ورال. 12 مامىر. باتىس قازاقستان وبلىسىنىڭ ورتالاعى - ورال قالاسىندا تۇرعىندارعا «قولجەتىمدى باسپانا» باعدارلاماسى بويىنشا پاتەر الىپ بەرەمىز» دەپ, حالىقتى الداپ جۇرگەن الاياقتار قولعا ءتۇستى. بۇل تۋرالى egemen.kz ءتىلشىسى حابارلادى.
ولار وزدەرىن اكىمدىكتە ىستەيمىز دەپ تانىستىرعان ەكەن. الدىن الا بەلگىلى بولعان دەرەكتەرگە سۇيەنسەك, وسى كەزگە دەيىن 6 الاياق 50 ادامدى 200 ملن. تەڭگەدەن استام شىعىنعا باتىرعان.
اتالعان ىسكە بايلانىستى 2014 جىلدىڭ قاڭتارىندا وبلىستىق ىشكى ىستەر دەپارتامەنتىنىڭ قىزمەتكەرلەرى الاياقتىق دەرەكتەرى بويىنشا تەرگەۋ امالدارىن باستاعان. سودان بەرى ۇزدىكسىز جالعاسىپ كەلگەن تەكسەرۋدى تاياۋدا اياقتادى. ناتيجەسىندە اكىمدىك اتىن جامىلعاندار ءوز قۇرباندارىن كورسەتكەن.
وسى ارالىقتا پوليتسياعا 26 ادام ارىزدانعان. بۇدان كەيىن بىردەن 20 قىلمىستىق ءىس قوزعالدى. باتىس قازاقستان وبلىستىق ىشكى ىستەر دەپارتامەنتى تەرگەۋ باسقارماسىنىڭ باستىعى ماعاۋيا قۇرماشەۆتىڭ ايتۋىنشا, تۇرعىندار وزدەرىن پاتەرمەن «جارىلقاۋشىلاردىڭ» ءبىرى قارلىعان حافيزوۆاعا 30-40 مىڭ دوللاردان ۇستاتقان. بۇل سومالار «پاتەرلەردىڭ ىشكى قۇرىلىمى مەن شارشى مەترىنە ساي تولەنگەن».
الاياق ايەل ولاردىڭ كوڭىلدەرىندە كۇدىك قالماۋى ءۇشىن: «ءۇي قۇرىلىسى اياقتالدى. بىراق مۇندا بارلىق پاتەرلەر ساتىلىمعا تۇسكەن جوق. سوندىقتان مەملەكەتتىك باعدارلاما بويىنشا پاتەر العىسى كەلگەندەردىڭ ماعان جولىعۋلارىنا بولادى», – دەپ, سەندىرىپ وتىرعان.
الايدا, قۇقىق قورعاۋ ورگاندارى انىقتاعانداي, جوعارىدا اتالعان 6 «جارىلقاۋشىنىڭ» ەشقايسىسى مەملەكەتتىك قىزمەتكە نەمەسە اكىمدىككە ەش قاتىسى جوق. سوعان قاراماستان, ولار وزدەرىن بەينە ءبىر اكىمدىكتە ىستەپ جۇرگەندەي ەتىپ كورسەتە بىلگەن. اكىمدىك عيماراتىنىڭ جانىندا, ءتىپتى ونىڭ ەسىگىنىڭ قاسىندا ەش يمەنبەستەن, ادامدارمەن كەزدەسكەن. بۇل جونىندە ماعاۋيا قۇرماشەۆ: «ءدال اكىمدىكتە ىستەيتىن ادامدار سەكىلدى عيماراتقا كىرىپ كەتەدى دە, قاعازدار الىپ شىعادى ەكەن. سوندا تومەندە كۇتىپ تۇرعاندار ولار وتە جاۋاپتى تۇلعاعا جولىعىپ شىققاندارىنا كۇمانى قالماعان», – دەدى.
تەمىر قۇسايىن.
دەرەك: egemen.kz.
سۋرەت: vesti.ru.