قاراعاندى. 12 مامىر. قاراعاندى قالاسىندا جانجالداسۋشى توپ اراسىندا اتىس بولىپ, سونىڭ سالدارىنان ءۇش ادام جاراقات الىپ قالدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
وقىس وقيعا 11 مامىر كۇنى بولعان. سول كۇنى 23 جاستاعى پوليتسيا قىزمەتكەرى سامات ىسقاقوۆ ۇيىنە قايتىپ كەلە جاتىپ, كوشەدە كەرىلدەسىپ تۇرعان ءبىر توپ ادامدى بايقاپ قالادى. «ۇستىمدە قىزمەتتىك فورمام بار ەدى. جاقىنداپ كەلە جاتقانىمدى كورگەن ەكى جىگىت قاشىپ كەتتى. قولىندا قارۋى بار ولاردىڭ ءبىرى بىرنەشە رەت وق اتتى», - دەدى پوليتسيا سەرجانتى بولعان وقيعا جايىندا.
قۇقىق قورعاۋ ورگاندارى قىزمەتكەرىنىڭ ايتۋىنشا, سودان كەيىن دە جانجال بولعان جەردە ەكى جىگىت قالعان. ولاردىڭ بىرەۋىنىڭ قولىندا «وسا» تراۆماتيكالىق تاپانشاسى بولىپتى.
«جارالانعان ەر ادام پوليتسەيدىڭ باسىنا قارۋ تاقاپ, ودان ارالاسپاۋىن تالاپ ەتكەن. سامات قورعانىس شارالارىن پايدالانىپ, ەر ادامنىڭ قولىنان قارۋىن قاعىپ تۇسىرگەن. تاپانشا جەرگە تۇسە سالىسىمەن, ەر ادام قاسىندا تۇرعان كولىككە قاراي جۇگىرگەن», - دەدى وبلىستىق ىشكى ىستەر دەپارتامەنتىندەگىلەر.
وسىنىڭ ارتىنشا سەرجانت پوليتسياعا حابار بەردى. ول بەتىنە وق تيگەن 20 جاسار جىگىتتى پوليتسەيلەر كەلگەنشە كۇزەتىپ تۇرعان. «ءبىراز ۋاقىت وتكەننەن كەيىن پوليتسەيلەر «وسا» تاپانشاسىنان وق اتقان 34 جاستاعى ەر ادام مەن 39 جاستاعى ونىڭ دوسىن ۇستادى. ولار قالاداعى اۋرۋحانالاردىڭ بىرىندە ۇستالدى. ەكى ەر ادام دا جارالانعان», - دەدى پوليتسەيلەر. قازىر بولعان وقيعانىڭ ءمان-جايى انىقتالىپ جاتىر.
ايقىن نەسىپباي.
دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: tengrinews.kz.