قازاقستاننىڭ جاڭا كونستيتۋتسياسى پىكىر ءبىلدىرۋ ەركىندىگى مەن ازاماتتاردىڭ قۇقىقتارىن قورعاۋ اراسىنداعى تەپە-تەڭدىكتى قالىپتاستىرادى. سونىمەن قاتار تسەنزۋراعا تىيىم سالىپ, جاۋاپكەرشىلىككە قاتىستى قۇقىقتىق نەگىزدەردى بەكىتەدى. بۇل تۋرالى جۋرناليست نۇربەك ماتجاني 11 ناۋرىزدا استانادا وتكەن «كونستيتۋتسيالىق رەفورما جانە قوعامدىق ديالوگ: بولاشاقتى قالىپتاستىرۋ» اتتى ساراپشىلار الاڭىندا ايتتى, دەپ حابارلايدى Egemen.kz.
الاڭعا پارلامەنت دەپۋتاتتارى, ساياساتتانۋشىلار, اكادەميالىق قاۋىمداستىق وكىلدەرى, جۋرناليستەر قاتىستى. قاتىسۋشىلار جاڭا كونستيتۋتسيا جوباسىنىڭ نەگىزگى جاڭالىقتارىن جانە مەملەكەتتىك جۇيەنىڭ تۇراقتىلىعىن كۇشەيتۋگە باعىتتالعان ينستيتۋتسيونالدى وزگەرىستەردى تالقىلادى. اسىرەسە ءبىلىم مەن يننوۆاتسيانى دامىتۋ, ءبىلىمدى قوعام قالىپتاستىرۋ جانە ازاماتتاردىڭ تسيفرلىق قۇقىقتارىن قامتاماسىز ەتۋ ماسەلەلەرىنە باسىمدىق بەرىلدى.
قازاقستانداعى رەفەرەندۋمدى 38 ەلدەن كەلگەن 359 بايقاۋشى باقىلايدى
ن. ءماتجانيدىڭ ايتۋىنشا, تسيفرلىق تەحنولوگيالاردىڭ قارقىندى دامۋى مەن مەدياقۇرالداردىڭ جاھاندىق كەڭىستىگى جاعدايىندا اقپاراتتىق ورتانى رەتتەۋ ماسەلەلەرى ەرەكشە وزەكتى.
«جالعان اقپاراتتىڭ تارالۋى, جەكە ومىرگە قول سۇعىلماۋشىلىقتى قورعاۋ قاجەتتىگى ءتيىستى زاڭمەن جاۋاپ بەرۋدى تالاپ ەتەدى», دەدى ول.
ساراپشى اتاپ وتكەندەي, جاڭا كونستيتۋتسيانىڭ باستى نورمالارىنىڭ ءبىرى – ءار ادامنىڭ ءوز كوزقاراسى مەن سەنىمىن ەركىن ءبىلدىرۋ قۇقىعىن قامتاماسىز ەتۋ. بۇل دەموكراتيالىق قوعامنىڭ نەگىزىن قۇرايدى.
«بىرەۋدىڭ ەركىندىگى باسقا بىرەۋدىڭ ەركىندىگى باستالاتىن جەردە اياقتالادى. ءسوز ەركىندىگى ادامنىڭ ابىرويى مەن قادىر-قاسيەتىنە, كاسىبي بەدەلىنە جانە جەكە ءومىرىنىڭ دەربەستىگىنە نۇقسان كەلتىرمەۋى كەرەك», دەپ ءتۇسىندىردى ماتجاني.
تالعات قاليەۆ: جاڭا كونستيتۋتسيا مەملەكەتتىك ينستيتۋتتاردى نىعايتىپ, ەلدىڭ تۇراقتىلىعىن ارتتىرادى
ونىڭ ايتۋىنشا, جاڭا قۇجات تسەنزۋراعا تىيىم سالىپ, ءسوز ەركىندىگىنە كەپىلدىك بەرەدى. بۇل نورما باق, عىلىم, ونەر جانە قوعامدىق ديالوگتىڭ ەركىن دامۋىنا قۇقىقتىق نەگىز بەرەدى.
«تسەنزۋراعا تىيىم سالۋ ءارتۇرلى كوزقاراستار قاتار ءومىر سۇرەتىن پليۋراليستىك اقپاراتتىق ورتانىڭ قالىپتاسۋىنا ىقپال ەتەدى», دەدى ساراپشى.
سوعىس پەن قارۋلى قاقتىعىستاردى ناسيحاتتاۋعا تىيىم سالىنادى. بۇل ەرەجە قازاقستاننىڭ بەيبىتشىلىكتى جاقتايتىن سىرتقى ساياسي دوكتريناسىن كورسەتەدى.
ابزال قۇسپان: جاڭا كونستيتۋتسيا ادامعا باعىتتالعان مەملەكەتتىك باسقارۋدىڭ جاڭا فيلوسوفياسىن قالىپتاستىرادى