يسا بايزاقوۆ اتىنداعى وبلىستىق فيلارمونيا بيىل قوس بىردەي ايتۋلى داتانى اتاپ وتەدى. ونەر ورداسىنىڭ قۇرىلعانىنا 85 جىل تولسا, اقىن, كومپوزيتور يسا بايزاقوۆ ەسىمىنىڭ بەرىلگەنىنە 55 جىل تولىپ وتىر.
وڭىرىمىزدەگى ىرگەلى ونەر ورداسىنىڭ مەرەيتويلىق ءىس-شارالارى باستالىپ كەتتى. جۋىقتا «الەم ىرعاقتارى» اتتى دجاز وركەسترىنىڭ كونتسەرتى جانە سيرەك كەزدەسەتىن ارحيۆتىك قۇجاتتار قويىلعان كورمە ۇيىمداستىرىلدى. كورمەدە 1941 جىلعى سوعىس ءورتى تۇتانعان قيىن-قىستاۋ كەزەڭدە جامبىل اتىنداعى قازاق مەملەكەتتىك فيلارمونيانىڭ فيليالى رەتىندە اشىلعان ونەر وشاعىنىڭ قالىپتاسۋ تاريحى باياندالعان.
ء«بىزدىڭ فيلارمونيا – وڭىرىمىزدەگى كاسىبي مۋزىكا ونەرىنىڭ باستاۋىندا تۇرعان ەڭ كونە مادەنيەت مەكەمەسى. سوعىس جىلدارىندا اسپاپسىز, كوستيۋمسىز, ءتىپتى تۇراقتى عيماراتسىز جۇمىس ىستەگەن العاشقى ارتىستەرىمىزدىڭ ەڭبەگى ەرەن. بۇگىندە فيلارمونيادا 300-گە جۋىق مامان ەڭبەك ەتىپ, اكادەميالىق ونەردىڭ ىرگەتاسىن نىعايتىپ كەلەدى», دەيدى فيلارمونيا باسشىسى امانگەلدى قوجانوۆ.
بۇگىندە ونەر ۇجىمىنىڭ قۇرامىندا رۇستەمبەك وماروۆ اتىنداعى قازاق حالىق اسپاپتار وركەسترى, سيمفونيالىق جانە دجاز وركەسترلەرى, «نۇر», «شەرنياز» بي ۇجىمدارى مەن «رەترو» ۆوكالدىق توبى سياقتى جالپى سانى 9 شىعارماشىلىق ۇجىم جەمىستى جۇمىس ىستەپ تۇر. مەرەيتويلىق ءىس-شارالار 83-ءشى جانە 84-فيلارمونيالىق ماۋسىمدار بويى جالعاسىن تاۋىپ, كۇز ايىندا ۇلكەن گالا-كونتسەرتپەن قورىتىندىلانباق. 85 جىلدىق تاريحى بار ونەر شاڭىراعى بۇگىندە ۇلتتىق ءداستۇر مەن زاماناۋي ترەندتەردى ۇشتاستىرعان ايماقتىڭ باستى مادەني برەندىنە اينالىپ وتىر.
پاۆلودار وبلىسى