باس قالاداعى تاۋەلسىزدىك سارايىندا مەملەكەت باسشىسى قاسىم-جومارت توقاەۆتىڭ قاتىسۋىمەن بارلىق دەڭگەيدەگى ءماسليحات دەپۋتاتتارىنىڭ ءىىى رەسپۋبليكالىق فورۋمى ءوتتى. جيىندا جەرگىلىكتى وكىلدى ورگانداردىڭ ءرولىن ارتتىرۋ, دەپۋتاتتىق كورپۋستىڭ جاۋاپكەرشىلىگىن كۇشەيتۋ جانە حالىقپەن كەرى بايلانىستى نىعايتۋ ماسەلەلەرى تالقىلاندى, دەپ حابارلايدى Egemen.kz.
پرەزيدەنت ءوز سوزىندە ءماسليحاتتاردىڭ وكىلەتتىگىن ودان ءارى كەڭەيتىپ, ناقتىلاۋ قاجەتتىگىن اتاپ ءوتتى. ونىڭ ايتۋىنشا, جەرگىلىكتى وكىلدى ورگانداردىڭ بيلىك جۇيەسىندەگى ىقپالىن كۇشەيتۋ – ماڭىزدى مىندەت.
ء«ماسليحاتتاردىڭ وكىلەتتىگىن ودان ءارى كەڭەيتىپ, ناقتىلاي ءتۇسۋ قاجەت. بۇل – ايرىقشا ماڭىزى بار مىندەت. ولاردىڭ جەرگىلىكتى بيلىك جۇيەسىندەگى ءرولىن كۇشەيتۋ كەرەك», دەدى مەملەكەت باسشىسى.
توقاەۆ: وكىلدى ورگانداردى كۇشەيتۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى
پرەزيدەنت اكىمدەر حالىقپەن كەزدەسكەن كەزدە كوتەرىلگەن ماسەلەلەردى شەشۋدە دەپۋتاتتاردىڭ بەلسەندى قاتىسۋى ماڭىزدى ەكەنىن ايتتى.
«اكىمدەر حالىقپەن كەزدەسكەندە ازاماتتاردىڭ كوبى ناقتى ماسەلەلەردى ايتىپ, بىرنەشە سۇراق قويادى. سونداي تۇيتكىلدەر دۇرىس شەشىمىن تابۋى ءۇشىن دەپۋتاتتىق كورپۋس بەلسەندى تۇردە باقىلاۋ جاساپ, اكىمدەرمەن بىرگە جۇمىس ىستەۋى كەرەك», دەدى قاسىم-جومارت توقاەۆ.
سونىمەن قاتار مەملەكەت باسشىسى ءماسليحاتتاردىڭ ىشكى جۇمىس ءتارتىبىن قايتا قاراپ, قۇزىرەتتەرىن ناقتىلاۋ قاجەتتىگىن جەتكىزدى.
ء«ماسليحاتتاردىڭ ىشكى جۇمىس ءتارتىبىن رەتكە كەلتىرىپ, قايتا قاراعان ابزال. ولاردىڭ كوپتەگەن قۇزىرەتى ءالى كۇنگە دەيىن ايقىن ەمەس. بۇل احۋال مەملەكەتتىك باسقارۋ ۇدەرىسىنە كەدەرگى كەلتىرىپ وتىر», دەدى پرەزيدەنت.
وسىعان بايلانىستى ءوز مىندەتىن ورىنداماعان نەمەسە ەتيكالىق تالاپتاردى بۇزعان دەپۋتاتتاردىڭ جاۋاپكەرشىلىگىن كۇشەيتەتىن ناقتى شارالار قابىلداۋ قاجەتتىگى ايتىلدى. مەملەكەت باسشىسىنىڭ پىكىرىنشە, مۇنداي قادام وكىلدى بيلىك ينستيتۋتىنا دەگەن سەنىمدى ارتتىرۋعا مۇمكىندىك بەرەدى.
پرەزيدەنت: ايماقتار ءوز بيۋدجەتىن مۇقيات جوسپارلاپ, تابىسىن ارتتىرۋعا باسا ءمان بەرۋگە ءتيىس
پرەزيدەنت سونداي-اق باسقارۋدىڭ روتاتسيالىق ءتارتىبىن ەنگىزۋ ماسەلەسىنە توقتالدى. ونىڭ ايتۋىنشا, ءماسليحات توراعالارىنىڭ وكىلەتتىگى دە بەلگىلى ءبىر مەرزىممەن شەكتەلۋى ءتيىس.
