مەملەكەت باسشىسى قاسىم-جومارت توقاەۆ كۇزدە ەلىمىزدە Astana AI Film Festival اتتى تاعى ءبىر ماڭىزدى حالىقارالىق بايقاۋ ۇيىمداستىرىلاتىنىن ايتتى, دەپ حابارلايدى Egemen.kz.
– بۇل كرەاتيۆتى يندۋستريانىڭ دامۋىنداعى ىرگەلى وزگەرىستەردى كورسەتەتىن جاھاندىق دەڭگەيدەگى العاشقى ءىس-شارا بولماق. جاساندى ينتەللەكت شىعارماشىلىق تابيعاتىنا تۇبەگەيلى بەتبۇرىس اكەلەدى, ءوزىن تانىتۋدىڭ جاڭا فورمالارىن اشادى ءارى تالانتتاردىڭ الدىنان شىعاتىن كەدەرگىلەردى ازايتادى. قازاقستان وسى جاھاندىق جاڭاشىلدىقتاردىڭ بەل ورتاسىندا بولۋعا ۇمتىلادى. سونىمەن قاتار جاساندى ينتەللەكت اسەرىنەن كرەاتيۆتى يندۋستريا جويىلادى, قازىرگى كۇيىندە ساقتالمايدى دەگەن پەسسيميستىك بولجامداردى ەسكەرۋ كەرەك. سوندىقتان بارلىق ءۇردىستى باقىلاپ, وزگەرىستەرگە دەر كەزىندە بەيىمدەلۋ قاجەت. فەستيۆالدى ۇيىمداستىرۋ قازاقستاندى حالىقارالىق ارەناداعى يننوۆاتسيالار مەن جاسامپاز باستامالار ورتالىقتارىنىڭ ءبىرى رەتىندە كورسەتۋ ءۇشىن وتە ماڭىزدى, – دەدى پرەزيدەنت.
قاسىم-جومارت توقاەۆ تسيفرلاندىرۋ جانە جاساندى ينتەللەكتىنى جاپپاي ەنگىزۋ ۇدەرىسى اۋقىمدى وزگەرىستەرگە جول اشقانىن ايتتى.
– سوندىقتان ءبىز ازاماتتاردىڭ الەۋەتىن ارتتىرۋعا, ولارعا تسيفرلىق داعدىلاردى ۇيرەتۋگە باسا ءمان بەرىپ وتىرمىز. بۇگىندە 650 مىڭنان استام ستۋدەنت Al Sana باعدارلاماسىمەن ءبىلىم الىپ جاتىر. الداعى ۋاقىتتا جاساندى ينتەللەكت جانە deeptech-تەحنولوگياسىنا قاتىستى تاعى دا 100 مىڭ مامان دايارلاۋىمىز كەرەك. بيىل ەلىمىزدە جاڭا ۇلگىدەگى تەحنولوگيالىق ءبىلىم ورداسى – جاساندى ينتەللەكت ۋنيۆەرسيتەتى اشىلادى. بۇل عىلىم سالاسى ءۇشىن ماڭىزدى وقيعا بولماق. ەندى الدىمىزدا تۇرعان وزەكتى مىندەت: ءبىز وسى سالادا بىلىكتى مامان دايارلاۋ ىسىنە ەرەكشە كوڭىل ءبولۋىمىز كەرەك. دارىندى جاستاردى تارتىپ, ولارعا ساپالى ءبىلىم بەرۋ قاجەت. سونداي-اق كەلەشەگى زور تەحنولوگيالىق جوبالار مەن كومپانيالارعا قولداۋ كورسەتۋ ايرىقشا ماڭىزدى. وسىنداي جۇيەلى جۇمىستىڭ ناتيجەسى دە ەلىمىز ءۇشىن ءتيىمدى بولارى انىق, – دەدى مەملەكەت باسشىسى.ەسكە سالايىق, بۇگىن پرەزيدەنت Alem.ai حالىقارالىق جاساندى ينتەللەكت ورتالىعىنا باردى, وندا ول بىرقاتار ءبىلىم بەرۋ باستاماسىن ىسكە قوسۋ راسىمىنە قاتىستى.
سونداي-اق قاسىم-جومارت توقاەۆ «بولاشاق ويىندارى-2026» حالىقارالىق تۋرنيرىنە دەيىنگى كەرى ساناقتى ينتەراكتيۆتى فورماتتا ىسكە قوستى.