پرەمەر-مينيستر ولجاس بەكتەنوۆ ەلەكتر ەنەرگەتيكاسى سالاسىن دامىتۋعا قاتىستى جيىن وتكىزدى. وندا سالاداعى بىرقاتار تۇيىتكىلدى ماسەلە قارالدى.
جيىنعا ۇكىمەت باسشىسىنىڭ ءبىرىنشى ورىنباسارى رومان سكليار, «سامۇرىق-قازىنا» ۇاق» اق باسقارما توراعاسى نۇرلان جاقىپوۆ, پرەمەر-ءمينيستردىڭ ورىنباسارى – ۇكىمەت اپپاراتىنىڭ باسشىسى عالىمجان قويشىباەۆ, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, ەنەرگەتيكا ءمينيسترى ەرلان اقكەنجەنوۆ, «سامۇرىق-ەنەرگو» مەن «Kegoc» ۇلتتىق ەنەرگەتيكا كومپانيالارىنىڭ باسشىلارى قايرات ماقسۇتوۆ پەن ءنابي ايتجانوۆ قاتىستى.
وندا ەنەرگەتيكا مينيسترلىگى, «سامۇرىق-ەنەرگو», «Kegoc» جانە ەنەرگيا ءوندىرۋشى ۇيىمداردىڭ پرەزيدەنت جولداۋىندا قويىلعان مىندەتتەر شەڭبەرىندە جۇرگىزىپ جاتقان اعىمداعى ينفراقۇرىلىمدى جاڭعىرتۋ مەن جاڭا قۋاتتاردى گەنەراتسيالاۋ جونىندەگى جۇمىستارىنىڭ قارقىنى قارالدى.
ەنەرگەتيكا مينيسترلىگى اۋقىمدى ينۆەستيتسيالىق جوسپاردى جۇزەگە اسىرۋدىڭ پراكتيكالىق كەزەڭىنە كوشىپ جاتىر. بۇگىندە جالپى ينۆەستيتسيا كولەمى 13 ترلن تەڭگەدەن اساتىن ءارى جالپى قۋاتى 15,3 گۆت بولاتىن 81 جوبا بويىنشا جۇمىس جۇرگىزىلىپ كەلەدى. ىسكە قوسىلىپ جاتقان جوبالاردىڭ ەداۋىر بولىگى ەلەكتر قۋاتى نارىعىنىڭ تەتىگى ارقىلى جەكە ينۆەستيتسيالاردى تىكەلەي تارتۋ ەسەبىنەن جۇزەگە اسىرىلىپ وتىر.
ە.اقكەنجەنوۆ الداعى ءۇش جىلدا نەگىزىنەن رەتتەۋ قۋاتىنىڭ تاپشىلىعىن جابۋعا ءارى بىرىڭعاي ەنەرگەتيكالىق جۇيەنىڭ يكەمدىلىگىن ارتتىرۋعا باعىتتالعان مانەۆرلى گەنەراتسيا سەگمەنتىن ىسكە قوسۋ جوسپارلانىپ وتىرعانىن باياندادى.
«قازىرگى جۇمىس جۇرگىزىلىپ جاتقان نىسانداردى ىسكە قوسۋ 2027 جىلدىڭ ءبىرىنشى توقسانىنىڭ سوڭىنا قاراي ەكونوميكانىڭ ەلەكتر ەنەرگياسىنا دەگەن قاجەتتىلىگىن تولىعىمەن جابۋعا ءارى ەلىمىزدى ەنەرگيادان تاپشىلىق كورىپ وتىرعان ەلدەر قاتارىنان شىعارۋعا مۇمكىندىك بەرەدى. 2029 جىلعا قاراي ەلەكتر ەنەرگياسىنىڭ دا, رەتتەۋ قۋاتىنىڭ دا تۇراقتى پروفيتسيتىنە قول جەتكىزىلەدى. بۇل ەلىمىزدىڭ ەكسپورتتىق الەۋەتىن ارتتىرۋعا جاعداي تۋعىزادى», دەدى ەنەرگەتيكا ءمينيسترى.
جالپى, 2035 جىلعا دەيىن قوسىمشا 26 گۆت-تان استام قۋات ءوندىرۋ كوزدەرى ىسكە قوسىلاتىن بولادى. جيىندا «سامۇرىق-ەنەرگو» اق باسقارما توراعاسى قايرات ماقسۇتوۆ پەن «Kegoc» اق باسقارما توراعاسى ءنابي ايتجانوۆ تا بايانداما جاسادى.
پرەمەر-مينيستر ەنەرگەتيكالىق جوبالاردى جۇزەگە اسىرۋ كەزىندە مەرزىمدەرىن كەيىنگە ىسىرۋ جاعدايىن سىنعا الدى.
