ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «قازاقستان – جاڭعىرۋدىڭ جاڭا كەزەڭىندە» اتتى ماڭىزدى ءىس-شارا ءوتتى. جيىنعا عىلىم جانە جوعارى ءبىلىم ءمينيسترى, مەملەكەت جانە قوعام قايراتكەرلەرى, پارلامەنت دەپۋتاتتارى, عىلىمي-زەرتتەۋ ينستيتۋتتارى مەن مۋزەي وكىلدەرى, تاريحشى-عالىمدار, پروفەسسور-وقىتۋشىلار قۇرامى جانە ستۋدەنتتەر قاتىستى.
عىلىم جانە جوعارى ءبىلىم مينيسترلىگى, ەۋرازيا ۇلتتىق ۋنيۆەرسيتەتى, تاريحشىلاردىڭ ۇلتتىق كونگرەسى ۇيىمداستىرعان بۇل جيىندا «تاۋەلسىزدىك بارىنەن قىمبات», «ادامزاتتىڭ ابايى», «اباي عيبراتى» جانە «ۇلت تاريحىنداعى تۇلعالار» اتتى ءتورت بىردەي كىتاپتىڭ تۇساۋكەسەر ءراسىمى ءوتتى.
اتالعان ەڭبەكتەر مەملەكەت باسشىسى قاسىم-جومارت توقاەۆ ۇسىنعان ۇلتتىق يدەولوگيا سالاسىنداعى ستراتەگيالىق باستامالاردى قولداۋ ماقساتىندا ازىرلەنگەن. كىتاپتاردىڭ باس رەداكتورى – مەرەيلى جاسقا تولىپ وتىرعان ۇلتتىق عىلىم اكادەمياسىنىڭ اكادەميگى, تاريح عىلىمدارىنىڭ دوكتورى, پروفەسسور, ۋنيۆەرسيتەت رەكتورى ەرلان سىدىقوۆ.
«تاۋەلسىزدىك بارىنەن قىمبات» اتتى العاشقى كىتاپ مەملەكەت باسشىسىنىڭ وسى اتتاس ماقالاسى نەگىزىندە دايىندالعان. عىلىمي-تانىمدىق جيناققا كەيىنگى بەس جىل ىشىندە مەرزىمدى باسىلىمداردا جارىق كورگەن, تاۋەلسىز ەلىمىزدىڭ قالىپتاسۋى مەن دامۋ تاريحىنا ارنالعان مازمۇندى ماقالالار توپتاستىرىلعان. ەڭبەكتە ەل تاۋەلسىزدىگىنىڭ قۇندىلىقتارى, ونى نىعايتۋ جولىنداعى جەتىستىكتەر مەن سىن-قاتەرلەر جان-جاقتى سارالانعان. بۇل كىتاپ – ەگەمەندىكتىڭ ءمانىن تەرەڭ تۇسىنۋگە باعىتتالعان سالماقتى عىلىمي ەڭبەك.
«ادامزاتتىڭ ابايى» اتتى ەكىنشى كىتاپ قازاقتىڭ ۇلى ويشىلى اباي قۇنانباي ۇلىنىڭ 175 جىلدىعىنا ارنالعان ماقالالار جيناعىن قامتيدى. وندا عالىمداردىڭ زەرتتەۋ ەڭبەكتەرى, اقىن-جازۋشىلاردىڭ پايىمداۋلارى, بەلگىلى ابايتانۋشىلارمەن سۇحباتتار جانە تاريحي-دەرەكتى ماتەريالدار ەنگىزىلگەن.
ال «اباي عيبراتى» اتتى ءۇشىنشى كىتاپتا ۇلى اقىننىڭ 180 جىلدىعىنا وراي جارىق كورگەن عىلىمي جانە مەرزىمدى باسىلىمدارداعى ماقالالار توپتاستىرىلعان. بۇل جيناقتا ابايتانۋشىلار مەن قالامگەرلەردىڭ تەرەڭ تالداۋلارى ۇسىنىلىپ, حاكىم مۇراسىنىڭ بۇگىنگى قوعام ءۇشىن ماڭىزى ايقىندالعان. اتالعان ەكى ەڭبەك ۇلتتىق زەرتتەۋلەر, پەرسونولوگيا جانە ادەبيەتتانۋ سالاسىنداعى ماماندارعا, جوعارى وقۋ ورىندارىنىڭ ءبىلىم الۋشىلارىنا جانە جالپى وقىرمان قاۋىمعا ارنالعان.
«ۇلت تاريحىنداعى تۇلعالار» اتتى ءتورتىنشى كىتاپتا ۇلى دالادا ءومىر ءسۇرىپ, ەل تاريحىندا وشپەس ءىز قالدىرعان كورنەكتى قايراتكەرلەر تۋرالى ماتەريالدار جيناقتالعان. عىلىمي ەڭبەكتە ولاردىڭ قوعامدىق-ساياسي قىزمەتى, مەملەكەت قالىپتاستىرۋ جولىنداعى ەڭبەگى مەن عىلىمي مۇرالارى جان-جاقتى قاراستىرىلعان. اتالعان جيناق – قازاق مەملەكەتتىلىگىنىڭ قالىپتاسۋى مەن دامۋىنا ۇلەس قوسقان تاريحي تۇلعالاردىڭ ونەگەلى ءومىر جولىن تانىتاتىن قۇندى زەرتتەۋ.
