شىمكەنت قالاسىنداعى جۇمابەك تاشەنوۆ اتىنداعى ۋنيۆەرسيتەتتە ەلىمىزدىڭ جاڭا كونستيتۋتسياسىن قولداۋعا ارنالعان باسقوسۋ ءوتتى.
ۋنيۆەرسيتەت پروفەسسور-وقىتۋشىلار مەن ستۋدەنت جاستار قاتىسقان كەزدەسۋدە شىمكەنت قالاسى اكىمىنىڭ ورىنباسارى سارسەن قۇرانبەك كونستيتۋتسيالىق رەفورمالاردىڭ ماڭىزىن اتاپ ءوتتى. تالقىلاۋدىڭ جوعارى دەڭگەيدە ۇيىمداستىرىلۋىنا ۋنيۆەرسيتەتتىڭ باسقارما توراعاسى, پەداگوگيكا عىلىمدارىنىڭ دوكتورى, پروفەسسور, ۇعا اكادەميگى وڭالباي اياش ۇلى ىقپال ەتتى. ۋنيۆەرسيتەت رەكتورى, تەحنيكا عىلىمدارىنىڭ كانديداتى, پروفەسسور قانات بايبولوۆ جۇرگىزگەن جيىن بارىسىندا 15 ناۋرىزدا وتەتىن رەسپۋبليكالىق رەفەرەندۋم اياسىندا جاڭا كونستيتۋتسيا جوباسى جان-جاقتى تالقىلاندى. العاش بولىپ ءسوز العان قازاقستان رەسپۋبليكاسىنىڭ قۇرمەتتى سۋدياسى, ارداگەرلەر ۇيىمىنىڭ تورالقا مۇشەسى, ج.تاشەنوۆ اتىنداعى ۋنيۆەرسيتەتى قۇقىق جانە بيزنەس كافەدراسىنىڭ پروفەسسورى, زاڭ عىلىمدارىنىڭ دوكتورى بەكەت تۇرعاراەۆ كونستيتۋتسيانىڭ مەملەكەتتىك ستراتەگيالىق دامۋ باعىتىن ايقىندايتىن باستى قۇجات ەكەنىنە توقتالدى.
– كونستيتۋتسيا – ەل دامۋىنىڭ تەمىرقازىعى. جاڭا كونستيتۋتسيادا ادام كاپيتالىن دامىتۋدى باستى باعىتى رەتىندە ايقىندايدى. بۇگىنگى جاڭارۋ ۇدەرىسى – ۋاقىت سۇرانىسىنان تۋىنداعان زاڭدى قادام. ءبىلىم, عىلىم, مادەنيەت جانە يننوۆاتسيا سالالارىنا ەرەكشە ءمان بەرىلىپ, ۇلتتىق مادەنيەتتى قولداۋ مەن تاريحي-مادەني مۇرانى ساقتاۋ كونستيتۋتسيالىق قاعيدات دەڭگەيىنە كوتەرىلدى. بۇل مەملەكەتتىڭ بولاشاعى تابيعي رەسۋرستارعا عانا ەمەس, ەڭ الدىمەن ءبىلىمدى, زياتكەرلىك الەۋەتى جوعارى ازاماتتارعا سۇيەنەتىنىن كورسەتەدى, – دەدى ب.تۇرعاراەۆ.
ال ۋنيۆەرسيتەتتىڭ ۆيتسە-رەكتورى, زاڭ عىلىمدارىنىڭ كانديداتى جانار رىسبەكوۆا كونستيتۋتسيا قۇقىق ۇستەمدىگىنىڭ كەپىلى ەكەنىن اتاپ ءوتتى.
– جاڭا وزگەرىستەر ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتىپ, ادىلەتتى قوعام قۇرۋعا ناقتى تەتىكتەردى ۇسىندى. سونىمەن قاتار اتا زاڭدا نەكە ەرىكتى تۇردە ەر مەن ايەلدىڭ وداعى رەتىندە بەكىتىلۋى – وتباسى ينستيتۋتىن نىعايتۋعا جانە ءداستۇرلى قۇندىلىقتاردى قورعاۋعا باعىتتالعان ماڭىزدى قادام, – دەدى ۆيتسە-رەكتور.
