استانا. 26 ماۋسىم. فۋتبولدان استانادا ءوتىپ جاتقان 17 جاسقا دەيىنگى جاسوسپىرىمدەر اراسىنداعى پرەزيدەنت كۋبوگى جارىسىندا قازاقستان جاستارى قولا جۇلدەگە تالاساتىن بولدى. اتالعان ويىندا فۋتبولشىلارىمىز گرۋزيادان كەلگەن قۇرداستارىمەن كۇش سىناسادى. بۇل تۋرالى egemen.kz حابارلادى.
قازاقستان قۇراماسى توپتىق كەزەڭدەگى ءۇشىنشى ويىندى تاجىكستانعا قارسى وتكىزدى. كەزدەسۋ تەڭ جاعدايدا ءوربىدى. قوس تاراپ تا جۇيەلى ويىن ورنەگىن كورسەتۋگە تىرىستى. ماتچتىڭ 26-مينۋتىندا تاجىك ويىنشىسى رامز امروحونوۆ ەسەپ اشتى. ۇزىلىسكە 5 مينۋت قالعان كەزدە الاڭ يەلەرى تارازى باسىن تەڭەستىرىپ كەتتى. مەرگەندىگىمەن كوزگە تۇسكەن – سامات بورتاي.
ەكىنشى تايمدا قارسىلاستار قورعانىسقا كوپ كوڭىل ءبولدى. جاستارىمىزعا جارىستىڭ جۇلدەسىنە تالاسۋ ءۇشىن تەك جەڭىس قاجەت ەدى. ال قوناقتارعا تەڭ ەسەپتىڭ ءوزى جەتكىلىكتى بولدى. سوڭعى مينۋتتاردا قازاق ۇلاندارى شابۋىلدى كۇشەيتتى. سونداي ساتتەردىڭ بىرىندە قارسىلاستارىمىز ءوز ايىپ الاڭدارىندا ءتارتىپ بۇزىپ, ءبىزدىڭ ويىنشىلار پەنالتي تەبۋگە مۇمكىندىك الدى. ابىروي بولعاندا, ەرحان تالاسباەۆ 11 مەترلىكتەن ءمۇلت كەتپەدى. وسىلايشا قازاقستان قۇراماسى 6 ۇپايمەن ءوز توبىندا ەكىنشى ورىن الدى.
ال فينالدا ءار توپتىڭ ۇزدىكتەرى يسپانيا مەن ازەربايجان كەزدەسەدى. بۇل ويىندار بۇگىن وينالادى. قازاقستان-گرۋزيا ماتچى ساعات 14:00-دە باستالسا, سوڭعى ويىن 19:00-گە جوسپارلانعان.
ەلامان قوڭىر.
دەرەك: egemen.kz.
سۋرەت: presidentcup.kz.