بۇگىن باس پروكۋرور بەرىك اسىلوۆ ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) باس حاتشىسى فەريدۋن سينيرليوعلۋمەن كەزدەسۋ وتكىزىپ, زاڭدىلىق پەن قۇقىقتىق ءتارتىپتى قامتاماسىز ەتۋ باعىتىنداعى ىنتىماقتاستىق ماسەلەلەرىن تالقىلادى, دەپ جازادى Egemen.kz.
سونىمەن قاتار ەسىرتكى قىلمىسىنا قارسى كۇرەسكە ەرەكشە نازار اۋدارىلدى. بۇل رەتتە حالىقارالىق دەڭگەيدە ەسىرتكى بيزنەسىنىڭ قارجى اعىندارىن انىقتاۋ, باقىلاۋ جانە بۇعاتتاۋعا ارنالعان مەملەكەتارالىق تسيفرلىق پلاتفورما قۇرۋ باستاماسى تانىستىرىلدى.
كەزدەسۋدە پروكۋراتۋرا ورگاندارى مەن ەقىۇ اراسىنداعى مەملەكەتكە زاڭسىز شىعارىلعان اكتيۆتەردى قايتارۋ سالاسىنداعى ءوزارا ءىس-قيمىل دا ءسوز بولدى. حالىقارالىق ۇيىمنىڭ قازاقستانعا وسى باعىتتا كورسەتىپ وتىرعان قولداۋى جوعارى باعالاندى.
تاراپتار قۇقىق قورعاۋ ورگاندارى اكادەمياسى الاڭىندا ەقىۇ قاتىسۋىمەن جۇزەگە اسىرىلىپ جاتقان كادرلاردى دايارلاۋ جانە بىلىكتىلىكتى ارتتىرۋ جۇمىستارىنىڭ ناتيجەلەرىن تالقىلادى. اتاپ ايتقاندا, وقۋ ورنىنىڭ ساراپتامالىق جانە ادىستەمەلىك بازاسىن جاڭعىرتۋ مەن دامىتۋ ماسەلەسىنە نازار اۋدارىلدى.
بەرىك اسىلوۆ, باس پروكۋرور: ازاماتتاردىڭ قۇقىعىن قورعاۋ – باستى نازاردا
مالىمەتكە سايكەس, 2025 جىلى ەقىۇ-مەن بىرلەسىپ 13 عىلىمي-ءبىلىم بەرۋ ءىس-شاراسى ۇيىمداستىرىلدى. بۇل جيىنداردا كيبەرقىلمىس پەن ەسىرتكى قىلمىسىنا قارسى ءىس-قيمىل, ادام ساۋداسىنىڭ الدىن الۋ, سىبايلاس جەمقورلىقپەن كۇرەس, قارجى جىلىستاتۋعا قارسى تەتىكتەر, سونداي-اق مەملەكەت پەن ازاماتتىق قوعام جانە باق اراسىنداعى ءوزارا بايلانىس ماسەلەلەرى قامتىلدى.
وسى جۇمىستار اياسىندا 400-دەن استام قىزمەتكەردىڭ كاسىبي بىلىكتىلىگى ارتتى. ولاردىڭ قاتارىندا پروكۋراتۋرا, پوليتسيا جانە ەكونوميكالىق تەرگەپ-تەكسەرۋ قىزمەتىنىڭ وكىلدەرى بار.
بيىل دا بۇل باعىتتاعى جۇمىس جالعاسادى – ەقىۇ-مەن بىرلەسىپ تاعى 12 ءبىلىم بەرۋ ءىس-شاراسىن وتكىزۋ جوسپارلانعان. ولار ترانسۇلتتىق قىلمىسقا قارسى كۇرەستى كۇشەيتۋگە جانە قۇقىق قولدانۋ تاجىريبەسىن جەتىلدىرۋگە ارنالماق.
كەزدەسۋ سوڭىندا فەريدۋن سينيرليوعلۋ قازاقستان پروكۋراتۋراسىنىڭ زاڭ ۇستەمدىگىن قامتاماسىز ەتۋ جولىنداعى جەتىستىكتەرىن جوعارى باعالاپ, الداعى ۋاقىتتا ىنتىماقتاستىقتى ودان ءارى دامىتۋعا دايىن ەكەنىن جەتكىزدى.
بەرىك اسىلوۆ, باس پروكۋرور: بۇل قۇجات جاڭا ءداۋىردىڭ ىرگەتاسىنا اينالادى