«پرەزيدەنت ەنەرگەتيكادا ءتيىستى ديناميكا جوق ەكەنىن بىرنەشە مارتە ايتتى. سوندىقتان ءبارىڭىز بارىنشا كۇش جۇمىلدىرۋلارىڭىز كەرەك. بارلىق جوسپارلانعان جوبالار بەلگىلەنگەن مەرزىمدە جۇزەگە اسىرىلۋعا ءتيىس. ەشقانداي ۇزىلىستەر, ىعىسۋلار بولماۋى كەرەك. مينيستر, «سامۇرىق-ەنەرگو» مەن «Kegoc» باسشىلارى, سىزدەر ءاربىر نىسان ءۇشىن تىكەلەي جاۋاپتىسىزدار. سىزدەردىڭ جۇمىس ورىندارىڭىز – كابينەتتەردە ەمەس, قۇرىلىس الاڭدارىندا», دەدى و.بەكتەنوۆ.
كەيىنگى ەكى جىلدا نارىقتى ىرىقتاندىرۋ ناتيجەسىندە كۇردەلى جوندەۋگە 902 ملرد تەڭگە تارتىلدى, بۇل تەحنولوگيالىق ەرەجە بۇزۋ سانىن 27%-عا تومەندەتۋگە ءارى 9 جەو-نى «قىزىل» ايماقتان شىعارۋعا مۇمكىندىك بەردى. بۇل رەتتە كومپانيالاردىڭ يەلەرىنە ديۆيدەند تولەنگەن جوق. بارلىق قاراجات تەك قانا ستانسا جابدىقتارىن رەكونسترۋكتسيالاۋ مەن جاڭارتۋعا كەرى ينۆەستيتسيالانىپ جاتىر. بۇل اكتيۆتەردى جاڭارتۋ جوبالارىنىڭ پۋلىن ارتتىرۋعا ءارى گەنەراتسيا سەكتورىنا ناقتى كاپيتالدىڭ كەلۋىن قامتاماسىز ەتۋگە مۇمكىندىك بەردى.
سونداي-اق مەملەكەت باسشىسىنىڭ تاپسىرمالارى شەڭبەرىندە تازا كومىر تەحنولوگيالارى نەگىزىندە كومىر گەنەراتسياسىن دامىتۋ پەرسپەكتيۆالارى قارالدى. بۇگىندە مەردىگەرلەر انىقتالىپ, ستراتەگيالىق ماڭىزدى نىسانداردى جۇزەگە اسىرۋ باستالدى. ولاردىڭ قاتارىندا ەكىباستۇز گرەس-3 (2 640 مۆت), كۋرچاتوۆ قالاسىنداعى جاڭا ستانسا (700 مۆت), سونداي-اق كوكشەتاۋ (240 مۆت), سەمەي (360 مۆت) مەن وسكەمەن (360 مۆت) قالالارىنداعى جىلۋ ەلەكتر ورتالىقتارى بار.
جەلىلىك ينفراقۇرىلىمدى دامىتۋعا قاتىستى «Kegoc» اق-نىڭ وڭتۇستىك ايماق جەلىسىن كۇشەيتۋ بويىنشا جۇمىس جۇرگىزىلۋدە, ياعني ۇزىندىعى 475 شاقىرىم «شۋ – جامبىل – شىمكەنت» (500 كۆ) اۋە ەلەكتر تاراتۋ جەلىسى تارتىلىپ جاتىر. بۇعان قوسا, ۇزىندىعى 604,3 شاقىرىم بولاتىن «ولكە – قاراباتان» (500 كۆ) اۋە جەلىسىن سالۋدى كوزدەيتىن باتىس قازاقستان ەنەرگوجۇيەسىن ەەق ەلدەرىمەن بىرىكتىرۋ جوباسى جۇزەگە اسىرىلىپ وتىر. ەكى جوبا دا كەستەگە سايكەس جۇرگىزىلىپ كەلەدى. قۇرىلىسى 2027 جىلى اياقتالادى دەپ جوسپارلانعان.
كومپانيا 2035 جىلعا دەيىن 6 659 شاقىرىم جاڭا 220-500 كۆ جەلىسىن ىسكە قوسۋدى ءارى 10 591 شاقىرىم جەلىنى رەكونسترۋكتسيالاۋدى جوسپارلاپ وتىر. بۇگىندە ۇلتتىق ەلەكتر جەلىسىنە 83 قوسالقى ستانسا مەن جالپى ۇزىندىعى 27,9 مىڭ شاقىرىم بولاتىن 398 اۋە جەلىسى كىرەدى, ترانسفورماتورلاردىڭ جالپى قۋاتى – 38 893,6 مۆا.
«سامۇرىق-ەنەرگو» اق-نىڭ جوبالار پورتفەلىندە 2035 جىلعا دەيىن جاڭا قۋاتتاردى ىسكە قوسۋ جوسپارى 7,4 گۆت-تى قۇرايدى. نەگىزگى جوبالاردىڭ قاتارىندا بيىلعى قازان ايىندا ىسكە قوسىلاتىن الماتى جەو-2-نى جاڭعىرتۋ, سونداي-اق ەكىباستۇز گرەس-2 ستانساسىن 2028 جىلدىڭ قازان ايىندا 3-بلوگىن جانە 2030 جىلعى قازاندا 4-بلوگىن ىسكە قوسا وتىرىپ, كەڭەيتۋ مەن رەكونسترۋكتسيالاۋ جۇمىسى بار.