ء«بىز باسقارۋدىڭ روتاتسيالىق ءتارتىبىن مەملەكەتتىك بيلىكتىڭ بارلىق دەڭگەيىنە بىرتىندەپ ەنگىزىپ جاتىرمىز. قازىرگى تاڭدا سايلاناتىن اكىمدەردىڭ وكىلەتتىگى ەكى مەرزىممەن شەكتەلگەن. ەندى ءماسليحات توراعالارىن روتاتسيا تارتىبىمەن اۋىستىرۋ قاعيداتىن ەنگىزۋ كەرەك دەپ سانايمىن. ولاردىڭ وكىلەتتىگى دە ەكى مەرزىمنەن اسپاۋى قاجەت. وسىنداي ءادىس ارقىلى كاسىبي دەپۋتاتتىق كورپۋس قالىپتاستىرىپ, ونىڭ تيىمدىلىگىن ارتتىرۋعا بولادى», دەدى قاسىم-جومارت توقاەۆ.
فورۋم بارىسىندا مەملەكەت باسشىسى حالىقپەن ءتيىمدى بايلانىس ورناتۋدىڭ ماڭىزىن دا اتاپ ءوتتى.
«بارلىق دەڭگەيدەگى بيلىك وكىلدەرى حالىقپەن اشىق ءارى تۇسىنىكتى اڭگىمە, سۇحبات ورناتا ءبىلۋى كەرەك», دەدى پرەزيدەنت.
ونىڭ ايتۋىنشا, ازاماتتاردىڭ شاعىمدارىنىڭ باسىم بولىگىن جەرگىلىكتى دەڭگەيدە شەشۋگە بولادى. الايدا مۇنداي ماسەلەلەر دەر كەزىندە قارالماعاندىقتان, تۇرعىندار ورتالىق ورگاندارعا ءجيى جۇگىنەدى.
«بىلتىر پرەزيدەنت اكىمشىلىگىنە شامامەن 83 مىڭ ءوتىنىش كەلىپ تۇسكەن. بۇل – الدىڭعى جىلمەن سالىستىرعاندا 30 پايىزعا كوپ. شاعىمداردىڭ باسىم بولىگىن جەرگىلىكتى دەڭگەيدە قاراپ, دەر كەزىندە شەشۋگە بولاتىن ەدى», دەدى مەملەكەت باسشىسى.
بيىلدان باستاپ اۋىلدىق وكرۋگتەر قوسىمشا تابىس كوزىنە يە بولماق
پرەزيدەنت ءماسليحات دەپۋتاتتارى حالىق پەن بيلىك اراسىنداعى بايلانىستى قامتاماسىز ەتەتىن نەگىزگى بۋىن ەكەنىن اتاپ ءوتتى.
ء«ماسليحات دەپۋتاتتارى حالىق پەن بيلىك اراسىنداعى كوپىر بولۋعا ءتيىس. ولار تۇرعىنداردىڭ ماسەلەسىن شەشۋگە كومەكتەسۋى كەرەك. وسى ماڭىزدى جۇمىسقا ولاردىڭ قۇزىرەتى تولىق جەتەدى», دەدى قاسىم-جومارت توقاەۆ.
فورۋمدا دەپۋتاتتىق ساۋالداردىڭ تيىمدىلىگىنە دە نازار اۋدارىلدى. مەملەكەت باسشىسى وتكەن جىلى وبلىستىق دەڭگەيدە اتقارۋشى ورگاندارعا التى مىڭعا جۋىق دەپۋتاتتىق ساۋال جولدانعانىن ايتىپ, ولاردىڭ ساپاسىنا ەرەكشە ءمان بەرۋ قاجەت ەكەنىن جەتكىزدى.
«تۇپتەپ كەلگەندە, ايماقتاردىڭ دامۋى, تۇرمىس ساپاسىنىڭ جاقسارۋى, جۇرتتىڭ بيلىككە زور سەنىممەن قاراۋى سىزدەردىڭ قىزمەتتەرىڭىزگە تىكەلەي بايلانىستى. وسىنى ءاردايىم باستى نازاردا ۇستاعان ءجون», دەدى پرەزيدەنت.