كەيىنگى كەزدەرى اۋعانستانداعى تاليبان ۇكىمەتى مەن پاكىستان اراسىنداعى قارىم-قاتىناس كۇرت شيەلەنىسە تۇسكەن. وتكەن اپتادا ەكى ەل شەكاراسىنداعى قارۋلى قاقتىعىستا ونداعان ادام قازا تاپتى. قاقتىعىس مۇنىمەن بىتپەي, تاليباندار پاكىستاننىڭ اسكەري شەپتەرىنە شابۋىل جاسادى. بۇعان جاۋاپ قايتارعان پاكىستان كابۋل, قانداعار مەن پاكتيا پروۆينتسيالارىنا وق جاۋدىردى.
اۋعانستان پاكىستاننىڭ يادرولىق نىسانىنا سوققى جاسادى. وسىدان سوڭ پاكىستان بيلىگى تاليباندارمەن شيەلەنىس «اشىق سوعىسقا» ۇلاسقانىن مالىمدەدى. اقپارات ءمينيسترى اتتاۋللا تارار X ارناسىندا پاكىستان ارمياسىنىڭ كابۋل, پاكتيا مەن قانداعار پروۆينتسيالارىنداعى نىساندارعا سوققى بەرگەنىن راستادى. اۋعان ۇكىمەتى مۇنىڭ سالدارىنان ايەلدەر مەن بالالاردى قوسا العاندا, 18 ادام قازا تاپتى دەپ مالىمدەدى.
ء«بىزدىڭ كۇشتەرىمىز كەز كەلگەن اگرەسسيۆتى امبيتسيالاردى جويا الادى. بۇكىل ۇلت پاكىستان قارۋلى كۇشتەرىمەن يىق تىرەسە جۇمىس ىستەيدى», دەپ مالىمدەدى پاكىستان پرەمەر-ءمينيسترى شەحباز شاريف.
ال اۋعانستان پاكىستاننىڭ اسكەري شەپتەرىنە شابۋىلداعان سوڭ, 55 پاكىستاندىق سارباز قازا تاپقانىن, سونداي-اق 19 اسكەري بەكىنىستى باسىپ العانىن مالىمدەدى. الايدا يسلاماباد كابۋلدىڭ بۇل مالىمدەمەسى شىندىققا جاناسپايتىنىن ايتىپ, ەكى جاۋىنگەردىڭ قازا تاپقانىن رەسمي مالىمدەدى. بۇدان سوڭ كابۋل, قانداعار مەن پاكتيا پروۆينتسيالارى وقتىڭ استىندا قالىپ, يسلاماباد 133 اسكەري قازا تاپقانىن حابارلادى. بۇل مالىمەتتى تاليباندار دا جالعان دەپ, 8 سارباز قازا تاپقانىن ايتتى.
اۋعانستان مەن پاكىستان اراسىنداعى قاقتىعىستىڭ شيەلەنىسۋىنە وتكەن جىلدىڭ كۇزىندە كابۋلدا ەكى جارىلىس بولىپ, وعان تاليبان يسلامابادتى كىنالاۋى سەبەپ بولدى. سودان كەيىن اۋعانستان كۇشتەرى شەكارا بەكەتىندە پاكىستان اسكەرلەرىنە وق جاۋدىردى. جاۋاپ رەتىندە پاكىستان ارمياسى اۋىر ارتيللەريامەن, تانكتەرمەن, دروندارمەن, جويعىش ۇشاقتارمەن شابۋىل جاسادى.
قاقتىعىس 2025 جىلدىڭ قازان ايىنىڭ سوڭىنا دەيىن جالعاستى. سول كەزدە تۇركيا مەن قاتار اراعايىندىلىق جاساپ, دوحادا وتكەن كەلىسسوزدەردە اتىستى توقتاتۋعا كەلىستى. الايدا بۇل كەلىسسوزدەر بەيبىتشىلىك كەلىسىمىنە قول جەتكىزە المادى.
بۇۇ باس حاتشىسى جاعدايدىڭ ۋشىعۋىنا بايلانىستى الاڭداۋشىلىق ءبىلدىردى. انتونيۋ گۋتەرريش ەكى ەلدى قاقتىعىستى دەرەۋ توقتاتۋعا شاقىرىپ, كەز كەلگەن كەلىسپەۋشىلىكتى ديپلوماتيالىق جولمەن شەشۋگە ۇندەدى.
ەلىمىزدىڭ سىرتقى ىستەر مينيسترلىگى پاكىستان مەن اۋعانستان اراسىنداعى سوققىلاردان كەيىن قازا تاپقاندار مەن زارداپ شەككەندەردىڭ اراسىندا قازاقستان ازاماتتارى جوق ەكەنىن مالىمدەدى. ءسىم تاراتقان اقپاراتقا سايكەس, جانجالعا بايلانىستى كونسۋلدىق مەكەمەلەرگە ءوتىنىش تۇسپەگەن.
ء«سىم جاعدايدى قاداعالاۋدى جالعاستىرادى جانە قاجەت بولعان جاعدايدا كونسۋلدىق-قۇقىقتىق كومەك كورسەتەدى, سونداي-اق وقيعانىڭ ورشۋىنە قاراي قوسىمشا اقپارات بەرەدى», دەلىنگەن ۆەدومستۆو مالىمدەمەسىندە.
جالپى, اۋعانستان مەن پاكىستان اراسىنداعى شيەلەنىس حح عاسىردىڭ ورتاسىندا باستالدى. ەكى ەلدىڭ شەكارا ايماعى 1947 جىلى پاكىستان ۇلىبريتانيادان تاۋەلسىزدىك العاننان بەرى قاقتىعىس ايماعى بولىپ قالا بەردى. پاكىستاننىڭ ءۇندى يەلىكتەرى مەن اۋعانستان مەملەكەتى اراسىنداعى شەكارا 1893 جىلى ەكىنشى اعىلشىن-اۋعان سوعىسىنان (1878–1881) كەيىن انىقتالعان ديۋراند سىزىعى بويىنشا بەلگىلەندى. الايدا اۋعانستان بيلىگى بۇل شەكارانى مويىنداۋدان باس تارتىپ, ەل پارلامەنتى 1949 جىلى ونى بەلگىلەيتىن كەلىسىمدەردى جارامسىز دەپ تانىدى. وسىدان باستاپ ەكى ەل بۇل داۋدىڭ ءتۇيىنىن تاپپاي كەلەدى. وسىلايشا, جەر داۋى قارا حالىقتىڭ باس قايعىسىنا اينالدى.