كەنشىلەر قالاسىندا «Unico Play» ونلاين-كينوتەاترىنىڭ العاشقى سپورتتىق دراماسى – «ترەنەر اعا» سەريالىنىڭ جابىق كورسەتىلىمى ءوتتى. بۇل – كاسىپقوي بوكس تاقىرىبىن ارقاۋ ەتكەن وتاندىق تۇڭعىش تەلەحيكايا.
سەريال سەگىز بولىمنەن تۇرادى. قازاق تىلىندە تۇسىرىلگەن, ورىسشا سۋبتيترمەن ۇسىنىلادى. العاشقى سەريالارى كورەرمەنگە جول تارتتى. سيۋجەت جەلىسى بوكسشى دارحاننىڭ تاعدىرىنا قۇرىلعان. اكەسىنىڭ قازاسىنان كەيىن تۋعان قالاسىنا ورالعان ول مۇراعا قالعان ەسكى بوكس زالىن قابىلداپ الادى. كاسىپكەردىڭ قوماقتى قارجى ۇسىنىپ, زالدى ساتىپ الۋعا تاباندى تۇردە كىرىسۋى باستاپقىدا وڭاي شەشىمدەي كورىنەدى. الايدا اكەسىنىڭ ءولىمى كەزدەيسوق بولماعانىن سەزگەن ساتتەن باستاپ, دارحان ءۇشىن ءبارى وزگەرەدى. شىندىقتى ىزدەۋ ونى استىرتىن جەكپە-جەك الەمىنە جەتەلەيدى. سول جەردە ول اكەسىنىڭ بۇرىنعى شاكىرتى بولعان ورىمدەي جاستى قۇتقارىپ قالادى. وسى ساتتەن باستاپ دارحان كوشە بالالارىنا تىرەك بولار «ترەنەر اعاعا» اينالادى. سەريالدىڭ وزەگىندە كۇش قولدانۋ مەن قىلمىستىق قىسىمعا قارسى شىنايى كۇش – ءوزىن-ءوزى باقىلاۋ مەن جاۋاپكەرشىلىك يدەياسى جاتىر.
جوبانىڭ رەجيسسەرى – كورەرمەنگە «Qarga» سەريالى ارقىلى تانىس بەيبىت ونەر. بۇعان دەيىن دە الەۋمەتتىك رەڭكى باسىم تۋىندىلارىمەن كوزگە تۇسكەن رەجيسسەر بۇل جولى سپورت ارقىلى قوعامدى سويلەتۋدى شەشىپتى. «سەريالدىڭ باستى كەيىپكەرى دارحان تەك بوكسقا باۋليتىن جاتتىقتىرۋشى ەمەس, ول جاسوسپىرىمدەردى قيىندىقپەن كۇرەسۋگە, شەشىم قابىلداۋعا جانە كۇردەلى جاعدايلاردا ءوز بولمىسىن ساقتاۋعا ۇيرەتەدى. ءبىز سپورت پەن تالىمگەرلىكتىڭ ءومىردى قالاي وزگەرتىپ, جاس بۋىنعا جاڭا مۇمكىندىكتەر اشاتىنىن كورسەتكىمىز كەلدى», دەيدى ول. ءتۇسىرىلىم قاراعاندى مەن پريشاحتينسكىدە ءوتتى. جاساندى دەكوراتسيادان گورى ءومىردىڭ ءوز تىنىسى تاڭدالعان. جەكپە-جەك كورىنىستەرىن حالىقارالىق «Nomad Stunts» توبىنىڭ مۇشەسى قانات قۇدياروۆ ساحنالاعان. ال باستى ءرولدى سومداعان اكتەر ءۇش اي بويى ارنايى بوكس جانە فيزيكالىق دايىندىقتان وتكەن. دارحان بەينەسىن جاس اكتەر قۋانىش قۇدايبەرگەن سومدادى. «بۇگىندە كينو تەك ويىن-ساۋىق ەمەس, مادەني جانە يدەولوگيالىق ورتانىڭ ماڭىزدى بولىگىنە اينالدى. جاستار ەكران ارقىلى سپورتقا دەگەن سۇيىسپەنشىلىكتى سەزىنىپ, شابىت السا, ەڭبەگىمىزدىڭ اقتالعانى», دەيدى ول.
سەريالعا جاس اكتەرلەرمەن قاتار بوكستان وليمپيادا جەڭىمپازدارى دا تارتىلعان. جوبانىڭ پرەمەرالىق كورسەتىلىمىن ۇيىمداستىرۋعا «Startkino» قوعامدىق بىرلەستىگى مەن «Ortau» كرەاتيۆتى ورتالىعى اتسالىستى. ولار قاراعاندى وڭىرىندە جاستار شىعارماشىلىعىن قولداۋعا باعىتتالعان باستامالاردى جۇيەلى تۇردە جۇزەگە اسىرىپ كەلەدى.
قاراعاندى وبلىسى