ەلوردادا «التىن وردا – دالا وركەنيەتىنىڭ ۇلگىسى: تاريح, ارحەولوگيا, مادەنيەت, بىرەگەيلىك» اتتى حالىقارالىق سيمپوزيۋمى ءوتىپ جاتىر. جيىندا مەملەكەت باسشىسى قاسىم-جومارت توقاەۆ تاريحقا ءادىل ءارى ساياسي تۇرعىدان بەيتاراپ باعا بەرۋ كەرەكتىگىن اتاپ ءوتتى, دەپ حابارلايدى Egemen.kz.
پرەزيدەنتتىڭ ايتۋىنشا, «تاريحتى جەڭىمپازدار جازادى» دەگەن قاعيدات تاريحي وقيعالاردى بىرجاقتى تۇسىندىرۋگە اكەلۋى مۇمكىن.
«تاريحتى جەڭىمپازدار جازادى» دەگەن قاعيداتتىڭ عىلىمعا قارسى سيپاتىن ۇمىتپاعان ءجون. ياعني جەڭىمپازداردى جازعىرۋعا بولمايدى, الەم تاريحىنىڭ تورىنەن ورىن الىپ, زەرتتەۋشىلەردىڭ ماقتاۋ-ماداعىنا يە بولادى. ال شاعىن جانە ورتا مەملەكەتتەر, سونىڭ ىشىندە مايداندا جەڭىلىس تاپقان ەلدەر تاريحتىڭ تاساسىندا قالادى», دەدى قاسىم-جومارت توقاەۆ.
سونىمەن قاتار پرەزيدەنت كوشپەلى حالىقتارعا قاتىستى قالىپتاسقان ەسكى ستەرەوتيپتەردى قايتا قاراۋ ۇدەرىسى باستالىپ كەتكەندىگىن ايتتى.
«قازاقستاندا ساياساتتىڭ پايداسى ءۇشىن كوشپەلى حالىقتاردى جابايى, بەي-بەرەكەت, تاريح شەڭبەرىنەن تىس كۇش رەتىندە كورسەتىپ, قۋاتتى دالا يمپەريالارىن «مەملەكەت دەڭگەيىنە جەتە الماعان» دەپ تومەندەتەتىن ەسكى دوگمالار مەن قاساڭ كوزقاراستاردى قايتا قاراۋ ۇدەرىسى باستالىپ كەتتى. بۇل رەتتە ءبىز شىنايى تاريحنامانى قالپىنا كەلتىرە وتىرىپ, وتكەندى اسىرەلەۋدەن اۋلاقپىز. تاريح وزىنە ءتانتى بولعان جالعان ارەكەتتەردى, ورتاق مۇرانى جەكەلەگەن حالىقتىڭ قانجىعاسىنا بايلاپ بەرۋدى كەشىرمەيدى. كەرەعارلىقتار مەن كەدەرگىلەرگە تولى باي تاريحىمىزدى بىرجاقتى تۇسىندىرۋگە قويىلاتىن تالاپ عىلىمنىڭ قۇلدىراۋىنا جانە ءوزارا سەنىمنىڭ جوعالۋىنا اكەلەتىن تۇيىققا تىرەيدى», دەدى مەملەكەت باسشىسى.
پرەزيدەنت تاريحشىلاردىڭ ميسسياسى قازىرگى الماعايىپ كەزەڭدە ماڭىزدى بولىپ تۇرعانىن اتاپ ءوتىپ, التىن وردا تاريحى كوپتەگەن ىرگەلى زەرتتەۋلەرگە ارقاۋ بولعاندىعىنا توقتالدى. بۇدان بولەك, مەملەكەت باسشىسى ەلىمىز يۋنەسكو-نىڭ قولداۋىمەن كوپتەگەن ماڭىزدى جوبانى جۇزەگە اسىرعاندىعىنا باسا ءمان بەرىپ ءوتتى.