پرەزيدەنت قاسىم-جومارت توقاەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ وڭدەۋ ونەركاسىبىن دامىتۋدى ىنتالاندىرۋ بويىنشا قابىلدانىپ جاتقان شارالار تۋرالى باياندادى, دەپ جازادى Egemen.kz.
«وڭدەۋ ونەركاسىبىنىڭ قازىرگى ءوسۋ قارقىنى ەكونوميكانى تولىققاندى ءارتاراپتاندىرۋ ءۇشىن جەتكىلىكسىز. بۇعان قاجەتتى سەرپىن بەرۋ ماقساتىندا وڭدەۋشى كاسىپورىنداردىڭ دامۋىن ىنتالاندىراتىن جوبالار جۇزەگە اسىرىلىپ جاتىر», دەدى ولجاس بەكتەنوۆ.
بۇگىنگى تاڭدا «بايتەرەك» حولدينگى جەلىسى بويىنشا قارجىلاندىرۋ تەتىكتەرى ارقىلى مەتاللۋرگيا, ماشينا جاساۋ جانە اگروونەركاسىپ كەشەنى سالالارىندا جوعارى دەڭگەيدە وڭدەلگەن ءونىم شىعاراتىن جوبالاردى جۇزەگە اسىرۋ جالعاسىپ جاتىر.
«سالالىق مينيسترلىكتەرگە ءارى قاراي وڭدەۋگە باعىتتالعان ءوندىرىس ورىندارىن اشۋ ماسەلەلەرىن الدىن الا جان-جاقتى پىسىقتاۋ مىندەتى قويىلدى. جالپى العاندا, وتكەن جىلى 200-دەن استام جاڭا ءوندىرىس ورنى ىسكە قوسىلدى, تاعى وسىنشا نىساننىڭ قۇرىلىسى اياقتالۋعا جاقىن», دەدى پرەمەر-مينيستر.
وڭدەۋ سالاسىنا كەلەتىن ينۆەستيتسيا كولەمىنىڭ تۇراقتى ءوسۋى ءۇشىن ەكونوميكانى شيكىزاتپەن قامتاماسىز ەتۋ ماڭىزدى, سوعان بايلانىستى گەولوگيالىق بارلاۋ جۇمىستارىن دامىتۋعا ەرەكشە كوڭىل بولىنەدى.
10 كۇندە جەڭىلدەتىلگەن نەسيە: ۇكىمەت بيزنەستى قولداۋدىڭ جاڭا تەتىكتەرىن ازىرلەپ جاتىر
پرەمەر-مينيستر 2025 جىلى 1:50 000 ماسشتابتاعى گەولوگيالىق كارتانى ازىرلەۋ جۇمىستارى باستالعانىن اتاپ ءوتتى. ول قازىر پايدالانىلىپ جۇرگەن كەڭەستىك كەزەڭدە جاسالعان 1:200 000 ماسشتابتاعى كارتانىڭ ورنىنا قولدانىلادى.
پرەزيدەنت تاپسىرماسىنا سايكەس, الداعى 3 جىلدا مەملەكەت تاراپىنان گەولوگيالىق بارلاۋ جۇمىستارىنا شامامەن 500 ملن دوللار ينۆەستيتسيا سالىنادى. سالىستىرۋ ءۇشىن ايتا كەتسەك, سوڭعى 30 جىلدا بۇل سالاعا بارلىعى 760 ملن دوللار جۇمسالعان. ناتيجەسىندە پەرسپەكتيۆاسى جوعارى ۋچاسكەلەردە سەيسميكالىق سىناقتاردان باستاپ اەروگەوفيزيكالىق زەرتتەۋلەرگە دەيىن بارلىعى 100 مىڭ شارشى شاقىرىم اۋماق زەرتتەلەدى. كەيىن ءار جىل سايىن قوسىمشا 30 مىڭ شارشى شاقىرىم اۋماقتا بارلاۋ جۇمىستارى جۇرگىزىلەدى.
شيكىزات بازاسىن ۇلعايتۋ ماقساتىندا مەملەكەت قارجىسىنان بولەك, گەولوگيالىق بارلاۋعا جەكە ينۆەستيتسيالار دا تارتىلىپ جاتىر. 2023 جىلدان بەرى ونىڭ كولەمى 500 ملن دوللاردان استى.
سونداي-اق ۇكىمەت باسشىسى جەرگىلىكتى بيۋدجەتتەردىڭ رەسپۋبليكالىق بيۋدجەتكە تاۋەلدىلىگى 34%-عا دەيىن تومەندەيتىنىن دە اتاپ ءوتتى.
ولجاس بەكتەنوۆ بيىل 2,6 گۆت ءداستۇرلى جانە جاڭارتىلاتىن ەنەرگيا كوزدەرى ىسكە قوسۋ جوسپارلانعانىن دا باياندادى.