اقمولا وبلىسىندا ەسىرتكى قىلمىسىنا قارسى ءىس-قيمىل باسقارماسىنىڭ جەدەل قىزمەتكەرلەرى ەسىل اۋداندىق پوليتسيا ءبولىمىنىڭ قىزمەتكەرلەرىمەن بىرلەسىپ, زاڭسىز فيتوزەرتحانانى انىقتاپ, جويىپ وتىر, دەپ حابارلايدى Egemen.kz.
ءتىنتۋ بارىسىندا قاراسورا وسىرىلگەن 70-تەن استام گۇل قۇمىراسى, سونداي-اق وسىمدىكتەردى سۋارۋ, كۇتىپ-باپتاۋ جانە وڭدەۋگە ارنالعان ارنايى جابدىقتار تاركىلەندى. ەسىل قالاسىنىڭ 32 جاستاعى تۇرعىنى ءوز تۇرعىلىقتى جەرىنەن شامامەن 50 شاقىرىم قاشىقتىقتا ورنالاسقان موسكوۆسكوە اۋىلىندا زاڭسىز ءوندىرىستى جابدىقتاعان. ال زەرتحانا ورنالاسقان جەردە ونىڭ كومەكشىسى – اۋىلدىڭ 42 جاستاعى تۇرعىنى زاڭسىز بيزنەستى باقىلاپ وتىرعان كەزىندە ۇستالدى.
ىشكى ىستەر مينيسترلىگىنىڭ مالىمەتىنشە, كۇدىكتى وتكەن جىلدىڭ سوڭىندا دايىن ءونىمدى جيناپ ۇلگەرگەن, ال بيىلعى جىلدىڭ باستاپقى تۇسىندا جاڭا وسىمدىكتەردى وتىرعىزعان. بۇعان دەيىن كۇدىكتى وسىنداي زاڭسىز ارەكەتى ءۇشىن قىلمىستىق جاۋاپكەرشىلىككە تارتىلعان.
قىلمىستىق ءىس قوزعالدى. تەرگەۋ جۇرگىزىلىپ جاتىر.
ەسىرتكى بيزنەسىنە قارسى كۇرەس: 6 مىڭنان استام ادام جاۋاپقا تارتىلدى