قاسىم-جومارت توقاەۆ تۇركىستان وبلىسى جۇرتشىلىعىمەن كەزدەسۋدە تۇركىستاننىڭ تاريحي ءارى رۋحاني ماڭىزىنا توقتالىپ, بۇل وڭىرگە ەرەكشە ىقىلاسى بار ەكەنىن اتاپ ءوتتى, دەپ حابارلايدى Egemen.kz.
«بۇگىن اتاجۇرتىمىزدىڭ التىن بەسىگى – تۇركىستان شاھارىنا تاعزىم ەتۋ ءۇشىن ارنايى كەلىپ وتىرمىن. ريزامىن.
مەنىڭ تۇركىستانعا ىقىلاسىم ەرەكشە ەكەنىن جاقسى بىلەسىزدەر. مەملەكەت باسشىسى رەتىندە العاشقى ساپارىمدى وسى ولكەدەن باستادىم. تۇركىستان – ءتۇبى ءبىر تۇركى جۇرتىنىڭ قاسيەتتى شاڭىراعى», دەدى مەملەكەت باسشىسى.
پرەزيدەنتتىڭ ايتۋىنشا, تۇركىستان – حالقىمىزدىڭ بولمىس-ءبىتىمى, قايسار رۋحى, تەڭدەسسىز مادەنيەتى جانە ەلدىك ءداستۇرى كورىنىس تاپقان كيەلى جەر.
«ايگىلى قوجا احمەت ءياساۋيدىڭ مول مۇراسى – شەجىرەلى شاھاردىڭ رۋحاني قازىناسى.
ازىرەت سۇلتان كەسەنەسى – تۇركى الەمىنىڭ بەرەكەلى تۇتاستىعىنىڭ سيمۆولى. ءتول تاريحىمىزدا ەسىمى التىن ارىپپەن جازىلعان تۇعىرلى تۇلعالارىمىز وسى جەردە ماڭگىلىك مەكەنىن تاپقان», دەدى ق.توقاەۆ.
پرەزيدەنتتىڭ ايتۋىنشا, بۇل وڭىردە ۇلتىمىزدىڭ تاعدىرىن ايقىنداعان اسا ماڭىزدى شەشىمدەر قابىلداندى.
«تۇركىستان – قازاق حاندىعىنىڭ ساياسي ورتالىعىنىڭ ءبىرى ەكەنىن ەشقاشان ۇمىتپاۋىمىز كەرەك. بۇل وڭىردە ۇلتىمىزدىڭ تاعدىرىن ايقىنداعان اسا ماڭىزدى شەشىمدەر قابىلداندى. ورداباسى جەرىندە وسىدان ءۇش عاسىر بۇرىن ەل بولاشاعىنا ايرىقشا اسەر ەتكەن ۇلكەن قۇرىلتاي ءوتتى. بۇل بىرەگەي جيىننىڭ ءمان-ماعىناسى اسا ەرەكشە.
قۇرىلتايدا ءۇش ءجۇزدىڭ بيلەرى جانە يگى جاقسىلارى تۇگەل باس قوسىپ, ءبىر تۋدىڭ استىنا جينالدى. ۇلت بىرلىگىنىڭ ارقاسىندا باتىر بابالارىمىز اڭىراقاي شايقاسىندا تاريحي جەڭىسكە جەتىپ, بۇكىل سىرت ەلدەرگە قازاق ەلى تۇتاستىعىنىڭ كۇشىن پاش ەتتى.
«وسىنداي ەلدىك پەن ەرلىك ءداستۇرى ەشقاشان ۇزىلگەن ەمەس.ء بىز دە تاريح جولىن جالعاستىرىپ, ەلىمىزدە تورەلى جيىن, توبەلى باسقوسۋلار وتكىزىپ كەلەمىز. ۇلتتىق قۇرىلتايدىڭ ەكىنشى وتىرىسى تۇركىستاندا وتكەنىن جاقسى بىلەسىزدەر. مەن وسى جەردە «ادال ازامات» تۇجىرىمداماسىن العاش رەت جاريالادىم.
مامىر ايىنىڭ ورتاسىندا تۇركىستاندا تۇركى مەملەكەتتەرى ۇيىمىنىڭ اياسىنداعى ءتيىستى مەملەكەتتەر باسشىلارىنىڭ ەڭ جوعارى دەڭگەيدەگى جيىنى جوسپارلانىپ وتىر. بۇل – قازىرگى الەمدەگى قۇبىلمالى احۋالدا وتكىزىلەتىن وتە ماڭىزدى حالىقارالىق شارا. ۇكىمەت پەن اكىمدىك وسى جيىندى ءمىنسىز ۇيىمداستىرۋعا ءمان بەرۋى كەرەك», دەدى ەل پرەزيدەنتى.
ايتا كەتەيىك, بۇگىن مەملەكەت باسشىسى قاسىم-جومارت توقاەۆ تۇركىستان وبلىسىنا جۇمىس ساپارىمەن بارىپ, قوجا احمەت ياساۋي كەسەنەسىنە زيارات ەتتى.