جەتىسۋ وڭىرىندە بەرىك جەتپىسباەۆتىڭ جۇلدەسى ءۇشىن جارىس ءوتتى

بۇل كۇندەرى جىگىت اعاسى جاسىنا جەتكەن جەتپىسباەۆتىڭ قانداي قارىمدى بالۋان بولعانىن كوزى قاراقتى جانكۇيەرلەر جاقسى بىلەدى. سپورتتىق مانسابىن قازىرگى جەتىسۋ وبلىسى كەربۇلاق اۋدانىنىڭ قويانكوز اۋىلىندا ءوز كاسىبىنە جان-تانىمەن بەرىلگەن جەرگىلىكتى جاتتىقتىرۋشى باقىت قوقىسبەكوۆتىڭ قول استىندا باستاعان ول توقسانىنشى جىلداردىڭ بەل ورتاسىندا قازاقستاننىڭ بەلدى بالۋاندارىنىڭ بىرىنە اينالدى. سامبوشىلاردىڭ ەلىشىلىك جارىسىندا بەرىككە تەڭ كەلەر ەشكىم تابىلمادى. ول بەس-التى جىلداي 57 جانە 62 كگ سالماق دارەجەلەرىنىڭ تىزگىنىن قولىنا مىقتاپ ۇستادى. «سامبونىڭ اكادەميگى» اتانعان كەرەي قويشىبەكتىڭ ءوزى بۇل جىگىتتىڭ كەلەشەگىنە زور ۇمىتپەن قارادى.

شەتەلدە دە جەتىسۋدىڭ جولبارىسىنا جارىتىپ قارسىلىق كورسەتە العان بالۋاندار سيرەك ەدى. كەيىپكەرىمىز قارسى كەلگەندەرىن الىپ تا, جالىپ تا جىقتى. ەڭ باستىسى, ول قورقۋدى, قايمىعۋدى بىلمەيتىن. جەڭىلىپ جاتسا, جىگەرى جاسىمايتىن. سوڭعى ساتكە دەيىن كۇرەسىپ, تاباندىلىق پەن توزىمدىلىكتىڭ, جەڭىسكە دەگەن جىگەردىڭ ۇلگىسىن كورسەتتى. جەڭىپ جاتسا, وزگەلەر سەكىلدى ۋاقىت سوزىپ ءجۇرىپ المايدى. كەسىرىنشە, اتويلاپ ۇتۋعا تىرىساتىن. مىنە, وسى قاسيەتتەرى ءۇشىن كورەرمەن بەرىكتى ەرەكشە جاقسى كورەتىن. 

استانادا دزيۋدودان Qazaqstan Barysy Grand Slam ءتۋرنيرى وتەدى 

سارىوزەكتىڭ ساڭلاعى دزيۋدونى دا ەركىن مەڭگەردى. الماتىعا كەلىپ, تانىمال باپكەر ماناربەك تاۋتانوۆتىڭ قول استىندا شەبەرلىگىن شىڭدادى. ول كىسىدەن كوپ نارسە ۇيرەندى. كۇرەستىڭ بۇل تۇرىنەن دە ەلەۋلى تابىستارعا قول جەتكىزىپ, سپورت شەبەرى ءنورماتيۆىن ورىندادى. بىراق جاپوندار ويلاپ تاپقان ونەردى شىنداپ قۋمادى. ەگەر وعان مىقتاپ دەن قويعاندا بەرىكتىڭ باعىندىرعان بەلەستەرى بۇدان دا بيىك بولار ەدى. بۇل اسىرە ماقتاۋ ەمەس, شىن ءسوزىمىز. ولاي دەۋگە نەگىز, توقسانىنشى جىلداردىڭ ەكىنشى جارتىسى مەن جاڭا عاسىر تابالدىرىقتان اتتاعان تۇستا دزيۋدو كۇرەسىنىڭ جۇلدىزدارىنا اينالعان جامپوز جىگىتتەردىڭ دەنى ءدال وسى جەتپىسباەۆتان وڭباي جەڭىلگەنىن ءبىزدىڭ دە كوزىمىز كوردى.     

