استانا. 27 ناۋرىز. فرانتسيانىڭ تۇستىگىندە 24 ناۋرىزدا اپاتقا ۇشىراعان Germanwings كومپانياسى Airbus A-320 ۇشاعىنىڭ ەكىنشى پيلوتى اندرەاس ليۋبيتس اۋىرعانى تۋرالى قاعازى بولۋىنا بايلانىستى سول كۇنى ۇشۋعا شىعۋعا ءتيىس ەمەس ەكەن. بۇل تۋرالى Lenta.Ry حابارلادى.
Associated Press اگەنتتىگىنىڭ حابارلاۋىنشا, ديۋسسەلدورف قالاسىنىڭ پروكۋرورى رالف حەررەنبريۋك ۇشقىش اندرەاس ءليۋبيتستىڭ پاتەرىنە جۇرگىزىلگەن تەكسەرۋ ناتيجەسىندە ونىڭ 4U9525 رەيسى ۇشاتىن ۋاقىتتا اۋىرعانى تۋرالى قاعاز بويىنشا ۇيىندە بولۋى كەرەك ەكەنى انىقتالعان. پروكۋرور پيلوتتتىڭ وسى انىقتامانى جىرتىپ تاستاعانىن ايتىپ, ونىڭ اۋىرىپ جۇرگەنىن ارىپتەستەرىنەن جاسىرعان بولۋى مۇمكىن ەكەنىن العا تارتادى.
حەررەنبريۋك سونداي-اق پاتەردەن ءليۋبيتستىڭ قوشتاسۋ حاتى دا, ونىڭ الدەقانداي ءبىر ساياسي نەمەسە ءدىني ۇيىمدارعا قاتىسى بارىن دالەلدەيتىن ايعاقتىڭ دا تابىلماعانىن مالىمدەدى.
وسى ارالىقتا نەمىستىڭ Bild تابلويدى اتالعان ۇشقىشتىڭ پسيحياتريالىق اۋرۋدان ەمدەلگەنىن انىقتادى. بۇدان التى جىل بۇرىن ليۋبيتس قاتتى دەپرەسسياعا ۇشىراپ جۇرگەنىنە شاعىنىپ, دارىگەرگە كورىنىپتى. ەمدەلىپ الۋ ءۇشىن ول ۇشقىشتار مەكتەبىندەگى وقۋىنا ءۇزىلىس جاريالاۋعا ءماجبۇر بولعان.
ناۋرىزدىڭ 26-سى كۇنى فرانتسۋزدىڭ مارسەل قالاسىنىڭ پروكۋرورى بريس روبەن اپاتتى زەرتتەۋ بارىسىنىڭ الدىن الا قورىتىندىلارىن حابارلاعان بولاتىن. ونىڭ ايتۋىنشا, اندرەاس ليۋبيتس كومانديرى سالونعا شىعىپ كەتكەن بويدا كابينانى ىشتەن جاۋىپ العان. ال كەيىن ءبىرىنشى پيلوت قايتىپ كەلگەن كەزدە, وعان ەسىكتى اشپاي قويعان. مۇنىڭ ورنىنا لاينەردى تومەن قاراي قۇلدىراتقان. مۇنى بايقاعان ەكيپاج كاپيتانى ەسىكتى بالتامەن بۇزىپ كىرمەكشى بولعان. بىراق اشىپ ۇلگەرە الماعان. وسى ۋاقىتتاعى سەگىز مينۋتتىڭ ىشىندە ۇشاق جارتاسقا بارىپ ۇرىنعان.
قازىر Airbus A-320 ۇشاعى بورتىندا 150 ادامنىڭ بولعانى انىقتالدى. ولاردىڭ 144-ءى جولاۋشى, 6-ى ەكيپاج مۇشەلەرى ەكەن. بارلىعى دا سول قىرعىندا وپات بولدى. قازا تاپقان جولاۋشىلاردىڭ اراسىندا گەرمانيا, يسپانيا, اقش, اۆستراليا, ارگەنتينا, يران, ۆەنەسۋەلا, كولۋمبيا, مەكسيكا, جاپونيا, قازاقستان, يزرايل, دانيا, نيدەرلاندى جانە بەلگيا ەلدەرىنىڭ ازاماتتارى بار.
مۇرات ايتقوجا.
مانبە, سۋرەت: Airbus A-320.