قالا كوشەسىندە قاۋىپتى مانەۆر جاساعان جۇرگىزۋشى ۇستالىپ, اكىمشىلىك جازاعا تارتىلدى. پوليتسيا وكىلدەرى مۇنداي ارەكەتتەرگە جول بەرىلمەيتىنىن ەسكەرتتى, دەپ جازادى Egemen.kz.
الماتىدا جول قوزعالىسى ەرەجەلەرىن ورەسكەل بۇزعان جۇرگىزۋشى تۋرالى اقپاراتتى Polisia.kz سايتى تاراتتى.
ءتارتىپ ساقشىلارىنىڭ مالىمەتىنشە, ەر ادام جول ەرەجەسىن بۇزىپ قانا قويماي, اينالاداعى كولىكتەر مەن جاياۋ جۇرگىنشىلەرگە قاۋىپ توندىرگەن. قۇقىق قورعاۋ ورگاندارى قۇقىقبۇزۋشىلىقتى دەر كەزىندە توقتاتىپ, جۇرگىزۋشىنى ۇستاعان.
سوت شەشىمىمەن ول 5 تاۋلىككە قاماۋعا الىندى, ال كولىگى ايىپ تۇراعىنا قويىلدى.
دريفت جاساپ, جۇرگىزۋشىلەرگە كەدەرگى كەلتىرگەن
مەدەۋ اۋداندىق پوليتسيا باسقارماسى باسشىسىنىڭ ورىنباسارى ايدار ناعاشىبەكوۆتىڭ ايتۋىنشا, الەۋمەتتىك جەلىگە كونتەنت ءتۇسىرۋ ماقساتىندا كورسەتىلىم ءۇشىن قاۋىپتى كولىك جۇرگىزۋ جاعدايلارى كوبەيىپ كەلەدى.
«مۇنداي ارەكەتتەر ءۇشىن مىندەتتى تۇردە جاۋاپكەرشىلىك قاراستىرىلعان. ەشبىر قۇقىقبۇزۋشىلىق نازاردان تىس قالمايدى», دەدى ول.