 –  ارينە, دزيۋدودان ودان دا زور تابىستارعا قول جەتكىزۋگە بولار ەدى. وعان كۇش-جىگەرىم دە, قارىم-قابىلەتىم دە جەتەتىن ەدى. بىراق «جوقتىق جومارتتىڭ قولىن بايلايدى» دەمەكشى, توقسانىنشى جىلدارداعى توقىراۋ زامانىندا كەڭىنەن كوسىلۋگە مۇمكىندىك بولمادى. وقۋ-جاتتىعۋ جيىندارىنا قاتىسىپ, جاۋاپتى جارىستاردا باق سىناۋ ءۇشىن اركىمنىڭ الدىنا بارىپ, اقشا سۇراۋعا تۋرا كەلدى. جاسىراتىنى جوق, قولى اشىق, جانى جايساڭ اعالارىمنىڭ قامقورلىعىن كوردىم. ونى جوققا شىعارمايمىن. بىراق ۇنەمى كىشىرەيە بەرۋ قايبىر جاقسىلىق دەيسىز. سوعان قىنجىلدىم. بوزكىلەمنەن قول ۇزگەننەن كەيىن كاسىپكەرلىكپەن اينالىستىم. سول كەزدە ارتىمىزدان ەرگەن ءىنى-قارىنداستارعا قولداۋ كورسەتۋدى وزىمە پارىز سانادىم. مەنىڭ قامقورلىعىمدى كورگەن شاكىرتتەرىمنىڭ الدى الەم چەمپيوناتى, ازيا ويىندارى جانە قۇرلىق بىرىنشىلىكتەرىندە جەڭىس تۇعىرىنا كوتەرىلدى. ءوزىم تەك دەمەۋشى بولىپ قانا قويماي, ولاردىڭ جاتتىعۋ جۇمىستارىنا تىكەلەي ارالاستىم. ۇنەمى جاندارىندا ءجۇردىم. سول ءۇشىن دە قازاقستاننىڭ ەڭبەك سىڭىرگەن جاتتىقتىرۋشىسى اتاعىن الدىم. بىلتىرعى جىلى جەتىسۋ وبلىسى دزيۋدو فەدەراتسياسىنىڭ ۆيتسە-پرەزيدەنتى قىزمەتىنە تاعايىندالدىم. وزىمە جۇكتەلگەن جاۋاپكەرشىلىكتى بارىنشا ابىرويلى اتقارۋعا تىرىسىپ ءجۇرمىن.  ال جەكە ءوزىمنىڭ ومىرلىك ءپرينتسيپىم – قازاقتىڭ دارىندى جاستارىن حالىقارالىق ارەناعا شىعارۋ ءۇشىن بارىنشا كۇش سالۋ, – دەپ بەرىك جەتپىسباەۆ كەڭىنەن كوسىلدى.

«جاستار» سپورت سارايىندا ءتورت تاتامي توسەلدى. ۇيىمداستىرۋ ماسەلەسىندە ءبىر ءمىن جوق. ءبارى جوعارى دەڭگەيدە بولدى. ەكى كۇن بويى رەسپۋبليكامىزدىڭ بىرقاتار وڭىرىنەن كەلگەن جاس ورەندەر ءبىر-بىرىمەن ارپالىسىپ, جەڭىس تۇعىرىندا كىمدەردىڭ مارقايىپ تۇرۋعا لايىق ەكەنىن انىقتادى. ۇلدار اراسىندا شىرايلى شىمكەنتتەن كەلگەن بالۋاندار شاشالارىنا شاڭ جۇقتىرماي, جالپى كوماندالىق ەسەپتە كوش باستادى. قىزداردىڭ سايىسىندا جەتىسۋ ءوڭىرىنىڭ سۇلۋلارى توپ جاردى. اتالعان تۋرنيردە ەسىمدەرى تومەندە اتالعان دزيۋدوشىلار ءوز سالماق دارەجەلەرى بويىنشا توپ جاردى:

ۇلدار:

50 كگ – ءالينۇر جاسۇلان (شىمكەنت), 55 كگ – ەراسىل ەرمەكباي (شىمكەنت), 60 كگ – باتىرحان اسقار ۇلى (الماتى قالاسى), 66 كگ – الديار ايمۇرات (الماتى وبلىسى), 73 كگ – تەمىرحان مۇحتار (شىمكەنت), 81 كگ – بەكزات قوعايبەك (جەتىسۋ), 90 كگ – الديار ايتمۇحان (الماتى وبلىسى) جانە +90 كگ – نۇرقانات قابدىلسامەت (اباي).

دزيۋدوشىلار ازيا چەمپيوناتىندا كۇمىس مەدال جەڭىپ الدى

قىزدار:

0 كگ – سەزىم سەيىتنۇر (جەتىسۋ), 44 كگ – ايىم ايدوسقىزى (جەتىسۋ), 48 كگ – جانبوتا كۇنعازى (اباي), 52 كگ – جانەركە قاناعات (اباي), 57 كگ – مارال ەركىن (جەتىسۋ) ,63 كگ – اجار ەربولقىزى (جەتىسۋ), 70 كگ – مەرۋەرت ءادىلجان (جەتىسۋ) جانە +70 كگ – ايعانىم مارات (جەتىسۋ).