ۇكىمەت يۋنەسكو جانە يسەسكو اياسىندا مادەني مۇرانى ساقتاۋ جانە ىلگەرىلەتۋدىڭ 2026-2028 جىلدارعا ارنالعان كەشەندى جوسپارىن بەكىتتى. ونىڭ جەكە ءبولىمى «الەم جادى» باعدارلاماسى شەڭبەرىندەگى دەرەكتى مۇراعا ارنالعان. يۋنەسكو تىزىمىنە قانداي نىساندار ەنگىزىلگەنى جانە قازاقستاننان قانداي نوميناتسيالار جىبەرىلگەنى تۋرالى ۇلتتىق اكادەميالىق كىتاپحاناسىنىڭ ديرەكتورى كۇمىس سەيىتوۆا ايتىپ بەردى, دەپ جازادى Egemen.kz.
ونىڭ ايتۋىنشا, بۇگىنگى تاڭدا قازاقستان يۋنەسكو-نىڭ «الەم جادى» حالىقارالىق تىزىلىمىنە ءتورت دەرەكتى مۇرا ۇسىنىپ وتىر. ولاردىڭ قاتارىندا قوجا احمەت ياسساۋيگە, «نەۆادا – سەمەي» حالىقارالىق انتيادرولىق قوزعالىسىنا قاتىستى ماتەريالدار مەن ارال تەڭىزىنە ارنالعان دەرەكتى مۇرا, سونداي-اق وتكەن جىلى تىزىمگە ەنگىزىلگەن «حاندار شەجىرەسى» بار.
ەندى قازىر قازاقستان حالىقارالىق تىزىلىمگە جاڭا نوميناتسيالار جولدادى. ولاردىڭ اراسىندا اباي قۇنانباەۆتىڭ شىعارمالارىمەن بايلانىستى دەرەكتى مۇرا, سونداي-اق «قىز جىبەك» اتتى العاشقى قازاق وپەراسى بويىنشا ماتەريالدار بار.
سونىمەن قاتار قازاقستان يۋنەسكو-نىڭ ورتالىق ازيا مەن ازيا-تىنىق مۇحيتى ءوڭىرى ەلدەرىنە انالعان وڭىرلىك تىزىلىمىنە دە قاتىسىپ جاتىر. وڭىرلىك تىزىمگە ەكى قۇجات – ەسىك قورعانىنان تابىلعان ەسىك توستاعانىنداعى رۋنا جازۋلارى مەن ءماشھۇر ءجۇسىپ شىعارمالارىنا بايلانىستى قۇجاتتار جىبەرىلدى.
پرەزيدەنت «تاريحي-مادەني مۇرا وبەكتىلەرىن قورعاۋ تۋرالى» زاڭعا قول قويدى
سونداي-اق 2025 جىلى ۇلتتىق كوميتەت العاش رەت «الەم جادى» دەرەكتى مۇراسىنىڭ ۇلتتىق ءتىزىمىن جاساپ, بەكىتتى.
«بۇگىندە وعان 79 نىسان كىرەدى. الداعى ۋاقىتتا ءتىزىمدى 500-گە دەيىن كەڭەيتۋ جوسپاردا بار, ويتكەنى قازاقستاندا وسى تىزىمدە بولۋعا لايىقتى 6 مىڭعا جۋىق دەرەكتى مۇرا نىسانى بار», دەدى كۇمىس سەيىتوۆا.
ونىڭ ايتۋىنشا, الداعى ۋاقىتتا يۋنەسكو-عا جاڭا نوميناتسيالار وسى ۇلتتىق تىزىمنەن الىنىپ ۇسىنىلادى. بۇل رەتتە, ۇيىمنىڭ قاعيدالارىنا سايكەس ءاربىر ەل حالىقارالىق جانە وڭىرلىك تىزىلىمدەرگە ەنگىزۋ ءۇشىن ەكى جىلدا ءبىر رەت ءبىر نىساننان عانا ءوتىنىش بەرە الادى.
وڭىرلىك تىزىمگە وتىنىمدەردى قاراۋ ناتيجەلەرى 2026 جىلدىڭ ءبىرىنشى جارتىجىلدىعىندا بەلگىلى بولادى, ال حالىقارالىق تىزىلىمگە وتىنىمدەر كەلەسى جىلى قارالادى.