قىزىلورداداعى تاريحي-ولكەتانۋ مۋزەيىندە داڭقتى باتىر, قاھارمان قولباسشى بۇقارباي باتىر ەستەكباي ۇلىنىڭ قىلىشى تۇر. XIX عاسىردىڭ العاشقى شيرەگىندە دۇنيەگە كەلگەن باتىر ەسىمى پاتشا وتارشىلارى مەن قوقان بەكتەرىنە قارسى كۇرەسىمەن, ەلىن كاسىپكە باۋلىعان ەڭبەگىمەن ءمالىم.
ەل تاۋەلسىزدىگى جولىندا اتقا قونعان كەنەسارى حان باستاعان ۇلت ازاتتىق كوتەرىلىسىنىڭ بەلگىلى ساردارلارىنىڭ ءبىرى بولعان باتىر 1838 جىلى اقمولا بەكىنىسىن الۋعا قاتىسادى. كەيىننەن سىر بويىندا پاتشا اسكەرى مەن قوقان ساربازدارىنا قارسى قول باستاعان باتىر تۋرالى دەرەكتەر ورىنبور, سانكت-پەتەربۋرگ پەن تاشكەنت ارحيۆتەرىندە ساقتالعان. جاسى كەلگەن شاعىندا جۇرتتى ارىق قازۋعا جۇمىلدىرىپ, ەلىن ەگىنشىلىككە باۋليدى. ۇزىندىعى 25-30 شاقىرىمدىق سول ارىق ءالى دە كادەگە اسىپ تۇر.
ءبىر جارىم عاسىردان اساتىن تاريحى بار قىلىش وبلىستىق تاريحي-ولكەتانۋ مۋزەيىنە بىلتىر ەكسپوزيتسيا جاسالعان كەزدە ۋاقىتشا اكەلىنىپتى. نەگىزگى يەسى – باتىر اتىنداعى اۋىلدا بوي كوتەرگەن مۋزەي. كەزىندە قىلىشتى اۋىل مۋزەيىنە باتىردىڭ شوبەرەسى جولامان الدانازاروۆ وتكىزگەن ەكەن. ءجۇزىنىڭ باس جاعى قايراققا ءجيى تۇسكەندىكتەن ازداپ ويىڭقى تارتقان. قىنى اعاشتان جاسالىپ, سىرتى بىلعارىمەن قاپتالعان.
باتىردان قالعان مۇرالار قاتارىندا قىلىشى, تۋى مەن دوڭگەلەك ءمورى دە بار.
قىزىلوردا