ۇكىمەت كۋلۋارىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ قوعامدا قىزۋ تالقىلانىپ جاتقان ەڭ تومەنگى جالاقىنى 150 مىڭ تەڭگەگە دەيىن كوتەرۋ تۋرالى مالىمدەمەگە قاتىستى پىكىر ءبىلدىردى, دەپ حابارلايدى Egemen.kz.
بۇعان دەيىن ۇلتتىق ەكونوميكا ءمينيسترىنىڭ ورىنباسارى ازامات ءامرين ەڭ تومەنگى جالاقى مولشەرىن 150 مىڭ تەڭگەگە جەتكىزۋ مىندەتى تۇرعانىن ايتقان بولاتىن. بۇل اقپارات حالىق اراسىندا ۇلكەن ءۇمىت پەن ءتۇرلى ساۋالدار تۋعىزدى.
اسقاربەك ەرتاەۆ بۇل باعىتتا ناقتى جوسپار بار ەكەنىن, بىراق سوڭعى شەشىم ءالى قابىلدانباعانىن جەتكىزدى.
«قازىرگى 85 مىڭ تەڭگەدەن كوتەرۋ جاعىن ۇكىمەت, ۇلتتىق بانك, قارجى نارىعىن رەتتەۋ جانە دامىتۋ اگەنتتىگى بىرلەسىپ ناقتى جوسپارعا بەلگىلەپ قويدىق. ونىڭ ءوز مەرزىمى بار. قازىر تالقىلاۋ ءجۇرىپ جاتىر. ءبىزدىڭ ءوز ەسەپتەرىمىز دايىن, پىسىقتاۋ كەزىندە ۇسىنىستارىمىزدى بەرەمىز», دەدى ەڭبەك ءمينيسترى.
تابىس تەڭگەرىمى: جالاقى مەن باعا اراقاتىناسى
مينيستر جالاقىنىڭ ناقتى قانشا تەڭگەگە وسەتىنىن ناقتى ايتپادى. سەبەبى, بۇل شەشىم تەك الەۋمەتتىك قانا ەمەس, ەلدىڭ ماكروەكونوميكالىق جاعدايىنا, ينفلياتسيا دەڭگەيىنە جانە بيۋدجەت مۇمكىندىگىنە تىكەلەي بايلانىستى.
ەلىمىزدە ورتاشا جالاقى مولشەرى قانشا تەڭگە؟