20 قاڭتاردا جاپونيادا قالىڭ قار جاۋدى. وسى ۋاقىت ىشىندە ەلدە 45 ادام قازا تاۋىپ, 500-دەن استام ادام جاراقات الدى. ەڭ كوپ قۇرباندار نيگاتا, اكيتا, حوككايدو, ياماگاتا جانە اوموري پرەفەكتۋرالارىندا تىركەلدى, دەپ حابارلايدى Egemen.kz تاسس اگەنتتىگىنە سىلتەمە جاساپ.
جەرگىلىكتى بيلىكتىڭ حابارلاۋىنشا, قۇربانداردىڭ كوبى شاتىردى اق ۇلپادان تازالاپ ءجۇرىپ, قۇلاپ كەتكەن كوممۋنالدىق قىزمەتكەرلەر مەن قاريالار. قۇتقارۋ قىزمەتى قارقىندى جۇمىس ىستەپ جاتىر. قاردى كۇرەۋگە ساربازدار دا تارتىلدى. سينوپتيكتەردىڭ ەسكەرتۋىنشە, اپتا اياعىنا قاراي كۇن بۇزىلۋى مۇمكىن.ەلدىڭ سولتۇستىگى مەن جاپون تەڭىزىنىڭ جاعالاۋىنداعى جاعداي اسىرەسە اۋىر. سينوپتيكتەردىڭ ەسكەرتۋىنشە, كەي ايماقتاردا قار قالىڭدىعى 50 سم-گە جەتكەن جانە تۇرعىن ۇيلەردىڭ قۇلاۋ قاۋپى بار.
بيلىك تۇرعىنداردى مۇمكىندىگىنشە ۇيدەن شىقپاۋعا جانە قاۋىپسىزدىك شارالارىن ساقتاۋعا شاقىرىپ وتىر, جاعداي ءالى دە كۇردەلى. مامانداردىڭ بولجامىنشا, ەلدە دەمالىس كۇندەرى قار جاۋى ىقتيمال.
ايتا كەتەيىك, مەملەكەت باسشىسى قاسىم-جومارت توقاەۆ جاپونيانىڭ سولتۇستىك وڭىرىندە جاۋعان قالىڭ قار سالدارىنان كوپتەگەن ادامنىڭ قازا تابۋىنا بايلانىستى پرەمەر-مينيستر ساناە تاكايچيگە كوڭىل ايتۋ جەدەلحاتىن جولدادى.