شوتتىڭ دا سۇراۋى بار

ەگەر شوت جەكە ماقساتقا اشىلسا, ول «كۇندەلىكتى ومىرگە ارنالعان» دەگەن ساناتقا كىرەدى. ياعني جالاقى الۋ, زەينەتاقى ءتۇسۋى, كوممۋنالدىق تولەمدەر جاساۋ, دۇكەندە ساۋدا جاساۋ سياقتى تۇرمىستىق ىستەرگە عانا قولدانىلادى. بۇل شوت ارقىلى بيزنەس جۇرگىزۋگە, تابىس تابۋعا نەمەسە كاسىبي قىزمەتتەن اقشا قابىلداۋعا بولمايدى. ۇلتتىق بانك وسىلايشا جەكە ادامنىڭ اقشاسى مەن جۇمىس ارقىلى تابىلاتىن كىرىستى شاتاستىرماي, ەكى بولەك ۇستاۋدى كوزدەپ وتىر. بانك تە, كليەنت تە شوتتىڭ قانداي ماقساتتا اشىلعانىن الدىن الا ءبىلىپ وتىرادى. ەگەر ادام بانككە جەكە تۇلعا رەتىندە شوت اشسا, ول شوت ارقىلى كاسىپكەرلىك نەمەسە كاسىبي قىزمەت جۇرگىزىلمەيدى دەپ جازباشا تۇردە راستاۋعا ءتيىس. سونداي-اق بۇل شوت ءوزىن-ءوزى جۇمىسپەن قامتىعاندارعا ارنالعان ارنايى سالىق رەجىمىندە دە پايدالانىلمايتىنى كورسەتىلەدى. مۇنىڭ ءبارى ۇلتتىق بانكتىڭ 2025 جىلعى 31 جەلتوقساندا قابىلدانعان №111 قاۋلىسىنا ەنگىزىلگەن.

ەندى «قاراپايىم دەبەت كارتامەن نە ىستەۋگە بولمايدى؟» دەگەن سۇراق تۋىندايدى. جاڭا ەرەجەگە سايكەس, ەگەر بانكپەن بولەك كەلىسىم جاسالماسا, جەكە شوت ارقىلى كاسىپكەرلىك قىزمەت جۇرگىزۋگە, ءوزىن ءوزى جۇمىسپەن قامتىعان رەتىندە تابىس تابۋعا, نوتاريۋس نەمەسە ادۆوكات رەتىندە جۇمىس ىستەۋگە, اتقارۋشىلىق قۇجاتتار بويىنشا تولەم قابىلداۋعا, مەدياتسيا ارقىلى داۋ شەشۋگە, باسقا دا كاسىبي قىزمەت تۇرلەرىنە تىيىم سالىنادى.

ۇلتتىق بانك بۇل وزگەرىستى «قيىنداتۋ» ەمەس, اقشا قوزعالىسىن رەتكە كەلتىرۋ ماقساتىندا ەنگىزىپ وتىرمىز دەيدى. كەيىنگى جىلدارى كوپتەگەن ازامات بيزنەسكە قاتىستى تولەمدەردى جەكە شوت ارقىلى جۇرگىزگەن. بۇل باقىلاۋدى قيىنداتادى ءارى سالىق سالۋدا تۇسىنبەۋشىلىك تۋعىزادى. ەرەجەنى بۇزعاندارعا جاۋاپكەرشىلىك بولۋى مۇمكىن, بىراق ناقتى قانداي جازا قولدانىلاتىنى ازىرگە ايتىلعان جوق.

كوپ ادامدى مازالايتىن تاعى ءبىر سۇراق: بۇرىن اشىلعان شوتتارعا نە بولادى؟ بۇل تالاپ تەك 2026 جىلعى 11 قاڭتاردان كەيىن اشىلاتىن جاڭا شوتتارعا قاتىستى. بۇرىننان بار شوتتاردى جاپپاي قايتا راسىمدەۋ مىندەتى جوق. دەگەنمەن بانك شوتتاعى وپەراتسيالار كاسىپكەرلىككە ۇقساپ كەتسە, ونىڭ ماقساتىن ناقتىلاپ سۇراۋى مۇمكىن.