سەمەيدەگى وبلىستىق جەدەل مەديتسينالىق جاردەم ستانساسىنا سۋ جاڭا سانيتارلىق كولىكتەر تابىستالدى. ءوڭىر باسشىسى بەرىك ءۋالي ارنايى تەحنيكانىڭ العاشقى لەگى – 10 اۆتوكولىكتىڭ كىلتىن مەديتسينا قىزمەتكەرلەرىنە سالتاناتتى تۇردە تاپسىردى.
بۇعان دەيىن ستانساداعى تەحنيكالاردىڭ توزۋ دەڭگەيى 90 پايىزدان اسىپ, وڭىرگە مۇنداي ارنايى كولىكتەر سوڭعى رەت 2020 جىلى الىنعان ەدى. وسى تۇيتكىلدى شەشۋ ماقساتىندا وبلىستىق بيۋدجەت ەسەبىنەن, «ونەركاسىپتى دامىتۋ قورى» اق ارقىلى ليزينگتىك نەگىزدە 100 سانيتارلىق اۆتوكولىك ساتىپ الىندى. «Hyundai», «JAC», «گازەل» ماركالى تەمىر تۇلپارلار GPS-ناۆيگاتسيامەن, شۇعىل كومەككە قاجەتتى زاماناۋي جابدىقتارمەن تولىق قامتىلعان. جوسپارعا سايكەس, قىركۇيەككە دەيىن كولىكتەردىڭ 67-ءسى وبلىس ورتالىعىنا, 33-ءى اۋداندارداعى مەديتسينالىق ۇيىمدارعا ۇلەستىرىلەدى. سالتاناتتى شارادا وبلىس اكىمى بەرىك ءۋالي مەملەكەت باسشىسىنىڭ تاپسىرماسىنا سايكەس, حالىقتىڭ تۇرمىس ساپاسىن ارتتىرۋ باستى مىندەت ەكەنىن اتاپ ءوتتى.
«مەملەكەتتىڭ ءبىلىم مەن دەنساۋلىق ساقتاۋ سالاسىنا بولگەن قارجىسى, ەڭ الدىمەن, ازاماتتاردىڭ يگىلىگىنە قىزمەت ەتۋگە ءتيىس. بۇگىن تابىستالىپ وتىرعان جەدەل جاردەم كولىكتەرى – وسى باعىتتاعى جۇيەلى جۇمىستىڭ ءبىر پاراسى. بۇل تەحنيكالار شۇعىل مەديتسينالىق كومەكتىڭ قولجەتىمدىلىگىن ارتتىرىپ, قىزمەت ساپاسىن جاقسارتۋعا ءسوزسىز ۇلەس قوسادى», دەدى ءوڭىر باسشىسى.
ايتا كەتەيىك, قازىر وبلىستىق جەدەل جاردەم ستانساسىندا 872 ادام ەڭبەك ەتەدى. مەكەمە جىلىنا 250 مىڭنان استام شاقىرتۋعا شىعىپ, ءوڭىردىڭ 620 مىڭ تۇرعىنىنا قىزمەت كورسەتەدى.
وڭىردە دەنساۋلىق ساقتاۋ سالاسىنىڭ ينفراقۇرىلىمىن دامىتۋ ءىسى دە قارقىن العان. بىلتىر العاشقى كومەك كورسەتەتىن 60-تان استام نىسان بوي كوتەردى. ماقانشى اۋىلىندا كۇندىزگى ستاتسيونارى, زەرتحاناسى, ايەلدەر كونسۋلتاتسياسى بار دارىگەرلىك امبۋلاتوريا اشىلدى. اياگوز اۋدانىنىڭ كوپسالالى ورتالىق اۋرۋحاناسىنىڭ رەانيماتسيالىق بولىمشەسىنىڭ قوسىمشا قۇرىلىسى اياقتالدى. وسى مەكەمەدە ماگنيتتىك-رەزونانستىق توموگراف ورنالاستىرىلاتىن عيماراتپەن, ءۇرجار اۋدانىنىڭ كوپسالالى ورتالىق اۋرۋحاناسى بازاسىندا «تەرى ارقىلى كورونارلىق ارالاسۋ ورتالىعى» قوسىمشا عيماراتىنىڭ قۇرىلىسى باستالدى. سونداي-اق 300 ورىندىق وبلىستىق كوپبەيىندى اۋرۋحانا مەن 200 ورىندىق بالالار اۋرۋحاناسىنىڭ جوبالىق-سمەتالىق قۇجاتتاماسى ازىرلەنىپ جاتىر. جالپى, وبلىس اكىمىنىڭ ءباسپاسوز قىزمەتى ءمالىم ەتكەندەي, بىلتىر وبلىستىڭ دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن نىعايتۋعا 6,5 ملرد تەڭگەدەن استام قارجى بولىنگەن.
اباي وبلىسى