تۇركىستان قالاسىندا وتەتىن تۇركى مەملەكەتتەرى ۇيىمىنىڭ (وتگ) بەيرەسمي ءسامميتى بارىسىندا قاۋىپسىزدىك پەن جەدەل ارەكەت ەتۋ قىزمەتتەرى ءۇشىن جاڭا بۋىن تەحنيكالار پايدالانىلماق. ءىس-شارا كەزىندە ءموبيلدى كوماندالىق جانە جەدەل ارەكەت ەتۋ مىندەتتەرىن اتقارۋ ءۇشىن Tesla Cybertruck بازاسىنداعى كولىكتەر تارتىلادى, دەپ جازادى Egemen.kz.
سامميت اياسىندا قولدانىلاتىن ەكى ەلەكتروپيكاپتىڭ ءبىرى مەملەكەتتىك كۇزەت قىزمەتىنىڭ (مقق) باسقارۋ جانە كۇشتەردى ۇيلەستىرۋ جۇيەسىنە بەرىلسە, ەكىنشىسى توتەنشە جاعدايلار مينيسترلىگىنىڭ (تجم) جەدەل رەزەرۆىندە تۇر.
تۇركى مەملەكەتتەرى ۇيىمى ءسامميتى كەزىندە العاش رەت Tesla Cybertruck ءموبيلدى شتابتىق كولىك رەتىندە قولدانىلادى.
مەملەكەتتىك كۇزەت قىزمەتى بۇل كولىكتى العاش رەت جوعارى دەڭگەيدەگى ءىس-شارالاردا ءموبيلدى كوماندالىق-شتابتىق ماشينا رەتىندە پايدالانىپ وتىر. ونىڭ نەگىزگى مىندەتى – بولىمشەلەردى ۇيلەستىرۋ, تۇراقتى بايلانىس ورناتۋ جانە جاپپاي شارالار كەزىندە جەدەل شەشىم قابىلداۋدى قامتاماسىز ەتۋ.
قاۋىپسىزدىك ورگاندارى ءۇشىن بۇل كولىكتىڭ بىرقاتار ارتىقشىلىقتارى ەرەكشە اتاپ ءوتىلدى. اتاپ ايتقاندا, جوعارى موبيلدىلىك, جول تالعامايتىن مۇمكىندىگى جانە دىبىسسىز قوزعالىسى ونى قالا ىشىندە دە, كۇردەلى تابيعي ايماقتاردا دا ءتيىمدى پايدالانۋعا مۇمكىندىك بەرەدى.
كولىك درونداردى قۋاتتاندىرۋعا, قورعالعان بايلانىس جۇيەلەرىنە, ەسەپتەۋ تەحنيكاسىنا جانە راديوەلەكتروندىق قۇرالدارعا ەنەرگيا جەتكىزۋگە قابىلەتتى.
توتەنشە جاعدايلار مينيسترلىگى ءۇشىن Tesla Cybertruck-ءتىڭ تاعى ءبىر باعىتى – قۇتقارۋ وپەراتسيالارى. ەلەكتروپيكاپ الماتى ماڭىنداعى تاۋلى ايماقتاردا ىزدەستىرۋ-قۇتقارۋ جۇمىستارىندا قولدانىلىپ كەلەدى. بۇل وڭىرلەردە جىل سايىن تۋريستەر مەن الپينيستەردىڭ كوپتەپ كەلۋىنە بايلانىستى جەدەل ارەكەت ەتۋ قاجەتتىلىگى جوعارى.
الماتىدا كوزگە تۇسكەن Tesla كولىگى تجم-گە تيەسىلى مە؟
سامميت كەزىندە كولىك جەدەل رەزەرۆتە تۇرىپ, قاجەت بولعان جاعدايدا ىزدەستىرۋ جانە قۇتقارۋ وپەراتسيالارىنا تارتىلۋى مۇمكىن.
قۇتقارۋ كەشەنى سپۋتنيكتىك ينتەرنەتپەن, جىلۋ كامەراسى بار كاسىبي كۆادروكوپتەرلەرمەن, قورعالعان بايلانىس قۇرالدارىمەن جانە اۆتونومدى قۋات كوزدەرىمەن جابدىقتالعان. بۇل جۇيە توتەنشە جاعداي ايماعىندا قۇتقارۋشىلار مەن مەديتسينا قىزمەتىن جەدەل ۇيلەستىرۋگە مۇمكىندىك بەرەدى.
تجم ءۇشىن ماڭىزدى فاكتور – ەلەكتر پلاتفورماسىنىڭ تابيعي قورىق ايماقتارىندا دا قولدانۋعا قولايلى بولۋى. بۇل ىشتەن جانۋ قوزعالتقىشى بار كولىكتەرگە قويىلاتىن شەكتەۋلەر جاعدايىندا ەكولوگيالىق جۇكتەمەنى ارتتىرماي, موبيلدىلىكتى ساقتاۋعا مۇمكىندىك بەرەدى.
مامانداردىڭ ايتۋىنشا, Tesla Cybertruck سياقتى تەحنولوگيالار مەملەكەتتىك قىزمەتتەردىڭ جۇمىسىندا تسيفرلىق جانە يننوۆاتسيالىق شەشىمدەردىڭ ۇلەسى ارتىپ كەلە جاتقانىن كورسەتەدى.
قاۋىپسىزدىك باعىتىندا مەملەكەتتىك كۇزەت قىزمەتى جەدەل ۇيلەستىرۋ مەن تۇراقتى بايلانىستى كۇشەيتۋگە باسىمدىق بەرسە, تجم كۇردەلى تاۋلى اۋماقتاردا ادامداردىڭ ءومىرىن ساقتاپ قالۋعا ارنالعان جاڭا تەحنولوگيالاردى ەنگىزۋدى جالعاستىرىپ وتىر.
Tesla روبوتتارى قاشان ساتىلىمعا شىعادى؟