ەلوردا كوممۋنالدىق قىزمەتى قىس مەزگىلىنەن كەيىن قالادا اۋقىمدى سانيتارلىق تازالاۋ جۇمىسىن جۇرگىزىپ جاتىر, دەپ حابارلايدى Egemen.kz.
استانا قالاسى اكىمدىگىنىڭ مالىمەتىنشە, وسى اۋقىمدى جۇمىس اياسىندا قالالىق ينفراقۇرىلىمنىڭ ءارتۇرلى نىساندارى تازالانىپ, جۋىلادى: قورشاۋلار, ايالدامالار, جارىق باعانالارى, جول بەلگىلەرى, جولدار, تروتۋارلار جانە ت.ب. سونىمەن قاتار, اۋلا, سكۆەرلەر, ساياباقتار جانە باسقا دا قوعامدىق ورىنداردا جوندەۋ-قالپىنا كەلتىرۋ جۇمىستارى جۇرگىزىلىپ جاتىر.
قالانىڭ بارلىق اۋدانىندا سانيتارلىق تازالاۋ جۇمىسى بەلسەندى جۇرگىزىلىپ جاتىر. نۇرا اۋدانىندا جەرگىلىكتى اۋماقتاردى تازالاۋ جانە رەتكە كەلتىرۋ بويىنشا جۇيەلى جۇمىس ءجۇرىپ جاتىر. جولدار جۋىلىپ, تروتۋارلار, كوپىرلەر, ايالدامالار جانە قالالىق ينفراقۇرىلىمنىڭ باسقا ەلەمەنتتەرى تازالانىپ جاتىر.
بايقوڭىر اۋدانىندا سانيتارلىق تازالاۋمەن قاتار اۋلا, سكۆەر جانە ساياباقتاردا جوندەۋ-قالپىنا كەلتىرۋ جۇمىسى باستالدى. بالالار مەن سپورت الاڭدارى, قوقىس كونتەينەرلەرى ورنالاسقان ورىندار رەتتەلىپ, اباتتاندىرۋ ەلەمەنتتەرى قالپىنا كەلتىرىلىپ جاتىر.
استانالىق پوليتسەيلەر بەينەكامەرا ارقىلى جول ەرەجەسىن بۇزعانداردى انىقتادى
الماتى اۋدانىندا جۇمىستار كۇشەيتىلگەن رەجيمدە ءجۇرىپ جاتىر – كۇندەلىكتى شامامەن 300 جول جۇمىسشىسى مەن 250-دەن استام ارنايى تەحنيكا جۇمىلدىرىلعان. جولداردى جانە ينفراقۇرىلىمدى جۋمەن قاتار, جاسىل جەلەكتەرگە كۇتىم كورسەتىلىپ, ايالدامالار سانيتارلىق تازالانۋدا, انشلاگتار مەن قورشاۋلاردىڭ ەلەمەنتتەرىن قالپىنا كەلتىرۋ جۇمىسى ءجۇرىپ جاتىر.
ەسىل اۋدانىندا دا كوكتەمگى جوندەۋ-قالپىنا كەلتىرۋ جۇمىسى باستالدى. تاس توسەمەلەر قالپىنا كەلتىرىلىپ, د.قوناەۆ كوشەسىندەگى تىرەۋ قابىرعاسىنىڭ ۇستىڭگى تاقتالارى جوندەلۋدە. كۇندەلىكتى قالالىق ينفراقۇرىلىمنىڭ كەشەندى جۋ جۇمىسى جۇرگىزىلۋدە. بۇل جۇمىسقا 500-دەن استام جول جۇمىسشىسى مەن 200-دەن استام تەحنيكا جۇمىلدىرىلعان.
استانادا كەمىرگىشتەرگە قارسى كوكتەمگى كۇرەس ناۋقانى باستالدى
سارىارقا اۋدانىندا دا اۋقىمدى سانيتارلىق تازالاۋ جۇرگىزىلۋدە. جۇمىستار جول جابىندىسىن, جەر استى وتكەلدەرىن, اۋلا اۋماقتارىن جانە كوشە جيھازدارىن قامتيدى. سونىمەن قاتار, ايالدامالار تازالانىپ, اباتتاندىرۋ ەلەمەنتتەرى جوندەلىپ جاتىر. سانيتارلىق تازالاۋعا 735-تەن استام تەحنيكا جانە 253 جول جۇمىسشىسى جۇمىلدىرىلعان.
سارايشىق اۋدانىندا 200-دەن استام ارنايى تەحنيكا مەن 400 جول جۇمىسشىسى جۇمىلدىرىلعان. قار شىعارۋ, قۇم-توپىراق پەن ءىرى قوقىستاردان تازارتۋ, جول جيەگىن جيناۋ, تروتۋارلار مەن كوپىرلەردى جۋ جۇمىسى جۇرگىزىلىپ جاتىر.قازىرگى تاڭدا قالانىڭ بارلىق التى اۋدانىندا سانيتارلىق تازالاۋ جۇمىسى جۇرگىزىلۋدە. تروتۋارلار مەن جول جابىندارى ارنايى تەحنيكانىڭ كومەگىمەن تازالانىپ, كوگالدى تۇستار جانە باسقا جەرلەر رەتكە كەلتىرىلىپ جاتىر.