ەلىمىزدە كولىك سالاسىن بارشاعا قولجەتىمدى ەتۋ باعىتىنداعى جۇمىستار جالعاسىپ جاتىر. ۇكىمەت وتىرىسىندا ەرەكشە قاجەتتىلىكتەرى بار ازاماتتارعا ارنالعان ارنايى ۆاگونداردى كەزەڭ-كەزەڭىمەن ەنگىزۋ جانە ينفراقۇرىلىمدى بەيىمدەۋ ماسەلەسى قارالدى, دەپ جازادى Egemen.kz.
كولىك ءمينيسترى نۇرلان ساۋرانباەۆ ۇكىمەت وتىرىسىندا كولىك سالاسىنداعى ينكليۋزيۆتى ساياساتتى جۇزەگە اسىرۋ بارىسىن بايانداپ, نەگىزگى باعىتتاردى اتاپ ءوتتى.
«ينكليۋزيۆتى ساياسات تۇجىرىمداماسى اياسىندا كولىككە قولجەتىمدىلىكتى قامتاماسىز ەتۋ ءۇش نەگىزگى باعىت بويىنشا جۇرۋدە, ولار – ينفراقۇرىلىم, كولىك جانە قىزمەت كورسەتۋ», دەدى ن. ساۋرانباەۆ.
ءمينيستردىڭ ايتۋىنشا, تەمىرجول كولىگىندە قۇرامداردىڭ شامامەن 90%-ى كوتەرگىشتەرمەن جانە ارنايى كۋپەلەرمەن جابدىقتالعان. ال 2030 جىلعا قاراي ءار قۇرامدا كەمىندە ءبىر مامانداندىرىلعان ۆاگون قاراستىرىلادى.
سونداي-اق ۆوكزالداردى جاڭعىرتۋ جۇمىستارى دا قاتار جۇرگىزىلىپ جاتىر. رەكونسترۋكتسيا اياسىندا پاندۋستار, ليفتتەر, كوتەرگىش قۇرىلعىلار ورناتىلىپ, كاسسالار مەن سانيتارلىق توراپتار قايتا جابدىقتالادى.
ەرەكشە جاندار ەلەۋسىز قالمايدى
اۆياتسيا سالاسىندا دا وڭ وزگەرىستەر بار. ءمينيستردىڭ سوزىنشە, اۋەجايلاردىڭ قولجەتىمدىلىك دەڭگەيى ارتىپ, ەرەكشە قاجەتتىلىكتەرى بار جولاۋشىلارعا قىزمەت كورسەتۋ تالاپتارى قامتاماسىز ەتىلگەن.
اۆتوموبيل كولىگى باعىتىندا ينكليۋزيۆتىلىك كەزەڭ-كەزەڭىمەن كۇشەيىپ كەلەدى. بۇگىندە اۆتوۆوكزالدار مەن اۆتوستانتسيالاردىڭ شامامەن 80%-ى, ال قالالىق اۆتوبۋستاردىڭ 79%-ى قولجەتىمدىلىك تالاپتارىنا سايكەس.
سونىمەن قاتار ينۆاتاكسي قىزمەتى دە دامىپ جاتىر. اۆتوپارك 30%-عا ۇلعايىپ, 1426 بىرلىككە جەتكەن.
بەكباەۆا: ۋچاسكەلەردە ەرەكشە قاجەتتىلىگى بار جاندارعا جاعداي جاسالدى