پرەزيدەنت: ەلىمىز يۋنەسكو-نىڭ قولداۋىمەن كوپتەگەن ماڭىزدى جوبانى جۇزەگە اسىردى

«بۇل – ۇلت جىلناماسى مەن الەم تاريحى ءۇشىن وتە ماڭىزدى ماسەلە. ءبىز حالىقارالىق عىلىم قاۋىمداستىعىمەن بىرلەسە وتىرىپ, وسى تاقىرىپتى جۇيەلى ءارى جان-جاقتى زەردەلەۋ جۇمىسىن جالعاستىرۋىمىز كەرەك. بىرنەشە كۇنگە سوزىلاتىن ءىس-شارانىڭ نەگىزگى ماقساتى دا – وسى. بۇل تۇستا قازاقستاننىڭ باستاماسىنا قولداۋ كورسەتكەنى ءۇشىن يۋنەسكو باسشىلىعىنا ريزاشىلىعىمدى ايتقىم كەلەدى, دەدى پرەزيدەنت.

مەملەكەت باسشىسى سونداي-اق فورۋمعا قاتىسىپ وتىرعان يۋنەسكو-نىڭ بۇرىنعى باس ديرەكتورى ودرە ازۋلەگە العىس ايتتى. 

ء«سىز قازاقستان مەن يۋنەسكو اراسىنداعى ارىپتەستىكتى نىعايتۋعا مول ۇلەس قوستىڭىز. سيمپوزيۋمنىڭ وسىنداي بەدەلدى جاھاندىق ۇيىم اياسىندا ءوتۋى التىن وردا مۇراسىنىڭ الەمدىك اۋقىمداعى ءمان-ماعىناسى زور ەكەنىن كورسەتەدى. بۇگىنگى جيىنعا يۋنەسكو-نىڭ جوعارى دەڭگەيدەگى وكىلى, بۇكىلالەمدىك مۇرالار ورتالىعىنىڭ ديرەكتورى ەلۋندۋ اسسومو لازار مىرزا باستاعان دەلەگاتسيا قاتىسىپ وتىر», دەيدى مەملەكەت باسشىسى.  

پرەزيدەنت ءوز سوزىندە ەلىمىز يۋنەسكو-نىڭ قولداۋىمەن كوپتەگەن ماڭىزدى جوبانى جۇزەگە اسىرىلعانىن اتاپ ءوتتى.

«ناقتى ايتقاندا, قوجا احمەت ياساۋي كەسەنەسى, تامعالى تاس پەتروگليفتەرى, سونداي-اق بىرنەشە كونە قالا بۇكىلالەمدىك مۇرالار تىزىمىنە ەندى. سونىمەن قاتار ۇلتىمىزدىڭ ماتەريالدىق ەمەس مادەني مۇرالارىن دارىپتەۋ باعىتىندا اۋقىمدى جۇمىس جۇرگىزىلدى. ماسەلەن, بىلتىر عانا «حاندار شەجىرەسى» دەپ اتالاتىن بىرەگەي قولجازبا الەمدىك دەڭگەيدە مويىندالدى. بۇل – ەل بيلەگەن تۇلعالار تۋرالى مالىمەتتەردى توپتاستىرعان, سونىڭ ىشىندە التىن وردا كەزەڭىن قامتىعان قۇندى قۇجات. سوندىقتان ءبىز بايلانىسىمىزدى ودان ءارى دامىتۋعا مۇددەلىمىز. بۇل – ءوزارا ءتيىمدى, ماڭىزدى شارۋا», دەدى قاسىم-جومارت توقاەۆ.

پرەزيدەنت قاسىم-جومارت توقاەۆ «التىن وردا – دالا وركەنيەتىنىڭ ۇلگىسى: تاريح, ارحەولوگيا, مادەنيەت, بىرەگەيلىك» اتتى حالىقارالىق سيمپوزيۋمىندا ءسوز سويلەپ, بايىرعى الىپ مەملەكەتتىڭ تاريحى كوپ زەرتتەۋلەرگە ارقاۋ بولعانىن اتاپ ءوتتى.