بەيجىڭدە قازاقستاننىڭ قىتايداعى ەلشىسى شاحرات نۇرىشەۆ قحر سۋ شارۋاشىلىعى ءمينيسترىنىڭ ورىنباسارى, ترانسشەكارالىق وزەندەردى پايدالانۋ جانە قورعاۋ جونىندەگى قازاقستان-قىتاي بىرلەسكەن كوميسسياسىنىڭ قىتاي جاعىنان تەڭ توراعاسى تسزياو يۋنمەن كەزدەسۋ وتكىزدى, دەپ حابارلادى ءسىم-ءنىڭ ءباسپاسوز قىزمەتى.
كەزدەسۋ بارىسىندا سۋ رەسۋرستارى سالاسىنداعى ىنتىماقتاستىقتى دامىتۋ جانە قازاقستان رەسپۋبليكاسى مەن قىتاي حالىق رەسپۋبليكاسى اراسىندا ترانسشەكارالىق وزەندەردە سۋ ءبولۋ كەلىسىمى جوباسىنا قاتىستى بىرلەسكەن جۇمىس ماسەلەلەرى بويىنشا ءپىكىر الماسىلدى. تاراپتار ترانسشەكارالىق وزەندەردى پايدالانۋ جانە قورعاۋ جونىندەگى قازاقستان-قىتاي بىرلەسكەن كوميسسياسىنىڭ جۇمىسىنا وڭ باعا بەردى. 2003-2015 جىلدارى كوميسسيانىڭ 12 ءماجىلىسى وتكىزىلىپ, ولاردىڭ قورىتىندىسى بويىنشا ماڭىزدى ۋاعدالاستىقتار مەن ناتيجەلەرگە قول جەتكىزىلدى. وتكەن جىلى قۇرىلعان ساراپشىلاردىڭ ارنايى جۇمىس توبى اينالىساتىن قر مەن قحر اراسىندا ترانسشەكارالىق وزەندەردەگى سۋ ءبولۋ كەلىسىمىنىڭ جوباسى بويىنشا بەلسەندى جۇمىس باستالدى. ساراپشىلاردىڭ ءبىرىنشى ءماجىلىسى 2015 جىلدىڭ ناۋرىزىندا الماتىدا ءوتتى. وسى جىلدىڭ قىركۇيەگىندە بەيجىڭ قالاسىندا كەلىسىم جوباسىن كەلىسۋ بويىنشا ساراپشىلاردىڭ ەكىنشى ءماجىلىسىن وتكىزۋ تۋرالى ۋاعدالاستىققا قول جەتكىزىلدى. ش. نۇرىشەۆ: «قازاقستان-قىتاي ترانسشەكارالىق وزەندەر ماسەلەلەرى بويىنشا بىرلەسكەن جۇمىستىڭ باستى ماقساتى – ەكى مەملەكەت باسشىلارى اراسىنداعى ۋاعدالاستىقتاردى ىسكە اسىرۋ بولىپ تابىلادى. بۇل ماسەلەلەر ەرەكشە باقىلاۋعا الىنىپ جانە جوعارى دەڭگەيدەگى كەزدەسۋلەر بارىسىندا ۇنەمى تالقىلانىپ تۇرادى», – دەدى ول. ال تسزياو يۋن قىتايلىق تاراپ ەكى ەل اراسىنداعى كوپجاقتى ستراتەگيالىق ارىپتەستىك قارىم-قاتىناستارى شەڭبەرىندە قازاقستانمەن بۇل باعىتتا ىقپالداستىقتى نىعايتۋعا دايىن ەكەنىن مالىمدەدى.
«ەگەمەن-اقپارات».