قارتتارعا جان-جاقتى قامقورلىق

وڭىرلىك جۇمىسپەن قام­تۋدى ۇيلەس­تىرۋ جانە الەۋ­مەتتىك باع­دارلامالار باس­قار­ماسىنىڭ دەرە­گىنشە, قارت­تار مەن مۇگە­دەك­تىگى بار ادام­دارعا ارنالعان ستاتسيونار جاع­دايىنداعى مەم­لەكەتتىك ورتالىق سانى – ەكەۋ. ولار – «پاۆلودار وبلىسىنىڭ جالپى ۇلگىدەگى قارتتار مەن مۇگە­دەكتىگى بار ادامدارعا ارنال­­عان ارناۋلى الەۋمەتتىك قىز­مەت كورسەتۋ ورتالىعى» كمم (268 توسەكتىك ورىن) مەن «قارت­تار مەن مۇگەدەكتىگى بار ادامدار­عا ارنالعان جال­پى ۇلگىدەگى اقسۋ ارناۋ­لى الەۋ­مەتتىك قىز­مەت­تەر كورسەتۋ ورتا­لىعى» كمم (241).

«قارتتار مەن مۇگەدەكتىگى بار ادامدارعا ارنالعان ارناۋ­لى الەۋمەتتىك قىزمەت كورسەتۋ ورتالىقتارىن 497 ادام پانالاپ وتىر. ولاردىڭ 323-ءى ەر, وزگەسى ايەل ادامدار. پاۆلودار قالاسىندا ورنالاسقان قارتتار ۇيىنە 4 ادام كەزەكتە تۇر. اقسۋ­داعى مەكەمەدە كەرىسىنشە 12 ورىن بوس تۇر. سول تۇرعىدا وڭىردە قارتتار ۇيلەرىنە تاپ­شىلىق بايقالمايدى», دەيدى باسقارما باسشىسىنىڭ ورىنباسارى ءاليا راحىموۆا.

الەۋمەتتىك قىزمەت كورسەتۋ جۇيەسىن ترانسفورماتسيالاۋ شەڭبەرىندە بىلتىردان باستاپ ەلىمىزدە ارناۋلى الەۋمەتتىك قىزمەتتەر كورسەتۋ سالاسىندا ارنايى الەۋمەتتىك قىزمەت­تەر كورسەتەتىن سۋبەكتىلەردى ليتسەنزيالاۋ, جان باسىنا شاققانداعى قارجىلاندىرۋعا كوشۋ سياقتى ەلەۋلى وزگەرىستەر ەنگىزىلگەن. الەۋمەتتىك كودەكس­كە سايكەس, ارناۋلى الەۋمەتتىك قىزمەت كورسەتەتىن سۋبەكتىلەر – ارناۋلى الەۋمەتتىك قىزمەت كورسەتۋگە ليتسەنزيا نەگىزىندە ارناۋلى الەۋمەتتىك قىزمەت كورسەتۋ بو­يىنشا مەملەكەتتىك جانە مەم­لەكەتتىك ەمەس سەكتورلاردا جۇمىس ىستەيتىن جەكە جانە زاڭدى تۇلعالار.

«پاۆلودار وبلىسىندا بۇ­گىندە ستاتسيونار جاع­دايىن­دا ارناۋلى الەۋ­مەتتىك قىزمەت­تەر كورسەتەتىن ليتسەنزيالان­عان جەكە سۋبەك­تىلەر جوق. بىراق اۋماعى­مىز­دا تۇراقتى كۇتىمگە مۇقتاج ەگدە جاستاعى ادامدارعا تۇر­مىستىق كۇتىم كور­سەتۋ جو­نىندەگى قىزمەتتى جۇ­زەگە اسىراتىن 5 جەكەمەن­­شىك پانسيونات جۇمىس ىستەيدى. بۇل ۇيىمداردىڭ قىزمەتى حالىق­تى الەۋمەتتىك قورعاۋ جۇيەسىن رەتتەۋ, ۆەدومستۆولىق باقىلاۋ سالاسىنان تىس ورنالاسقان. سەبەبى ونداعى كۇتىلىپ جات­قان قاريالاردىڭ ەڭبەككە قابى­لەتتى بالالارى بار. سونداي-اق اتالعان پانسيوناتتاردىڭ ارناۋلى الەۋمەتتىك قىزمەتتەر كورسەتۋگە ليتسەنزياسى جوق, ارناۋلى الەۋمەتتىك قىزمەتتەر كەشەنىن ۇسىنبايتىندىقتان, الەۋمەتتىك قىزمەتتەردى جەت­كىزۋشىلەر تىزىلىمىنە ەنگىزىل­مەگەن. سوعان وراي ولارعا بيۋدجەتتەن قارجى بولىنبەي­دى», دەپ قوستى باسقارما وكىلى.

بۇدان بولەك, ايماقتا ۇيدە كۇتىم جاساۋ جاعدايىنداعى قىز­مەتتى 18 ۇيىم, ونىڭ ىشىندە 13 مەملەكەتتىك, 5 مەملەكەتتىك ەمەس سۋبەكتى جۇزەگە اسىرىپ وتىر.

بىلتىر پروكۋرورلار اقسۋ قالاسىنداعى پانسيونات­تا قارت ادامداردى سىرت كيىمسىز دالادا ۇستاپ, ازاپتاۋ دەرەكتەرىن انىق­تاعان ەدى. جۇمىسپەن قام­­تۋدى ۇيلەستىرۋ جانە الەۋ­­مەتتىك باعدارلامالار باس­قار­ما­سى­نىڭ اقپارىنشا, قازىر اتالعان ورتالىق جۇ­مىس ىستە­مەيدى. سوت كىنالى تۇلعا­لاردى انىقتاپ, قىلمىستىق جاۋاپ­كەرشىلىككە تارتقان.

اتاپ وتەرلىگى, بيىل قارت­تار ۇيلەرىنە بيۋدجەتتەن 1 ملرد 667,2 ملن تەڭگە بولىنگەن.

پاۆلودار وبلىسى