ەلىمىزدە شەتەلدىك جانە وتاندىق فيلمدەردى پروكاتقا شىعارماس بۇرىن ولاردى ارنايى ساراپتاما كوميسسياسى قارايتىن بولادى. بۇل تۋرالى پرەمەر-مينيستر ولجاس بەكتەنوۆ دەپۋتاتتاردىڭ ساۋالىنا بەرگەن جاۋابىندا مالىمدەدى, دەپ جازادى Egemen.kz.
بۇعان دەيىن ءماجىلىستىڭ جالپى وتىرىسىندا دەپۋتات ەرلان سايروۆ سوڭعى كەزدەرى قوعامدا بىرلىك پەن تۇتاستىقتى نىعايتۋدان گورى, حالىقتى جىككە بولۋگە بەيىم ۇدەرىس كۇشەيىپ جاتقانىن ايتىپ, ۇكىمەت باسشىسىنا ساۋال جولداعان بولاتىن. دەپۋتات جاسوسپىرىمدەر ءۇشىن كينو جانە مەدياكونتەنتتىڭ تاربيەلىك ىقپالى جوعارى ەكەنىن ەسكەرىپ, وسىعان قاتىستى ءبىرشاما ۇسىنىسىن ورتاعا سالىپ, اقپارات جانە مادەنيەت مينيسترلىگى جانىنان كينوپروكاتقا شىعاتىن وتاندىق فيلمدەردىڭ مازمۇنىن الدىن الا كوركەمدىك-ەستەتيكالىق, يدەولوگيالىق, ۇلتتىق بىرلىك تۇرعىسىنان ساراپتايتىن تۇراقتى كوميسسيا قۇرۋدى ىسكە اسىرۋ قاجەت ەكەنىن ۇسىنعان.
ولجاس بەكتەنوۆ جاۋابىندا ەل كينوتەاترلارىنداعى فيلمدەر پروكاتىنىڭ مونيتورينگى كۇشەيەتىنىن دە اتاپ ءوتتى.
«بۇعان قاتىستى ۇكىمەت ازىرلەگەن تۇزەتۋلەردى ءماجىلىس 2025 جىل سوڭىندا قابىلدادى. كەيىن ولار سەناتتىڭ قاراۋىنا ەنگىزىلگەن. تۇزەتۋلەر قابىلدانعاننان كەيىن شەتەلدىك جانە وتاندىق فيلمدەردى ەلىمىزدە پروكاتقا شىعارماس بۇرىن ولاردى ارنايى ساراپتاما كوميسسياسى قارايتىن بولادى. الداعى ۋاقىتتا مادەنيەت سالاسىنداعى زاڭنامالىق تالاپتاردى بۇزۋعا جول بەرمەۋ ماقساتىندا مادەنيەت جانە اقپارات مينيسترلىگى ۇلتتى بىرلىككە شاقىراتىن مازمۇنداعى كونتەنتتى كوبەيتۋ جۇمىستارىن جۇرگىزەتىن بولادى», دەلىنگەن پرەمەر-ءمينيستردىڭ جاۋابىندا.
الەم مويىنداعان كينولار نەگە كورەرمەنسىز قالادى؟
ايتا كەتەيىك, ۇلتتىق كينونى قولداۋ مەملەكەتتىك ورتالىعى 2026 جىلعا ارنالعان كينوجوبالاردى ىرىكتەۋ ءۇشىن باسىم تاقىرىپتاردى جاريالاعان.