سەمەيدەگى ونكولوگيالىق ورتالىق زاماناۋي جابدىقتارمەن تولىقتى

مەديتسينالىق ورتالىقتىڭ مالىمەتىنشە, جاڭا قۇرال-جابدىقتار ورتالىقتىڭ ءوز قاراجاتى جانە 2023-2027 جىلدارعا ارنالعان ونكولوگيالىق اۋرۋلارمەن كۇرەس جونىندەگى كەشەندى جوسپار اياسىندا رەسپۋبليكالىق بيۋدجەت ەسەبىنەن ساتىپ الىنعان. اتالعان جوبا اياسىندا كلينيكالىق زەرتحانالارعا, ەمحانالىق بولىمگە, حيرۋرگيا, انەستەزيولوگيا, رەانيماتسيا جانە قارقىندى تەراپيا بولىمشەلەرىنە, سونداي-اق, باسقا دا قۇرىلىمدىق بولىمدەرگە شامامەن 50 ءتۇرلى مەديتسينالىق قۇرال-جابدىقپەن تولىعىپ وتىر. بۇل كەشەندى ءتاسىل ونكولوگيالىق اۋرۋلاردى دياگنوستيكالاۋ مەن ەمدەۋدىڭ تولىق تسيكلىن زاماناۋي مەديتسينالىق تەحنولوگيالار ارقىلى جوعارى دەڭگەيدە قامتاماسىز ەتۋگە مۇمكىندىك بەرەدى.

جۋىردا وبلىس اكىمى بەرىك ءۋالي مەديتسينالىق نىسانداعى جوعارى تەحنولوگيالى زاماناۋي قوندىرعىلاردىڭ جۇمىسىمەن تانىستى. يادرولىق مەديتسينا جانە ونكولوگيا ورتالىعىنىڭ ديرەكتورى سايات تاڭاتاروۆ ايماق باسشىسىنا زاماناۋي جابدىقتاردىڭ مۇمكىندىكتەرى جانە ورتالىقتىڭ قىزمەتى, الداعى دامۋ جوسپارلارى تۋرالى باياندادى.

سەمەيدە جەدەل جاردەم كولىكتەرى جاڭاردى

جاقىندا ىسكە قوسۋدى جوسپارلاپ وتىرعان جابدىقتاردىڭ قاتارىندا ساۋلەلىك دياگنوستيكا بولىمىندە ورناتىلعان «Revolution Maxima» كومپيۋتەرلىك توموگرافى جانە «GIOTTO CLASS 40000» تسيفرلىق رەنتگەندىك مامموگرافيالىق اپپاراتى بار.

«بۇل جۇيەلەردى ىسكە قوسۋ ورتالىقتىڭ دياگنوستيكالىق مۇمكىندىكتەرىن ەداۋىر كەڭەيتىپ, اۋرۋلاردى الدىن الا انىقتاۋعا مۇمكىندىك بەرەدى. «Revolution Maxima» كومپيۋتەرلىك توموگرافى جوعارى سكانەرلەۋ جىلدامدىعىمەن, كەسكىن ساپاسىنىڭ ايقىندىعىمەن جانە ساۋلەلىك جۇكتەمەنىڭ تومەندىگىمەن ەرەكشەلەنەدى. «GIOTTO CLASS 40000» تسيفرلىق مامموگرافيالىق اپپاراتى ءسۇت بەزدەرىن جوعارى دالدىكپەن زەرتتەۋگە ارنالعان جانە دياگنوستيكا سالاسىنداعى زاماناۋي حالىقارالىق ستاندارتتارعا سايكەس كەلەدى», دەيدى باس دارىگەر.

ورتالىقتىڭ نەگىزگى عيماراتى 1978 جىلى سالىنىپتى. قۇرامىندا 85 توسەك-ورىنعا ارنالعان ستاتسيونار جانە ەكى قوسالقى عيمارات بار. سونىمەن قاتار ەمحانا, راديولوگيالىق ورتالىق جانە راديولوگيا ءبولىمى جۇمىس ىستەيدى. قازىر ورتالىقتا 575 ادام ەڭبەك ەتەدى, ول وبلىستىڭ 600 مىڭنان استام تۇرعىنىنا قىزمەت كورسەتەدى ەكەن.

سەمەيدە ەرەكشە كەشەن اشىلدى

ءوڭىر باسشىسى جاڭا مەديتسينالىق قوندىرعىلاردىڭ جۇمىسىن كورىپ, ورتالىق قىزمەتكەرلەرىمەن پىكىرلەستى.

«يادرولىق مەديتسينا جانە ونكولوگيا ورتالىعى – وبلىستاعى ەڭ ءىرى مەديتسينالىق مەكەمەلەردىڭ ءبىرى. ورناتىلعان جاڭا زاماناۋي جابدىقتار مەديتسينالىق قىزمەتتىڭ ساپاسىن ارتتىرۋعا مۇمكىندىك بەرەدى. مۇنداي جوعارى تەحنولوگيالىق قوندىرعىلار دارىگەرلەر ءۇشىن دە, ەمدەلۋشىلەر ءۇشىن دە اسا قاجەت. ولار اۋرۋلاردى ەرتە كەزەڭدە انىقتاۋعا, ءدال دياگنوز قويۋعا جانە ءتيىمدى ەم جۇرگىزۋگە جول اشادى», دەدى وبلىس اكىمى.

وبلىستىق دەنساۋلىق باسقارماسىنىڭ دەرەگىنشە, جالپى 2025 جىلى وڭىردەگى دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن جاڭعىرتۋعا 6 جارىم ميلليارد تەڭگەدەن استام قارجى ءبولىندى. 2026-2028 جىلدار ارالىعىندا ستاتسيونارلىق جانە امبۋلاتوريالىق-ەمحانالىق كومەك كورسەتەتىن ۇيىمدار ءۇشىن 481 مەديتسينالىق تەحنيكا ساتىپ الۋ جوسپارلانعان. بۇل مەديتسينالىق تەحنيكامەن قامتىلۋ دەڭگەيىن 95 پايىزعا دەيىن جەتكىزۋگە, توزۋ دەڭگەيىن 30 پايىزعا دەيىن تومەندەتۋگە مۇمكىندىك بەرەدى.