ەكىباستۇزدا جاڭادان قۇرىلعان ەرتىس-بايان تەاترىندا پرەمەرالىق قويىلىم – «عاشىقتار حيكاياسى» كومەدياسى ساحنالاندى. ستۋدەنتتىك شاقتاعى عاشىق جىگىتتەردىڭ كۇلدىرگى وقيعاسى كەنشىلەر شاھارىنداعى كورەرمەندى كۇلكىگە قارىق قىلدى.
ستۋدەنتتىك شاق, البىرت ماحاببات. جاتاقحانا بولمەسىندەگى جىگىتتەردىڭ تاعدىرى ءبىر كۇندە الاساپىران بولىپ, ءوز سۇيگەندەرى ءۇشىن تاۋەكەلدىڭ قايىعىنا مىنەدى. جۇرەكتەرىن عاشىقتىق دەرتى بويلاپ, سەزىم تالكەگىنە تۇسكەن جىگىتتەر سۇيىكتىلەرىن قاراتۋ ءۇشىن قانداي امالعا بارادى؟ وقيعاعا جالعان بالگەر ارالاسىپ, قىزا تۇسەدى.
جالپى, ەرتىس-بايان تەاترى – بىلتىر قارا كۇزدە عانا تۇساۋى كەسىلگەن جاس ترۋپپا. سوعان وراي ونەر ۇجىمى قولداۋعا, جىلى سوزگە ءزارۋ ەكەنى ايدان انىق. وبلىس ورتالىعىنان ادەيىلەپ ساپارلاپ بارعانداعى ماقساتىمىز – جاس اكتەرلەردىڭ اياق الىسىن بايقاپ, تەاتردىڭ ىشكى اۋانىن زەردەلەپ كورۋ ەدى. «عاشىقتار حيكاياسى» بۇعان دەيىن ەلىمىزدىڭ تالاي ساحناسىندا قويىلىپ كەلگەن سپەكتاكل بولعانىمەن, ەكىباستۇز تورىندە سەزىم مەن ويدى تەڭ تەربەتىپ, ەرەكشە كورىندى. باستاپقىدا شىمىلدىقتىڭ بەر جاعىندا باستالعاندا بۇل قالاي بولا قويار ەكەن دەگەن كۇدىك كوكەيدە تۇرىپ الدى. شىمىلدىق تۇرىلگەن ۋاقىتتا زالداعى دەكوراتسيا جارق ەتىپ, كوڭىلدەرگە قۋانىش سىيلادى. شەتىنەن ۇرشىقشا يىرىلگەن, پلاستيكالىق ەپتى ۇل-قىزدار. پلاستيكالىق قيمىلدارى سونداي جاراسىمدى, ۇيلەسىمدى كورىندى. ءبىرىنشى كۋرس ستۋدەنتى تۇرسىنبەكتى سومدايتىن نۇرسەرىك ورمولداەۆ ور تەكەدەي ورعىپ, دەنەسىن جىلانشا يرەلەڭدەتكەندە تسيركتىڭ ارتىستەرىنە ۇقساپ كەتەدى ەكەن. بارىنەن بۇرىن داستان رولىندەگى ناريمان جاعىپاروۆتىڭ ونەرى كورەرمەن كوڭىلىنەن شىقتى. ەرمەكتى سومداعان نۇرىم الجاپپاروۆ, رۇستەم – بەكزات تاجيەۆ, ايىم – نۇراي قاناتقىزى, ءمادينا – داريا سوۆەتجانوۆا, قىمبات – انەل تولەگەنوۆا, عاني دەكان – ەسىركەپ ەركەبۇلاننىڭ, ايماۋىتوۆ تەاترىنان ارنايى كەلىپ, اقماقتانى سومداعان باھارگۇل قۇربانوۆانىڭ شەبەرلىكتەرى جينالعان جۇرتتى ريزا ەتتى. سوڭعى اۋەن شىرقالعان ساتتە بارلىق كورەرمەن ورىندارىنان تۇرەگەلىپ, ۇزاق ۋاقىت قوشەمەت كورسەتتى.
«جاس اكتەرلەر سەنىمىمدى تولىقتاي اقتادى. ءبىرىنشى كۇنگى پرەمەرادا ويناۋعا مۇمكىندىك بەرگەنىم دۇرىس شەشىم ەكەن. تەاتر جاڭادان قۇرىلىپ جاتقان سوڭ بەلگىلى ءبىر دارەجەدە قيىندىق بولادى. رەكۆيزيتتەردى, دەكوراتسيانى وزدەرى جاسايدى. دەي تۇرعانمەن بارلىق ماسەلەنى ۇجىم جەتەكشىسى تالعات ساعىنتاەۆپەن بىرلەسىپ شەشتىك. ال اكتەر ناريمان جاعىپاروۆ بولاشاعىنان ءۇمىت كۇتتىرەتىن جاستىڭ ءبىرى ەكەنىن بايقاتتى», دەيدى قويىلىم رەجيسسەرى ادىلەت اقانوۆ.
ەكىباستۇز قالاسىنىڭ اكىمى ايان بەيسەكين اتاپ وتكەندەي, ونەر ۇجىمى الداعى ۋاقىتتا وسىنداي قارقىنمەن جۇمىسىن جالعاستىراتىن بولسا, ولارعا ارناپ جەكە عيمارات سالىنادى. قازىرگى كۇننىڭ وزىندە قارجىلىق جوسپار جاسالىپ قويعان. ال ازىرشە تەاتر ترۋپپاسى «ونەر» مادەنيەت ورتالىعىن پانالايدى. تەاتر جەتەكشىسى تالعات ساعىنتاەۆ ۇلكەن ۇيىمداستىرۋشىلىق جۇمىس اتقارىپ, از ۋاقىتتىڭ ىشىندە تەاترعا قاجەت دۇنيەلەردىڭ بارلىعىن الدىرعان. الدا جوسپارلارى كوپ. م.اۋەزوۆ اتىنداعى قازاق ۇلتتىق دراما تەاترىنىڭ تاربيەسىن كورگەن تانىمال اكتەر وبلىس پەن قالا باسشىلىعى اياعىن قاز-قاز باسقان ۇجىمعا ايتارلىقتاي قولداۋ جاساپ وتىرعانىن جەتكىزدى. اكتەرلەرگە اكىمدىكتىڭ كومەگىن پايدالانىپ 5 بىردەي پاتەر الىپ بەرگەن, الاتىن جالاقىلارى جوعارى.
«ۇجىمىمىزدا 18 اكتەر بار, كىلەڭ جاستار. ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ جانە ت.جۇرگەنوۆ اتىنداعى ونەر اكادەمياسىنىڭ تۇلەكتەرى. ءوزىم بۇعان دەيىن ەكى جىلداي س.سەيفۋللين اتىنداعى قاراعاندى وبلىستىق اكادەميالىق قازاق تەاترىندا باس رەجيسسەر, ەلورداداعى جاستار تەاترىندا ءبىر جىل رەجيسسەر بولىپ قىزمەت اتقاردىم. ۇلكەن شاھارلاردا ءبىلىم العان جاستاردى ەكىباستۇزعا الىپ كەلۋ وڭايعا سوقپادى. بۇعان دەيىن «قوش ماحاببات» قويىلىمىن ءۇش مارتە ساحنالاعانبىز, زالعا كورەرمەن لىق تولدى. قالا جۇرتشىلىعىنىڭ شىنايى قولداۋىن سەزىنىپ وتىرمىز», دەيدى تەاتر رەجيسسەرى ءبيبىاجار ديقان.
پاۆلودار وبلىسى,
ەكىباستۇز قالاسى