جيىن بارىسىندا عىلىم جانە جوعارى ءبىلىم ءمينيسترى ساياسات نۇربەك ءسوز سويلەپ, اتالعان ەڭبەكتەردىڭ ۇلتتىق سانانى جاڭعىرتۋداعى ماڭىزىنا توقتالدى.
«ەرلان ءباتتاش ۇلىنىڭ باسشىلىعىمەن جۇزەگە اسىپ جاتقان باستامالار, جاڭا جوبالار مەن جۇيەلى رەفورمالار جوعارى ءبىلىم مەن عىلىم سالاسىنىڭ دامۋىنا تىڭ سەرپىن بەرىپ كەلەدى. ۋنيۆەرسيتەت الەۋەتىن ارتتىرۋ, باسقارۋ ساپاسىن جەتىلدىرۋ, حالىقارالىق سەرىكتەستىكتى كەڭەيتۋ باعىتىنداعى ەڭبەگىڭىز زور قۇرمەتكە لايىق. قازىرگى تاڭدا ەلىمىز جاساندى ينتەللەكت, جاڭا تەحنولوگيالار جانە يننوۆاتسيالىق ەكونوميكا داۋىرىنە قادام باستى. وسى ۇدەرىستە ءبىلىم مەن عىلىمنىڭ ءرولى ايرىقشا. ءسىز قولعا الىپ وتىرعان جوبالار ۇلتتىق مۇددەگە قىزمەت ەتەتىن, ەل بولاشاعىن ايقىندايتىن ستراتەگيالىق قادامدار», دەدى مينيستر.
ودان كەيىن ءسوز العان استانا قالاسى اكىمىنىڭ ورىنباسارى ەسەت بايكەن قالا اكىمى جەڭىس قاسىمبەكتىڭ قۇتتىقتاۋ حاتىن جەتكىزدى.
«سانالى عۇمىرىڭىز بەن ساليقالى قىزمەتىڭىز ەلىمىزدىڭ ءبىلىم بەرۋ جۇيەسىنىڭ دامۋىنا, عىلىم مەن رۋحانياتتىڭ وركەندەۋىنە جانە ەلوردامىزدىڭ زياتكەرلىك الەۋەتىنىڭ ارتۋىنا زور ۇلەس قوسىپ كەلەدى. ءسىز قالىپتاستىرعان عىلىمي مەكتەپ پەن تاربيەلەگەن بىلىكتى شاكىرتتەرىڭىز – ولشەۋسىز ەڭبەگىڭىزدىڭ ايقىن ناتيجەسى. الداعى ۋاقىتتا دا مول تاجىريبەڭىزدى ەل يگىلىگىنە جۇمساپ, جاس ۇرپاققا باعىت-باعدار بەرىپ, ۇلكەن بۋىنعا سەرپىن سىيلاي بەرەتىنىڭىزگە سەنىم مول», دەلىنگەن قۇتتىقتاۋ حاتتا.
ال «قازاق گازەتتەرى» سەرىكتەستىگىنىڭ ديرەكتورى, اكادەميك ديحان قامزابەك ۇلى ەلوردانىڭ رۋحاني تاۋەلسىزدىگى كەنەسارى حان ەسكەرتكىشى مەن ەۋرازيا ۇلتتىق ۋنيۆەرسيتەتىنەن باستالعانىن ايتا كەلىپ, ءوزى باسقارىپ وتىرعان سەرىكتەستىكتىڭ اتىنان مەرەيتوي يەسىن قۇتتىقتادى.
«وتاندىق تاريح عىلىمى, زيالى قاۋىم ءوزىڭىزدى شاكارىم ۋنيۆەرسيتەتىنە, ەۋرازيا ۇلتتىق ۋنيۆەرسيتەتىنە, تاريحشىلاردىڭ ۇلتتىق كونگرەسىنە, اباي اكادەمياسىنا, جالپى عىلىم سالاسىنا ەڭبەگىمەن, شىعارماشىلىعىمەن, بەلسەندىلىگىمەن ەڭبەك سىڭىرگەن عالىم, قوعام قايراتكەرى رەتىندە جاقسى بىلەدى. ۇلت تاريحىن ەلدىك جاڭارۋىمىزدىڭ يگىلىگىنە اينالدىرۋ جولىنداعى ىزدەنىسىڭىز, ۇيىمداستىرۋ شەبەرلىگىڭىز جاڭا بۋىن ءۇشىن قاشاندا ونەگە. مەملەكەت تاريحىن سالالاندىرۋ مەن تانىمالداندىرۋداعى ەرەن باستاماڭىزدى, سونداي-اق قۇنانبايتانۋ, ابايتانۋ, شاكارىمتانۋ, الاشتانۋ, تاعى باسقا باعىتتاعى زەرتتەۋلەرىڭىزدى ارىپتەستەرىڭىز لايىقتى باعالايدى», دەدى د.قامزابەك ۇلى.