قازاقستاندا تەگىن مەديتسينالىق كومەك اياسىندا بەرىلگەن ءدارى-دارمەكتەردىڭ ءدارىحانالاردا ساتىلعانى انىقتالدى. دەنساۋلىق ساقتاۋ مينيسترلىگى بۇل فاكتىلەر بويىنشا ماتەريالداردى قارجىلىق مونيتورينگ اگەنتتىگى مەن سىبايلاس جەمقورلىققا قارسى قىزمەتكە جولدادى. قوسىمشا تەكسەرىستەر جۇرگىزىلىپ جاتىر, دەپ جازادى Egemen.kz.
ۆەدومستۆو مالىمەتىنشە, دارىلىك زاتتاردىڭ اينالىمى 2024 جىلعى 1 شىلدەدەن باستاپ تاڭبالاۋ جۇيەسى ارقىلى تالدانعان. مونيتورينگ ناتيجەسىندە ەل اۋماعىنداعى ءدارىحانالاردا تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندە بەرىلەتىن 4114 ءدارىنىڭ ساتىلعانى انىقتالدى.
مينيسترلىك 74 نىسانعا جوسپاردان تىس تەكسەرىس جۇرگىزدى. سونىڭ ناتيجەسىندە 31 ۇيىمعا 12,3 ملن تەڭگە كولەمىندە ايىپپۇل سالىندى, ال 43 كومپانياعا زاڭبۇزۋشىلىقتاردى جويۋ تۋرالى نۇسقاما بەرىلدى.
ءدارى-دارمەك باعاسى قىمباتتادى ما؟ مينيسترلىك مونيتورينگ دەرەكتەرىن جاريالادى
تەكسەرۋ بارىسىندا پاتسيەنتتەرگە تەگىن بەرىلگەن دارىلەردىڭ زاڭسىز اينالىمعا تۇسكەنى بەلگىلى بولدى. كەي جاعدايلاردا مەديتسينالىق ۇيىمدار ارقىلى بەرىلگەن پرەپاراتتار دارىحانالارعا قايتا وتكىزىلگەن. ولاردىڭ قاتارىندا ينفۋزياعا ارنالعان ناتري ءحلوريدى مەن گليۋكوزا ەرىتىندىلەرى, انتيبيوتيكتەر, سوزىلمالى اۋرۋلاردى ەمدەۋگە ارنالعان دارىلەر بار.
«تسيفرلىق ەكونوميكانى دامىتۋ ورتالىعىنىڭ مالىمەتىنە سايكەس, تاڭبالاۋ كودتارىن پايدالانۋ بارىسىندا جۇيەلى بۇزۋشىلىقتار تىركەلدى: 35 537 رەت قايتا اينالىمعا شىعارۋ فاكتىسى, 480 752 جاعدايدا ءبىر كودتىڭ بىرنەشە قاتىسۋشى تاراپىنان قولدانىلۋى انىقتالعان. سونداي-اق 1140 نىسان 15 614 كودتى قايتا اينالىمنان شىعارعانى بەلگىلى بولدى», دەلىنگەن حابارلامادا.
ەمدەۋ مەن ءدارى-دارمەك تولەمدەرىنە جاڭا تالاپ ەنگىزىلەدى