پرەزيدەنت قاسىم-جومارت توقاەۆ NVIDIA كومپانياسىنىڭ جاھاندىق جاساندى ينتەللەكت ينفراقۇرىلىمىن دامىتۋ جونىندەگى ۆيتسە-پرەزيدەنتى نيكولو مارتين كاپرەزبەن, سونداي-اق Firebird AI كومپانياسىنىڭ نەگىزىن قالاۋشىلار رازميگ بەرگ وۆاكيميانمەن جانە الەكساندر ەسايانمەن كەزدەستى, دەپ حابارلايدى Egemen.kz.
اڭگىمەلەسۋ بارىسىندا جي-ينفراقۇرىلىمىن جوبالاۋ, سالۋ جانە پايدالانۋ باعىتىنداعى سەرىكتەستىك پەرسپەكتيۆاسى تالقىلاندى.
مەملەكەت باسشىسى قازاقستان الداعى ءۇش جىلدا تولىق تسيفرلىق ەلگە اينالۋدى كوزدەپ وتىرعانىن جەتكىزدى.
پرەزيدەنتتىڭ ايتۋىنشا, NVIDIA تەحنولوگياسى نەگىزىندە سۋپەركومپيۋتەر كلاستەرلەرىن ىسكە قوسۋ اتالعان ماقساتقا جەتۋ جانە ەلدىڭ تەحنولوگيالىق دەربەستىگىن نىعايتۋ ىسىندەگى ماڭىزدى قادام بولدى.
پرەزيدەنت چەحيا پرەمەر-ءمينيسترىن ءى دارەجەلى «دوستىق» وردەنىمەن ماراپاتتادى
قاسىم-جومارت توقاەۆ ەكىباستۇز قالاسىندا دەرەكتەردى وڭدەۋ ورتالىعى القابىن قۇرۋ بويىنشا ستراتەگيالىق جوبا قولعا الىنعانىنا توقتالدى. وندا ەسەپتەۋ ينفراقۇرىلىمىن دامىتقىسى كەلەتىن ينۆەستورلارعا قولجەتىمدى ەلەكتر ەنەرگياسى, تەلەكوممۋنيكاتسيا جەلىسى جانە سالىق جەڭىلدىكتەرى قاراستىرىلادى. NVIDIA جانە Firebird AI وكىلدەرى ارمەنيادا وسىعان ۇقساس جوبانى جۇزەگە اسىرىپ جاتقانى جايىندا ايتتى.
كەزدەسۋ سوڭىندا قاسىم-جومارت توقاەۆ پەن كومپانيا وكىلدەرى جي-ەكوجۇيەسىن دامىتۋ باعىتىنداعى بىرلەسكەن باستامانى ىسكە اسىرۋ مۇمكىندىكتەرىن زەردەلەۋگە كەلىستى.