«Turkistan» گازەتىندەگى مەملەكەت باسشىسىنىڭ سۇحباتى قوعامداعى اسا وتكىر ماسەلەلەرگە قوزعاۋ سالدى. وندا: «الەۋمەتتىك جەلى ادامنىڭ ويلاۋ ( تانىمدىق) قابىلەتىنە زور زيان كەلتىرىپ وتىر. جاسى قىرىققا جەتسە دە, ءبىلىمى مەن وي-ءورىسى ون بەس جاستاعى جاسوسپىرىمدەر دەڭگەيىندە قالىپ قويعان ازاماتتاردى قازىردىڭ وزىندە كەزدەستىرۋگە بولادى», دەپ كورسەتەدى.
شىنىندا دا بۇگىندە گازەت-جۋرنالدار مەن ادەبي-تانىمدىق كىتاپتاردى وقىمايتىن, رۋحاني قۇندىلىعى «جاداۋ», وي-ءورىسى كەمشىن, ۆيرتۋالدى الەمدە ء«ومىر ءسۇرۋدى» عانا بىلەتىن, كۇندەلىكتى ومىردەگى قيىندىقتاردى شەشۋدە دارمەنسىزدىك تانىتاتىن ۇرپاقتىڭ ءوسىپ كەلە جاتقانى جاسىرىن ەمەس.
سۇحباتتا پرەزيدەنت «كاسىبي كادرلاردى دايارلاۋ ءۇشىن مەكتەپتەر مەن ۋنيۆەرسيتەتتەردە ءتيىستى ءبىلىم بەرۋ باعدارلامالارى جۇزەگە اسىرىلىپ جاتىر. ماسەلەن, 650 مىڭنان استام ستۋدەنت Ai-Sana باعدارلاماسى اياسىندا ءبىلىم الدى. كوپ ۇزاماي جاساندى ينتەللەكت مامانداندىرىلعان زەرتتەۋ ۋنيۆەرسيتەتى اشىلادى», دەپ, جاساندى ينتەللەكتىنى ەلىمىزدە دامىتۋدىڭ باعىت-باعدارىن مالىمدەدى. جاساندى ينتەللەكت دەگەنىمىز – ادامنىڭ اقىل-ويىنىڭ, ساناسىنىڭ كومپيۋتەردە بەينەلەنۋى. دەگەنمەن «ساياساتتا باس بار, جۇرەك جوق», دەگەن قاناتتى ءسوزدى جاساندى ينتەللەكتىگە قاراي بۇرار بولساق, ادامدار اراسىنداعى مەيىرىمدىلىك, قايىرىمدىلىق, قامقورلىق سىندى اسىل قاسيەتتەردەن ايىرىلىپ قالماعانىمىز دۇرىس.
پرەزيدەنت اسكەر تاقىرىبىنا قاتىستى ويىن: «ارميا جاستارعا قولداۋ كورسەتىپ, ولاردى ەلىمىزدىڭ ناعىز ازاماتى رەتىندە تاربيەلەپ شىعارۋى كەرەك. كومانديرلەر اسكەري قىزمەتشىلەرگە ۇلگى-ونەگە بولۋعا ءتيىس. اسكەردە الىمجەتتىككە, بۇزاقىلىققا, رۋشىلدىققا, جەرشىلدىككە ورىن جوق, ونداي جايتتارعا ورىن بەرىلمەيدى. مۇنىڭ ءبارىن ءوزىم جەكە قاداعالاپ وتىرامىن», دەپ تۇجىرىمدايدى. جاس ساربازدار انت بەرگەندە «اسكەري قىزمەتتىڭ اۋىرتپالىعى مەن قيىندىعىن تاباندىلىقپەن كوتەرەمىن», دەگەن سوزدەردى ايتادى. راسىندا دا, اسكەري ومىرگە بەيىمدەلگەنشە جاس ساربازداردى قولداۋ دا, قورعاۋ دا كەرەك. سونداي-اق ء«وز ارمياسىن اسىراي الماعان ەل, وزگە ەلدىڭ ارمياسىن اسىرايدى», دەگەن ءتامسىل سوزگە سۇيەنسەك, ارميادا تەمىردەي ءتارتىپ تە بولۋى كەرەك.
پرەزيدەنت سۇحباتىندا وتانشىلدىق ۇعىمىنا ەرەكشە ءمان بەرەدى. «وتانشىلدىق دەگەن ۇلى سەزىم جىلتىراق سوزبەن, جالعان ارەكەتپەن, باعالانباۋعا ءتيىس. ناعىز وتانشىل ازامات جۇرتتىڭ الدىندا كەۋدەسىن سوعىپ كوتەرمەيدى, ەتەگى جاسقا تولىپ ەڭىرەمەيدى, وڭدى-سولدى سۇحبات بەرىپ دىلمارسىمەيدى. ۇندەمەي ءجۇرىپ ۇلكەن ءىس تىندىرادى. وتانشىل بولۋ – تۋعان ەلىڭنىڭ, وتباسىڭنىڭ يگىلىگى ءۇشىن ايانباي ەڭبەك ەتۋ دەگەن ءسوز», دەپ تۇسىنىك بەرەدى. پرەزيدەنت قاسىم-جومارت توقاەۆتىڭ سۇحباتتاعى كەلىستى ويلارى, كەسىمدى پىكىرلەرى, تۋراشىل تۇجىرىمدارى مەملەكەتىمىزدىڭ ءوسىپ-وركەندەۋىنە سەپتىگىن تيگىزسە جاراسىمدى بولار ەدى.
ايدار سابىروۆ,
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ اعا وقىتۋشىسى