پاۆلوداردا جۇكتى ايەلدەرگە ارنالعان پانسيونات اشىلدى

وڭىرلىك دەنساۋلىق ساقتاۋ باسقارماسى حابارلاعانداي, بۇل جاڭالىق اسىرەسە شالعاي اۋىلداردا تۇراتىن ايەلدەرگە ماڭىزدى. پانسيونات قىزمەتى اكۋشەرلىك پاتولوگياسى بار, پروبلەمالىق جۇكتىلىكتى باستان كەشىرىپ جاتقان بولاشاق انالاردىڭ قاۋىپسىزدىگى مەن جايلىلىعىن قامتاماسىز ەتۋگە باعىتتالعان. مۇندا تاۋلىك بويى مەديتسينالىق باقىلاۋ جۇرگىزىلەدى.

«وتكەن جىل پەريناتالدىق ورتالىقتىڭ جاڭارۋ كەزەڭى بولدى. سيمۋلياتسيالىق ورتالىق اشىلىپ, وسى رەنوۆاتسيا اياسىندا پانسيونات ىسكە قوسىلدى. قاجەت بولعان جاعدايدا ونى كەڭەيتۋ دە جوسپارلانعان. سونىمەن قاتار پەريناتالدىق ورتالىقتا ايەلدەر كونسۋلتاتسياسى ىسكە قوسىلىپ, رەپرودۋكتولوگ, ۋرولوگ, ەندوكرينولوگ, وزگە دە ماماندار قابىلداي باستادى. بۇل بولاشاق انالارعا كورسەتىلەتىن كومەكتىڭ ساپاسىن ارتتىرادى», دەپ حابارلادى باسقار­مادان.

پەريناتالدىق ورتالىق – قاتەرلى توپتاعى جۇكتى ايەلدەرگە بوسانۋ ۇستىندەگى, بوسان­عان­نان كەيىنگى كەزەڭدە جوعارى ماماندانعان اكۋشەرلىك-گي­نەكو­لوگيالىق, نەوناتولو­گيا­لىق كومەك كورسەتەتىن, سونىمەن قاتار شالا تۋعان نارەستەگە كۇتىم جاسايتىن ەلىمىزدەگى ەڭ ءىرى مەكەمەنىڭ ءبىرى. كەز كەلگەن وپەراتسيا جاسالادى. مۇندا اۋرۋى اسقىنعان, ىشتەگى ءسابيىنىڭ پاتولوگيالىق بەلگىلەرى بار انالار ۇزبەي ءتۇسىپ جاتادى. ولاردىڭ بارلىعىنا كومەك كورسەتۋ, جانىنا سۇيەۋ بولۋ, ءوزىنىڭ جانە ءسابيىنىڭ ومىرىنە اراشا ءتۇسۋ – دارىگەرلەردىڭ كۇندەلىكتى جۇمىسىنىڭ باستى ميسسياسى. مامانداردىڭ ايتۋىنشا, انا بويىنداعى ءتۇرلى اكۋشەرلىك اۋىتقۋلار مەن اۋرۋلار كەزىندە وپەراتسيا جاساۋ – ەڭ قيىن ۇدەرىس. مۇنداي كەزەڭدە انانىڭ جاتىرىمەن بايلانىستى ىشكى اعزالارىن ساقتاپ قالۋعا كوبىرەك كوڭىل بولىنەدى. ىشتەگى ءسابيدىڭ ۇرىقجولداسى كوپ جاعدايدا وزگە مۇشەلەرگە, جاتىرعا جابىسىپ قالاتىنى بار. كەسار تىلىگى ارقىلى جاسالاتىن وپەراتسيا جاساۋ ساتىندە دارىگەرلەر اعزانىڭ وزگە مۇشەلەرىنە مەيلىنشە زاقىم كەلمەۋىن قاداعالايدى. مۇنداي كۇردەلى ءارى اۋىر وپەراتسيالاردى پەريناتالدىق ورتالىق ماماندارى كەيىنگى 16 جىلدا ۇزبەي جاساپ ءجۇر.

جالپى, 2008 جىلدان باستاپ دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا سالماعى 500 گرامم بولاتىن بالالاردى بوساندىرىپ الۋ نورماسى قابىلدانعان. ياعني انا مەن بالانىڭ دەنساۋلىعىنا قاۋىپ ءتونىپ تۇرسا, جۇكتىلىكتىڭ 22 اپتاسىنان باستاپ بوساندىرىپ الادى. پاۆلودارداعى ورتالىقتا 2019 جىلى سالماعى 470 گرامم بولاتىن ءسابيدى امان-ەسەن دۇنيەگە اكەلگەن.

«ول بالا قازىر امان-ەسەن, ءوز قاتارلاستارىن الدەقاشان قۋىپ جەتتى. ەڭ باستىسى – ءسابيدى ءتىرى الىپ قالۋ», دەيدى دارىگەرلەر.

مەديتسينا قىزمەتكەرلەرىنىڭ مىندەتى – انا مەن ءسابيدىڭ ءومىرىن بارىنشا امان الىپ قالۋعا تىرىسۋ. انا جۇكتىلىك كەزەڭىندە بارلىق فاكتوردى ەسەپكە الىپ, دارىگەر مامانداردىڭ باقىلاۋىندا بولۋى كەرەك. مامانداردىڭ اقىل-كەڭەسىنە ۇنەمى قۇلاق ءتۇرىپ, ىق­تيمال قاۋىپتى جايتتاردىڭ ال­دىن الىپ وتىرسا, ومىرگە دەنى ساۋ ءسابي اكەلۋدىڭ مۇمكىندىگى ارتا تۇسەدى.

پاۆلودار وبلىسى