استانادا وتكەن RES 2026 جاھاندىق ءسامميتى اياسىندا Satbayev University عالىمدارى مەن «ECOTEC Engineering» كومپانياسى وتاندىق عىلىمنىڭ وزىق جەتىستىكتەرىن تانىستىردى. EXPO ورتالىعىنداعى ۇلتتىق پاۆيلوندى ارالاعان مەملەكەت باسشىسى قاسىم-جومارت توقاەۆ پەن وزگە ءوڭىر باسشىلارى قازاقستاندىق ينجەنەرلەردىڭ سۋ تاپشىلىعى مەن ەكولوگيالىق قاۋىپسىزدىكتى شەشۋگە باعىتتالعان بىرەگەي جوبالارىنا جوعارى قىزىعۋشىلىق تانىتتى, دەپ حابارلايدى Egemen.kz.
ەرەكشە نازار Satbayev University ەكسپوزيتسياسىنا اۋدارىلدى. مۇندا ۋنيۆەرسيتەت عالىمدارىنىڭ عىلىمي ازىرلەمەلەرى نەگىزىندە ECOTEC Engineering كومپانياسىمەن بىرلەسىپ جۇزەگە اسىرىلىپ جاتقان جوبالار تانىستىرىلدى. بۇل جوبالار قازاقستاندا عىلىمنىڭ قولدانبالى سيپات الىپ, ەكونوميكانىڭ ستراتەگيالىق سالالارىندا ناقتى ناتيجە بەرىپ وتىرعانىن كورسەتتى.
عالىمداردىڭ باستى جاڭالىعى – ورتالىق ازيادا العاش رەت وندىرىسكە ەنگىزىلگەن كەرى وسموس مەمبرانالارى مەن ولاردىڭ جۇمىسىن قاشىقتان باقىلايتىن RFID تەحنولوگياسىنا نەگىزدەلگەن «اقىلدى» جۇيە. بۇل جوبا ءوڭىردىڭ تەحنولوگيالىق تاۋەلسىزدىگىن قامتاماسىز ەتىپ قانا قويماي, كاسپي تەڭىزىنىڭ سۋىن تۇششىلاندىرۋ سياقتى ستراتەگيالىق مىندەتتەردى شەشۋگە مۇمكىندىك بەرەدى. قازىرگى ۋاقىتتا كاسپي تەڭىزى جاعدايىنا بەيىمدەلگەن جاڭا بۋىن مەمبرانالارىن ازىرلەۋ جۇمىستارى جۇرگىزىلىپ جاتىر. ماڭعىستاۋ وبلىسىندا تاجىريبەلىك-ونەركاسىپتىك سىناقتار وتكىزۋ جوسپارلانعان.
وتاندىق عالىمدار قۇرعاقشىلىققا ءتوزىمدى داقىلداردى ويلاپ تاپتى
سونىمەن بىرگە قازاقستاندىق زەرتتەۋشىلەر جاساندى ينتەللەكت نەگىزىندە جۇمىس ىستەيتىن اۋا مەن سۋ ساپاسىن باقىلاۋدىڭ اۆتوماتتاندىرىلعان مونيتورينگ ستانتسيالارىن ويلاپ تاپتى. بۇل جۇيە ەكولوگيالىق تاۋەكەلدەردى الدىن الا بولجاپ, شەشىم قابىلداۋعا كومەكتەسەدى. Satbayev University عالىمدارىنىڭ پورتۋ ۋنيۆەرسيتەتىمەن (پورتۋگاليا) بىرلەسكەن زەرتتەۋلەرى وتاندىق تەحنولوگيالاردىڭ جاھاندىق نارىققا شىعۋىنا جول اشىپ, قازاقستاننىڭ عىلىمي-ينجەنەرلىك الەۋەتىن الەمدىك دەڭگەيدە مويىنداتتى.
جالپى العاندا, RES 2026 الاڭىندا ۇسىنىلعان باستامالار قازاقستان عىلىمىنىڭ جاڭا ساپالىق دەڭگەيگە كوتەرىلگەنىن ايقىن اڭعارتتى. بۇگىندە عىلىم ەل دامۋىنىڭ نەگىزگى قوزعاۋشى كۇشىنە اينالىپ, ەكونوميكالىق وسىمگە, تەحنولوگيالىق تاۋەلسىزدىككە, ەكولوگيالىق قاۋىپسىزدىككە جانە ۇلتتىق قاۋىپسىزدىككە تىكەلەي ىقپال ەتىپ وتىر.