءۇشىن التىن ۋاقىتتى ۇنەمدەپ, جولدى قىسقارتىپ, كولىك كەپتەلىستەرىن ازايتىپ, اۋانى تازارتۋدا سەپتىگى ولشەۋسىز مەتروپوليتەن قۇرىلىسىندا ماڭىزدى وقيعالار ورىن الۋدا. مەگاپوليستە مەترونىڭ «ماسكەۋ» جانە «سايران» بەكەتتەرىندە بارلىق جۇيەلەردى بايقاپ كورۋ جانە تەكسەرۋ جۇمىستارى اياقتالىپ قالدى. ال جاڭا مەترو ستانسالارى جولاۋشىلار سانىن ەكى ەسە ارتتىرادى دەپ كۇتىلۋدە.
بۇعان دەيىن دە الماتى اكىمى مەتروپوليتەننىڭ ەكىنشى كەزەگىن بەلگىلەنگەن مەرزىمىنەن بۇرىن اياقتاۋدى تاپسىرعان بولاتىن. الايدا, ناقتى سەبەپتەرمەن وتكەن جىلدىڭ جەلتوقسانىندا جولاۋشىلار تاسىمالداۋدى باستايدى دەگەن جوسپار كەيىنگە شەگەرىلدى. بىراق, ەڭ باستىسى قاۋىپسىزدىك پەن ساپا ەكەنى ايان.
وسىعان وراي, الماتى اكىمى احمەتجان ەسىموۆ مەتروپوليتەننىڭ «ماسكەۋ» جانە «سايران» اتتى ەكى جاڭا بەكەتتەرىنە ينسپەكتورلىق تەكسەرۋ جۇرگىزىپ, ولاردى پايدالانۋعا بەرۋ دايىندىعىنىڭ جوعارى دەڭگەيدە ەكەندىگىن اتاپ ءوتتى. قازىرگى كەزدە بارلىق تەستىلىك تەكسەرۋلەر مەن وزگە دە ساراپتامالىق جۇمىستار اياقتالىپ قالدى, قىزمەتكەرلەر شتاتى انىقتالعان.
مەگاپوليس باسشىسى جولاۋشىلاردىڭ قاۋىپسىزدىك ماسەلەسىنە ايرىقشا نازار اۋدارىپ, جاڭا بەكەتتەردىڭ بارلىق جۇيەلەرىن تاعى دا ءبىر رەت ءجىتى تەكسەرىپ شىعۋدى تاپسىردى. نەگىزىنەن, بارلىق توراپتار مەن اگرەگاتتاردى قايتا ساراپتاۋدان وتكىزىپ, قوسۋ, جىبەرۋ مەن رەتتەۋ جۇمىستارىنىڭ ءناتيجەسىن باقىلاۋ قاجەت ەكەندىگىن ايتتى.
«ماسكەۋ» جانە «سايران» بەكەتتەرىنىڭ بەرىكتىگى ويداعىداي. مەترو – سپەتسيفيكالىق كولىك, سوندىقتان مۇندا ءبىرىنشى كەزەكتە جولاۋشىلاردىڭ قاۋىپسىزدىگىن قامتاماسىز ەتكەن ءجون», دەپ اتاپ ءوتتى احمەتجان ەسىموۆ.
مەگاپوليس باسشىسى, جاڭادان سالىنعان «سايران» جانە «ماسكەۋ» بەكەتتەرى ىسكە قوسىلسا, مامانداردىڭ بولجامى بويىنشا جولاۋشىلار قاتارى ەكى ەسەگە ارتاتىنىن جەتكىزدى. پايدالانۋعا بەرىلگەنىنە از عانا ۋاقىت بولعانىنا قاراماستان زاماناۋي جانە ەكولوگيالىق قاۋىپسىز كولىك قالا تۇرعىندارى مەن قوناقتارىنىڭ كوڭىلىنەن شىعىپ, ەش ءۇزىلىسسىز قىزمەت كورسەتۋدە. مىسالى, ەگەر العاشقى كەزدەرى مەترونى تاۋلىگىنە 13-14 مىڭ ادام پايدالانسا, قازىر ولاردىڭ سانى 24 مىڭعا جەتىپ وتىر. وتكەن جىلدىڭ اياعىندا تاسىمالدانعان جولاۋشىلار سانى 20 ملن. ادام بولعان.
قازىرگى كەزدە جەراستى كولىگىنىڭ ۇزىندىعى 8,56 شاقىرىم, «سايران» جانە «ءماسكەۋ» بەكەتتەرى ىسكە قوسىلسا, ونىڭ ۇزىندىعى تاعى دا 2,74 شاقىرىمعا ۇزاراتىن بولادى. جەراستى كولىگى تارماعىن اباي داڭعىلىنان باتىس باعىتقا مومىش ۇلى كوشەسىنە قاراي تارتۋ مەتروپوليتەننىڭ ءبىرىنشى جەلىسىنىڭ ەكىنشى كەزەگىنىڭ قۇرىلىسىن باستاعان كەزدە جۇزەگە اسادى, ونىڭ قۇرامىندا «Family Park» اۋماعىنا ەنەتىن «سارىارقا» بەكەتى مەن اباي داڭعىلى بويىمەن مومىش ۇلى كوشەسىنىڭ باتىسىن قامتيتىن «دوستىق» بەكەتى بولادى.
قازىرگى تاڭدا مەگاپوليس قالا ءۇشىن مەترونى قالانىڭ باتىس بولىگىنە, شەت اۋداندارىنا قۇلاش جايعىزۋ ەڭ كوكەيكەستى ماسەلەلەردىڭ قاتارىندا, ويتكەنى, مەترو ستانسالارىن ۇزارتۋدىڭ وزىمەن قوسا كوپتەگەن وزەكتى ءجايتتەردى رەتتەۋگە تيگىزەتىن كومەگى ولشەۋسىز.
ايناش ەسالي,
«ەگەمەن قازاقستان».
الماتى.
سۋرەتتەردى تۇسىرگەن
داۋرەن يساەۆ.