تۇركىستان قالاسىنداعى جاڭادان سالىنعان اتشاباردا ءوتىپ جاتقان كوكپاردان الەم چەمپيوناتىنا 9 ەلدىڭ كوماندالارى قاتىسىپ جاتىر. اتاپ ايتقاندا, اۋعانستان, قىتاي, ماجارستان, موڭعوليا, رەسەي فەدەراتسياسى, تاجىكستان, وزبەكستان, تۇركيا جانە قازاقستان قۇرامالارى جۇلدە جولىندا باق سىنايدى, دەپ حابارلايدى Egemen.kz.
دودانىڭ اشىلۋ راسىمىندە تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى امانباي نۇرمۇحانبەتوۆ, بۇكىلالەمدىك كوكپار قاۋىمداستىعىنىڭ پرەزيدەنتى دانيار قوبىلاندين, جارىستىڭ باس تورەشىسى جانىسبەك ساەۆ, سونداي-اق كوكپاردان كەڭەس وداعىنىڭ 9 دۇركىن چەمپيونى, ارداگەر سپورتشى ءابىلحان داۋىلباەۆ قاتىسۋشىلارعا ساتتىلىك تىلەپ, قۇتتىقتاۋ ءسوز سويلەدى.
ۇلتتىق سپورت تۇرلەرى: كوكپار مەن قىز قۋ الەمدە قالاي ناسيحاتتالىپ جاتىر
جاھاندىق باسەكەنىڭ شىمىلدىعىن وزبەكستان مەن قىتاي قۇرامالارى اشتى. تارتىستى ويىندا وزبەكستاندىق شاباندوزدار 10:0 ەسەبىمەن قارسىلاسىنان باسىم ءتۇستى. ال رەسەي مەن موڭعوليا كەزدەسۋىندە 3:0 ەسەبى تىركەلسە, قازاقستان مەن تاجىكستان اراسىنداعى ويىندا وتانداستارىمىز 8:4 ەسەبىمەن جەڭىسكە جەتتى. سونداي-اق, اۋعانستان مەن ماجارستان تارتىسىندا 14:0 ەسەبىمەن اۋعاندىقتار باسىم بولدى.
جارىس رەگلامەنتىنە سايكەس, توپتىق كەزەڭدە ۇزدىك شىققان كوماندالار 20 ناۋرىزدا جارتىلاي فينالدىق كەزدەسۋلەردە مىقتىنى انىقتايدى. ال 21 ناۋرىز كۇنى شەشۋشى ويىندار ءوتىپ, چەمپيون مەن جۇلدەگەرلەر انىقتالادى. ايتۋلى جارىستى ۇيىمداستىرۋعا دۇنيەجۇزىلىك كوكپار قاۋىمداستىعى, قازاقستان رەسپۋبليكاسىنىڭ كوكپار فەدەراتسياسى, ۇلتتىق جانە ات سپورتى ورتالىعى جانە تۇركىستان وبلىسى اكىمدىگى بىرلەسىپ اتسالىسىپ جاتىر. الەم چەمپيوناتىنىڭ جالپى جۇلدە قورى – 30 ميلليون تەڭگە.
قازاقتىڭ كوكپارى VI دۇنيەجۇزىلىك كوشپەلىلەر ويىندارىنىڭ رەسمي باعدارلاماسىنا ەنگىزىلدى
ايتا كەتەيىك, كوكپاردان الەم چەمپيوناتى سوڭعى رەت 2017 جىلى وتكەن بولاتىن. اراعا توعىز جىل سالىپ, تاريحي دودا تۇركىستان تورىندە ۇيىمداستىرىلىپ وتىر.
تۇركىستان