سونىمەن قاتار ەكونوميكا جانە قۇقىق فاكۋلتەتىنىڭ دەكانى, ەكونوميكا عىلىمدارىنىڭ كانديداتى ءالمارا ەركىنقىزى ەكونوميكالىق تۇراقتىلىق پەن الەۋمەتتىك ادىلەتتىلىكتى قامتاماسىز ەتۋ ماسەلەلەرىنە ءمان بەردى. قۇقىق جانە بيزنەس كافەدراسىنىڭ مەڭگەرۋشىسى, زاڭ عىلىمدارىنىڭ كانديداتى نۇرلان رافحان ۇلى قۇقىقتىق مادەنيەتتىڭ ماڭىزىن ايقىندادى. ول قۇقىقتىق مەملەكەت قۇرۋ ورتاق جاۋاپكەرشىلىك ەكەنىن جانە زاڭدى قۇرمەتتەۋ مەن ونى بۇلجىتپاي ورىنداۋ قوعام دامۋىنىڭ باستى شارتى ەكەنىن ايتتى. فيلولوگيا عىلىمدارىنىڭ كانديداتى, دوتسەنت, جازۋشىلار وداعىنىڭ مۇشەسى, جازۋشى زىليحا جانتاسوۆا كونستيتۋتسياداعى ازاماتتاردىڭ قۇقىقتارى مەن ازاماتتىق بولمىس, ءبىلىم مەن عىلىم, وتباسى قۇندىلىقتارى جايىندا باياندادى. «قازاقستان – زاڭعا سۇيەنگەن, بىلىمگە ۇمتىلعان, عىلىمدى دامىتقان, انا ءتىلىن قادىرلەگەن ۇلتتىڭ قولىندا», دەدى جازۋشى. ستۋدەنتتىك پرورەكتور شۇعىلا يبراگيم جاستار ءۇشىن كونستيتۋتسيا مۇمكىندىك پەن جاۋاپكەرشىلىك قۇجاتى ەكەنىن جەتكىزدى.
كەزدەسۋ بارىسىندا قالا اكىمىنىڭ ورىنباسارى سارسەن اباي ۇلى قولدانىستاعى كونستيتۋتسيانىڭ تاۋەلسىز قازاقستاننىڭ قالىپتاسۋى مەن دامۋى كەزەڭىندە ەلدەگى قوعامدىق كەلىسىم مەن ساياسي تۇراقتىلىقتى قامتاماسىز ەتۋدە ماڭىزدى ءرول اتقارعانىن اتاپ ءوتتى.
– اتا زاڭ وسى ۋاقىتقا دەيىن وزىنە جۇكتەلگەن تاريحي ميسسيانى تولىق ورىندادى. قازىرگى كەزەڭدە قوعام مەن مەملەكەتتىڭ دامۋ تالاپتارىنا ساي, مەملەكەتتىلىكتى ودان ءارى نىعايتىپ, زاماناۋي سىن-قاتەرلەرگە جاۋاپ بەرە الاتىن جاڭا كونستيتۋتسيا قابىلداۋ قاجەتتىلىگى تۋىنداپ وتىر, – دەدى سارسەن اباي ۇلى.
سونداي-اق ول جاڭا كونستيتۋتسيا جوباسىندا ۇلتتىق مۇددە مەن ۇلتتىق ەرەكشەلىكتەرگە ايرىقشا ءمان بەرىلگەنىن سارالادى. ونىڭ ايتۋىنشا, قۇجاتتا ادىلەتتىلىك پەن تەڭدىك قاعيداتتارىن باسشىلىققا الاتىن, ازاماتتاردىڭ قۇقىقتارى مەن بوستاندىقتارىن قورعاۋعا باعىتتالعان ماڭىزدى نورمالار كوزدەلگەن.
باسقوسۋ قورىتىندىسىندا ۋنيۆەرسيتەت پروفەسسور-وقىتۋشىلار قۇرامى مەن ستۋدەنتتەر قاۋىمى اتىنان فيلولوگيا عىلىمدارىنىڭ كانديداتى ءلاززات ابەنوۆا رەسپۋبليكالىق رەفەرەندۋمدى قولداۋعا ارنالعان ۇندەۋدى جاريا ەتتى.
ۇندەۋدە «بۇگىنگى مىندەت – اتا زاڭدا ناقتىلانعان قۇندىلىقتاردى كۇندەلىكتى ءومىر سالتىنا اينالدىرۋ. ءبىلىمدى ۇرپاق تاربيەلەۋ, عىلىمدى دامىتۋ, تسيفرلىق ترانسفورماتسيانى ىلگەرىلەتۋ, جەر مەن ەلگە ادال قىزمەت ەتۋ – وسىنىڭ ءبارى كونستيتۋتسيالىق قاعيداتتارمەن ساباقتاس.
ءبىز, جۇمابەك تاشەنوۆ ۋنيۆەرسيتەتىنىڭ پروفەسسور-وقىتۋشىلارى مەن ستۋدەنت-جاستار قاۋىمى كونستيتۋتسيا قاعيداتتارىن تىرەك ەتە وتىرىپ, جاڭا تاريحي كەزەڭدە ءبىر ماقسات, ءبىر مۇددە, ءبىر جاۋاپكەرشىلىكپەن ارەكەت ەتىپ, ادىلەتتى, زياتكەر, قۋاتتى قازاقستاندى بىرگە قۇرايىق!» دەلىنگەن.
شىمكەنت