استانا. 25 ماۋسىم. يتاليادا ەجەلگى ريمگە تيەسىلى ساۋدا كەمەسىنىڭ قالدىقتارى تابىلدى. بۇل تۋرالى 24.kz حابارلادى.
كونە كەمەنى جەرگىلىكتى پوليتسيا كورسيكا مەن ساردينيا ارالدارىنىڭ اراسىنداعى شىعاناقتان تاۋىپ العان. مامانداردىڭ ايتۋىنشا, كەمە شامامەن 2 مىڭ جىل بۇرىن جاسالعان. بىراق جاقسى ساقتالىپتى. ۇزىندىعى – 18, ەنى – 7 مەتر.
كەمەگە قۇرىلىس ماتەريالدارى تيەلگەن. ساراپشىلار بۇل ماتەريالدار ەجەلگى ءريمدى باسقارعان جوعارى لاۋازىمدى تۇلعانىڭ نەمەسە باي كوپەستىڭ ءزاۋلىم ءۇيىن سالۋعا ارنالعان بولۋى كەرەك دەپ بولجاۋدا. سونداي-اق, سۋ كولىگىنىڭ باعىتىنا ساراپتاما جاساعان ماماندار كەمە يسپانيا جاققا نەمەسە ساردينيانىڭ باتىس جاعالاۋىنا بەت العان بولۋى مۇمكىن دەيدى.
ايتا كەتەيىك, قالدىقتار 50 مەتر تەرەڭدىكتەن تابىلدى. ارحەولوگتار مۇنى «عىلىمي قۇندىلىعى جوعارى ولجا» دەپ باعالاپ وتىر.
تالعات رايىمبەك.
دەرەك, سۋرەت: 24.kz.